Ua taoto atu nei i se fa’aiuga a ali’i ma tama’ita’i iloiloga tulaga o le fa’amasinoga autu a le susuga a Samuel Wright, i le mae’a ai lea ona fa’afofoga o le fa’amasinoga atoa ai ma le vaega iloilo iuga i fa’afinauga fa’ai’u a itu e lua o lenei mataupu, lea na tu’uina atu i le taeao ananafi i le mae’a ai lea ona valaau o le molimau e tasi a le itu tete’e i luga o le nofoa molimau.

A o le i valaau e le loia a Wright ia Michael White le ali’i e to’atasi e molimau mo le latou itu, e lua ni talosaga na tu’uina atu i luma o ali’i fa’amasino mo sa latou fa’aiuga.

O le talosaga muamua na fa’aulu e le itu a le malo, ina ia aofia i totonu o a latou mau fa’amaonia ripoti e fa’atatau i le talaaga o le ali’i o Wright mai le taimi na ta’usala ai o ia i le setete o Hawaii i le tausaga e 1992 i le moliaga o le auai i se osofaiga fa’a faomea e fa’aaoga ai a’upega mata’utia.

Na finau le loia a le malo ia Russel Smith i luma o le fa’amasinoga e fa’apea, o le taua o le ripoti e fa’atatau i le solitulafono lea sa ta’usala ai Wright i Hawaii, o le a mafai ai ona fesoasoani i le malo i le fa’amautuina o le latou mau ina ia nofosala le ua molia i moliaga o lo o tu’uaia ai o ia i le taimi nei.

O Wright o lo o tu’uaia i moliaga o faomea i le tulaga muamua, gaoi, talepe fale fa’apea ai ma le umia fa’asolitulafono o se a’upega.

Ae na taua e le loia a Wright ia White e fa’apea, e le tatau ona aofia le talaaga o solitulafono a Wright i lana mataupu fou lea o lo o fa’amasinoina ai o ia i le taimi nei, ona ua silia ma le 5 tausaga talu ona tuana’i lea solitulafono.

I le mae’a ai ona silasila o ali’i fa’amasino i le tulafono atoa ai ma fa’afinauga a itu e lua, na latou teena ai loa le talosaga a le malo ina ia aofia faamaumauga o le solitulafono tuai a Wright i mau fa’amaonia o lana mataupu o lo o fa’amasinoina nei.

O le talosaga lona lua na tu’uina atu i luma o le fa’amasinoga, o le talosaga a le itu a Wright ina ia solofua le moliaga lona fa o lo o i le pepa o tagi sa fa’aulu e le malo, le moliaga o le umia fa’asolitulafono o se a’upega, ina ua le mafai lea e le malo ona latou fa’amaonia i luma o le vaega iloilo iuga o ni mau e lagolagoina ai lea solitulafono.

E ui sa finau le malo ina ia fa’atumauina pea le moliaga lea fa’asaga ia Wright, ae na talia e le fa’amasinoga le talosaga a le itu tete’e, ma faia ai loa le fa’aiuga ina ia fa’aleaoga le moliaga lona fa.

O le molimau e to’atasi na valaau e le malo, o se ali’i Asia e suafa ia Moner Que, o se ali’i e aulotu ma Wright.

Na taua e Que i lana molimau e fa’apea, o le ali’i ua molia latou te fa’aigoaina lava o ia i le latou aulotu o “Brother Sam”, o ia o se ali’i e fa’amaoni ma lagolago i soo se gaioiga a le aulotu e fai.

Mai tausaga e tele talu ona latou aulotu ma “Brother Sam”, e tumau lava le auala e teuteu ai lona lauulu, e oti fa’apupu’u ae leai se taimi e fa’auumi ai pe fai fo’i se fili umi i le pito i toa (long hair tail).

Na taua e se tasi o molimau a le malo, o le tagata lea sa ia vaaia i le po na osofa’i ai le faleoloa o le Gold Conda i le masina o Me 2014, e fai lana ‘hair tail’ umi i le pito i tua.