Ua fa’aalia e le Faiaoga o le Au Siisii Uamea Mamafa a Amerika Samoa ia Alo Lopesi Fa’agu lona fa’afetaia o le tapuaiga fa’apea ai ma le nonofo tatalo a le atunu’u atoa, ao alo atu ai tama fanau a le atunu’u i ta’aloga a le Pasefika o lo o fa’agasolo i Papua Niu Kini i le taimi nei.

“E le faigofie ia te a’u le tapuaiga a le atunu’u, o le mea lea Amerika Samoa, fa’afetai atu mo le nonofo tatalo fa’apea ai lau tapuaiga, o le a se malosi ua oo i ai taumafaiga a alo ma fanau, ua pau lava o se mea ua mafai,” o le saunoaga lea a Alo i se fa’atalatalanoaga ma le Samoa News i le nofoaga autu o loo api ai ‘au ta’aalo uma a le Pasefika.

O le aso ananafi na tuua ai e le Au Siisii Uamea ia Papua mo le malaga i Amerika Samoa, lea e faamoemoe o le itula e 4 i le afiafi nei e taunu’u ai i Tafuna.

Ua talosagaina le atunu’u faapea uo ma aiga ina ia i ai i le malae va’alele mo le fa’ataliina o tama fanau a le atunu’u sa fai ma ave fu’a a Amerika Samoa i ta’aloga a le Pasefika.

E pei ona silafia, e 8 pine lea ua manumalo ai le Au Siisii i ta’aloga a le Pasefika i lenei tausaga. E aofia ai le pine auro e tasi lea na manumalo ai le tama’ita’i o Orepa R. Talo; pine siliva e lua lea na manumalo ai Jenade F. Ausaga ma Talo, ma pine apa memea e 5, lea na maua e Malaki Antonio Sitagata le tasi ae fa na manumalo ai ia Tanumafili Jungblut.

Ina ua fesiligia e le Samoa News ia Alo i le tulaga sa i ai taumafaiga a alo o le atunu’u mo ta’aloga i lenei tausaga, sa taua ai e le ali’i faiaoga e fa’apea, e le faigofie le ta’amilosaga sa alo atu i ai le Au Siisii a le atunu’u, ona o lea na tu’u fa’atasi e le Asosi Siisii a le lalolagi le ta’amilosaga a le Oceania faapea ai Ta’aloga a le Pasefika.

“O se ta’amilosaga pito sili lenei ona faigata ma finau lona fa’atulagaina, ona o lea ua tu’u fa’atasi e le Asosi a le Au Siisii i le Pasefika le ta’amilosaga o le Oceania atoa ai ma ta’aloga a le Pasefika, ma ua tula’i mai ai le maualuga o le tulaga ua ausia e le ta’aloga siisii uamea mamafa i le Pasefika,” o le saunoaga lea a Alo.

Ina ua fesiligia le ali’i faiaoga i le tulaga sa i ai taumafaiga a le au siisii a le atunu’u, na saunoa le ali’i faiaoga e fa’apea, e maoa’e le tulaga sa mafai ona ausia e le au siisii a Amerika Samoa, fa’atusatusa i le tele o isi atunuu o le Pasefika sa tausinio fa’atasi ma Amerika Samoa i lenei tausaga.

“O le ‘au a Amerika Samoa lea na aumai, o le ‘au e le’i leva ona koleni, e fou fo’i i latou, o le to’atele o i latou o le taimi muamua lenei fa’atoa tausinio ai i ni tauvaga tetele fa’apenei, e ese mai ai ta’aloga lava ia a le Oceania, ae o le tulaga lea ua latou ausia, e maofa ai le loto,” o le saunoaga lea Alo.

Na faamanino atili e le alii faiaoga e fa’apea, o ni isi o sui o le au siisii fa’atoa ta’i tasi tausaga talu ona koleni, o isi fo’i ua tusa ma le tausaga ma le afa talu ona koleni, peita’i a fa’atusatusa i le tulaga lelei ma le maualuga ua oo i ai taumafaiga a isi au siisii i le Pasefika e aofia ai ma Samoa, o iina e iloa ai le maualuga o le tulaga ua oo i ai taumafaiga a alo ma fanau.

“E ui e le’i tofu pine uma le au siisii na malaga mai, ae o le taua o le tauvaga lenei i lo’u loto, ua mafai e le tama ma le teine siisii ona vaavaai i auala e fa’aleleia atili ai lana taleni i le lumana’i, ma ou te iloa fo’i, o le a sili atu le tulaga e ausia e le au siisii a Amerika Samoa pe a oo i Ta’aloga lona XVI a le Pasefika lea o le a talimalo ai Tonga i le tausaga e 2019,” o le saunoaga lea a Alo.

“O lo o aga’i pea i luma le malosi o loo i ai sii a le tatou ‘au, ma e i ai le talitonuga o le isi fa tausaga o loo lumana’i, o le a sili atu le mea e gata mai ai le latou mafai,” o le isi lea saunoaga a Alo..

Na faafetaia e Alo le tapuaiga a le atunu’u, aemaise ai fo’i o le latou fesoasoani i le taimi na fa’agasolo ai sailiga tupe a le Asosi Siisii, lea sa mafai ai ona fa’atino manaoga a le au ina ua malaga mai i Papua.

“O le isi tapenaga lea o le a sosoo nei, o le sauniuni atu lea mo ta’aloga a le Oceania e faia i Fiti i le 2016, ma ua fa’amoemoe e le tatau fo’i ona matou nofonofo seiloga e oo i le taimi o le tauvaga, ae o le a fai sina malologa puupuu a le au siisii, ona alo atu loa lea mo a latou tapenaga,” o le saunoaga lea a Alo.

E pei ona silafia, e 6 pine na manumalo ai le au siisii a Amerika Samoa, i le ta’amilosaga a le Oceania sa faia i Niu Kaletonia i le 2014, lea e aofia ai le pine auro e tasi na manumalo ai fo’i Talo, e lua pine siliva ma pine apamemea e 3.