Na taua e le Pulesili fou o le Vaega Tosova’a a le malo i Satala ia Moefa’auo Bill Emmsley e fa’apea, o le fa’aletonu lea ua a’afia ai va’a fagota a Amerika i le fa’aitiitia o aso e fagogota ai i ogasami o lo o tele ai le i’a, e ono avea lea ma itu e a’afia atu ai ma tupe maua a le Vaega Tosova’a, pe afai ae le toe i ai ni va’a fagota e afea Amerika Samoa ma fa’aaoga le tautua a le Vaega Tosova’a a le malo.

Ona o lea fa’afitauli, na taua ai e Moefa’auo le manaomia lea o le latou galulue fa’atasi ma pule o va’a fagota eseese i le lalolagi, ina ia vavalalata pea le latou fesootaiga ma fa’amaonia mai, e aumai pea a latou va’a e lipea i Amerika Samoa, ina ia maua ai fo’i se vaega tupe e fesoasoani ai i le atina’eina ma le fa’aleleia o le Vaega Tosova’a.

E $1.8 miliona le paketi fuafuaina a le Vaega Tosova’a mo le tausaga tupe fou 2016, lea ua fa’amoemoe e fa’atupe ai ana galuega fa’atino, atoa ai ma le totogiina o tagata faigaluega e to’a 38, e pei ona fa’amaonia e Moefa’auo i luma o le Komiti Soofa’atasi a le Fono i le taimi na fesiligia ai le paketi a lona ofisa i le aso Lulu na te’a nei.

Na fesili le afioga i le alii senatoa ia Tuaolo M. Fruean i le molimau, i le mafua’aga e fa’akonekarate uma ai tagata faigaluega a le Vaega Tosova’a, ae na tali le molimau, o le tulaga lava lea e taunu’u atu o ia i le Ofisa o lo o i ai, ae o lo o galulue lona ofisa i se auala e avea ai ni isi o tagata faigaluega konekarate ma tagata faigaluega tumau a le malo.

Na taua e le afioga i le alii faipule ia Larry Sanitoa e fa’apea, o lona popolega o lo o i ai, ina ne’i avea le leai o ni galuega faatino a le Vaega Tosova’a ma itu e fa’amalolo uma ai tagata faigaluega konekarate, ma avea ai ma auala e a’afia ai nai o latou aiga, peita’i na saunoa Moefa’auo e fa’apea, tusa lava pe leai ni galuega a le Vaega Tosova’a, e taumafai lava le Pulega e saili ni isi galuega e fa’aaoga i ai taimi ma le tomai o tagata faigaluega, ina ia taofia ai le malolo o i latou mai galuega.

Na toe fesili Sanitoa ia Moefa’auo po o i ai ni va’a o fuafua e aga’i mai i le Vaega Tosova’a i le tausaga tupe fou lea e amata i le masina fou, ae na saunoa le molimau, o lo o i ai va’a ua fa’amoemoe e aga’i mai i totonu i le tausaga fou mo le faia i ai o galuega lipea.

O se tasi o mataupu na fesiligia e le afioga i le ali’i faipule ia Puleleiite Tufele Li’amatua, o le fa’aitiitia lea o tupe o lo o fa’amoemoe le Vaega Tosova’a e maua mai i galuega latou te fa’atinoina i va’a e toso ma faia i ai galuega lipea i le tausaga tupe fou.

I le tausaga tupe e 2014, e $1miliona le tupe sa maua mai i le faia o galuega lipea i va’a tetele, peita’i o le tausaga tupe lenei, e na o le $675,000 le tupe sa maua, ma le $880,000 ua valoia e tatau ona maua i le tausaga tupe fou.

Saunoa Moefa’auo e faapea, e le i toe ausia e le Vaega Tosova’a le $1 miliona mo le lipeaina o va’a tetele talu mai le 2014, peita’i o lo o naunau pea le latou Ofisa ina ia latou toe ausia lea vaega tupe.

“I le tulaga fa’aletonu o lo o i ai va’a o lo o aga’i mai i totonu e fa’aaoga le tautua a le Vaega Tosova’a, e foliga mai e faigata lava ona ausia le vaega tupe e $880,000 lea o lo o fuafua e maua i le tausaga tupe fou,” o le saunoaga lea a Moefa’auo.

Na fesili le afioga i le ali’i senatoa ia Soliai T. Fuimaono i le molimau, pe i ai se afaina o va’a e aga’i mai i le atunuu, i tulafono tau fa’afefe a le vaega a le U.S Coast Guard lea ua tele va’a ua afaina ai, ae na tali le molimau, “e tele le afaina.”

“O le Vaega Tosovaa e fa’alagolago malosi ana tupe maua i va’a e aga’i mai i le atunu’u, afai la e tau leai ni va’a e ulufale mai, o le fa’aitiitia fo’i lena o le matou tupe maua, o le tele o taimi, a le fiafia va’a nei i tulafono ma fa’aiuga a le Coast Guard, ona o lea e saili isi Vaega Tosova’a e lipea ai a latou va’a, ae o lo o matou taumafai pea i se auala e foia ai lea fa’afitauli,” o le saunoaga lea a Moefa’auo.