Ads by Google Ads by Google

Alo Maia: Tatou Talimalo Fiafia - Tausala o le Pasefika

Ua iloga mai ua toe o se ana ona talimalo lea o Amerika Samoa ma le tausala ia Arrielle Malota i Tausala Lalelei o le Pasefika e to’a sefulu o le a tausinio mo le tofi o le Tausala o le Pasefika 2012-2013, ae maise le Tausala Lalelei o le Pasefika 2011-2012, o Alisi Rabukawaqa mai le Malo o Fiti.

O tama’ita’i o le a faimalaga mai e tauva i lenei tausaga, o le a aofia ai le tausala mai Papua Niu Kini: Ms Ruby Anne Laufa e na’o le 20 tausaga le matua. O le tausala lalelei mai Solomona Stephanie Prince e na’o le 21 tausaga le matua. O le a o’o mai fo’i le tausala lalelei mai Aotearoa Niu Sila o Marlena Martin e 24 tausaga le matua. Ua fa’ailoa mai e o’o mai le tausala lalelei mai Tonga o Ebony Nuku e 24 fo’i tausaga o lona matua. O le tausala lalelei mai Sisifo o le Atu Samoa, o Janine Tuivaiti e na’o le 20 ona tausaga. O le tausala o tagata Samoa o lo o aumau i Hawaii, o Joy Saleapaga. O le tausala lalelei o Tokelau, o Peki Teata, ma le tausala lalelei o le Atu Kuki o Kate Ngatokorua, 22 tausaga le matua. O le tamaitai o Drue Slatter o le a avea ma sui o le malo o Fiti ma le tausala a Amerika Samoa, o Arielle Maloata mai Malaeloa.

I le matau atu i le lisi o tausaga o tama’ita’i tauva, ua iloga ai e laititi ai lava le tausala mai Fiti e na’o le 19 tausaga le matua. Ms Drue Slatter, ae fa’atolu ona manumalo lenei tama’ita’i i tauvaga tausala i Fiti ae fa’ato’a manumalo ai i le tauvaga a le Ms Hibiscus i lenei tausaga ma ia maua ai le avanoa lenei mo le “Ms. South Pacific 2012.”

O le manulauti o lenei tauvaga, ua fa’aautuina o “Oa Natia o le Pasefika” ma o lenei faamoemoe, o le a faia i le Aso Toonai, Tesema 8, 2012 i le Fale Laumei po o le H. Rex Lee Auditorium, i Utulei.

  O le lona 26 a’i nei o tausaga o lenei tauvaga ae o le lona lima ai lea o tausaga o talimalo Amerika Samoa,  ae o le ulua’i Ms South Pacific na maua lea e le tausala a Amerika Samoa, o Juliette Spencer-Sword i le tauvaga sa faia i Samoa.  O ni isi o a tatou tausala sa mafai ona ausia lenei lava tofi, na aofia ai Leilua Stevenson, Rochelle Tuitele-Reid ma le tamaitai o Lupe Aumavae-Tauanuu.

O le fa’ai’uga o lenei vaiaso o le a amata taunuu mai ai malo fa’aaloalogia o si o tatou atunuu, ma o ni isi o polokalama faatulagaina mo i latou, o le a aofia ai sa latou asiasiga e i ai le potu talavai mo Fanauiti i le falema’i tele i Faga’alu, le nofoaga e tausia ai e matutua ma gasegase i Fatuoaiga. E le gata i lea o se fa’aaliga solo taavale teuteuina, e ui ina ua fa’aalia mai e le Ofisa Turisi a lo tatou atunu’u, e na’o le lua Ta’avale Teuteuina ua i ai, ae ua na’o ni nai aso, ona faia lea o le fa’amoemoe.

Ae o lo ua logotala, o lo’o fia maua le fesoasoani mai a le mamalu i Sosaiete Tuma’oti, Ekalesia lototetele ma le loto fesoasoani, ae maise ni Kamupani o lo’o autasia o latou aufaigaluega, ina ia latou ofo mai mo ni ta’avale teuteuina ae a le solo fa’aaloalo mo nei Tausala Lalelei o le Atuvasa o le a tatou talimalo ai.

Ua fa’ailoa mai e na’o le lua Ta’avale Teuteuina ua i ai, ae ua na’o ni nai aso, ona faia lea o le fa’amoemoe, peita’i, e mo’omia e le Komiti o le Miss South Pacific lau fesoasoani i lea itu.

Ua mae’a le gasea o le Malo, ua mae’a totofi mai lagi ta’ita’i fou mo la tatou folauga i le tausaga fou, e le te’ena e o tatou tagata lautele, e sapaia fa’afatueleele ma le agaga fa’afetai le tofiga, ae tatou te iloa e so’o se folauga e i ai aso e amatalia ai, ae i ai fo’i aso e muta ai.

Alo la’ia i ai Amerika Samoa fai le mea sili e fa’ailoa lou loto nu’u, ma lou fai mea lelei, ae maise lou talimalo lelei, fa’amatagofie ou gataifale ma ou tuamaota, se’i maimoa i ai tausala o le Alamoana.