O se tasi o mafua’aga ua taua i su’esu’ega e ala ai ona tele a’afiaga i le sami ma a’afia atu ai ma le soifua lelei o le tagata soifua, e mafua mai i gaioiga o lo o fa’atinonina e tagata i aso fai soo, lea e maua ai le ea leaga ma a’afia ai le ola lelei o meaola o loo nonofo i le sami.

O se vaega lea o le mataupu sa fa’asoa e le susuga a Dr. Tommy Moore, mai le Ofisa o le Siosiomaga a le Pasefika i Samoa (SPREP), i le aso lona lua o le fonotaga lona 28 a le Pasefika, lea o lo o fa’agasolo i le Fale Laumei i le vaiaso nei, ina ua ia saunoa e fa’amatala itu e lelei ai le soifua lelei o le tagata i suiga o le sami ma le ea, atoa ai fo’i ma itu e aafia ai le soifua o tagata.

Na taua e Moore i lana saunoag e fa’apea, o meaola uma o loo nonofo i le sami, e fa’amoemoe lo latou ola lelei i mea uma e maua i le sami, e fa’apena fo’i i le tagata, e fa’amoemoe lona soifua malosi i mea e maua i le siosiomaga, e aofia ai le ea ma meaai e fa’aaogaina.”

“Afai e oona le sami, o le a mamate ma le ola lelei meaola e pei o i’a, ‘amu, limu ma isi lava meaola uma e maua i le sami, e fa’apena fo’i i le tagata, a leai se ea ua le mafai ona manava le tagata,” o ulua’i vaega ia o le folasaga a Moore.

O lapisi e susunu ma alu lo latou asu i le ea, o le manogi e maua mai i fale gaosi oloa eseese i le atunuu, ma soo se gaioiga e faia e le tagata soifua i luga o le eleele, e aafia ai fo’i le ola lelei o meaola i le sami, e pei ona taua e Moore.

Na taua e Moore e fa’apea, afai e lafoa’i e le tagata lapisi e le mafai ona pala i le eleele, e uma ane le isi masina ua oo le lapisi lea i le sami, ona pagatia ai loa lea o le ola lelei o meaola o loo nonofo i le sami.

“Afai e tia’i se pepa iila i le palapala, e mafai ona tafea i le vai lea pepa iila ma oo atu ai i le sami, ona alu lea ua taai i le tino o le ‘amu, ma pe ai le amu, ma le maua ai se nofoaga e nofo ma ola ai le i’a o loo nofo i le sami,” o le isi lea auala na fa’apupula e Moore e a’afia ai le soifua fa’alenatura o le sami.

“Afai fo’i e susunu e le tagata le lapisi ma alu lona ea i luga o le vanimonimo, o le a fesoasoani le ea leaga lea i le faaleagaina o le soifua maloloina o le tagata, ina ua oona le ea e manava e le tagata,” o le isi lea saunoaga a le ali’i faiaoga.

I le tele ai o atumotu o le Pasefika e fa’alagolago lo latou tamaoaiga i le sami, na taua ai e Moore e fa’apea, afai e fa’aitiitia i’a i le sami e mafua mai ina ua leaga ‘amu e nonofo ai, lona uiga ua a’afia fo’i le soifua o le tagata.

O le fautuaga mai le susuga a Moore, o le fautuaina lea o sui usufono uma ina ia fa’amalosia i o latou atunuu ma siosiomaga le tatau lea ona galulue faatasi tagata uma, e fa’atino galuega lelei e fesoasoani ai i le toe fa’afo’iina mai o le olaga faalenatura i le tulaga lelei sa i ai.

“Ia fa’aitiitia lapisi susunu, aua ne’i toe lafoaia lapisi i le siosiomaga, teuteu fa’amama le sami ma taofia loa le toe faatamaiaina o nofoaga e nonofo ai manulele ma i’a o le sami, ina ia maua e le siosiomaga se olaga faalenatura mama e pei ona maua i le selau ma selau tausaga ua mavae,” o le fautuaga mulimuli lea a le susuga Moore.