O se tasi o alo  o le atunu’u o lo’o a’otauina i tomai eseese fa’apea ta’aloga i le Iunivesite o Uosigitone, o Jazmine Davis, ua ta’uta’ua ai le igoa o Amerika Samoa i le ta’aloga Pasiketipolo a Tama’ita’i. O ia o se alo e fa’asino ia Easter Fa’asefulu Togia’i o Tula ma Oliver Davis II i San Diego, Kalefonia.

Mai lona tausaga amata a’oga ma ta’alo pasiketi ai i le Inivesite na siamupini ai loa lana ‘au, e o’o mai i lona toe tausaga lenei, ua le se’ia e se isi ‘au lea manumalo. O le ta’amilosaga lea e fa’aigoaina o le Pac 12 a Iunivesite ma Kolisi i Amerika.

Ua tele tusitusiga ma fa’asalalauina i totonu o Uosinitone ua fa’ailoa ai le malosi, atamai ma le sogasoga o  Davis i le pasiketipolo.

Faailoa mai e Davis i le Samoa News, lona naunauta’i ma le usita’i i fautuaga a lona tina matua, Elisapeta Pua’atu’ua Togia’i, na fai i lona tina o Easter Togia’i - Davis, peita’i ua fa’amalosi’au atu ai fo’i lona tina ia te ia, “Afai e mafai e se tasi ona fai, aisea o le a le mafai ai fo’i e oe? Tau ina ia manatua lou Atua i au taumafaiga uma.”

I totonu o lana a’oga, i taimi uma e mafuta ai ma lana au pasiketipolo, ua fa’ailoa mai e Davis, “Ou te fa’amanatu i la’u ‘au o a’u o le Toa, [e fa’asamoa lava i ai], latou te le’i malamalama, ona ou fai lea i ai o a’u o le ‘Warrior’ mai Samoa.”

“I totonu fo’i o le a’oga, e sulu lava lo’u ie solosolo ma fai o’u silipa e pei lava o lo’o ou ola i Samoa, o se mea patino lea e feso’ota’i ai a’u ma lo’u tupu’aga, ae maise lo’u tina matua pele ia te a’u o Elisapeta,” o sana tala lea e tusa o lona lagona i lona toto Samoa.

Ina ua fesiligia i sona lumana’i, sa ia tali mai, “Afai ae mae’a ona tausinio e avea a’u ma Toa Samoa e ulufale i le Women’s National Basketball Association, ona ou taliu mai lea, ou te fia a’otauina lo’u tagata i tomai o lo’u tina matua, ou te fia avea ma Tausima’i Pasi e tausia gasegase o e uma o lo’o mo’omia la’u tausiga.”

“Ou te fia fa’aauau i tiute o si o’u tina, fa’apea fo’i si o’u tina matua o Elisapeta, ao ia fo’i sa la’ua amatalia se pisinisi o Ta’avale La’u Pasese, Continental Transport Coporation i Fogagogo ma EastLand Market, se faleoloa o lo’o tumau pea i le taimi nei.”

Ina ua fesiligia pe ua o’o mai ma soifua i Samoa, ae talanoa mai Davis, “O lo’o ua tele taimi ou te alu atu ai i taimi o tu’uaga umi o le tausaga a’oga, tausi ma fai se fe’au i si o’u aiga, a uma ona asiasi lea i Samoa ma nofo ai i le Tanoa Hotel.”

“O se meaalofa sili lena na ou maua mai lo’u fa’au’uga, ina ua ave a’u e o’o matua i Apia, ma maimoa fo’i i le lalelei o lena itu o Samoa atoa. Ua atili ai ona fa’aosofia o’u lagona lotonu’u, o a’u o le Toa mai Samoa.”

O matati’a ua sopo’ia nei e Jazmine i lana Iunivesite i Uosigitone, ua aofia ai le 4 tausaga o avea pea o ia ma tama’ita’i ta’alo i le Pac 12 i lana a’oga, e le gata i lea, ae ua 4 fo’i tausaga soso’o o lo’o latou umia pea le siamupini. O lana ‘au o le Huskies ua aisilia ai nei o ia 2,188’ai na ia maua ae na’o le 5futu 7inisi lona umi.

“I lo’u olaga o se tasi e tupuga mai Samoa, ou te fiafia lava e fa’ailoa o ‘au o le Toa, o lo’o tau fo’i i lea taua i fa’agatama, ia avea a’u o se ta’ita’i lelei i la’u ‘au i totonu o le ta’aloga po’o taimi fo’i i fafo o le malae,” o lana tala lea.

O lana fa’amalosi’au i lana ‘au pasiketipolo, sa ia fa’ailoa mai, “O le Toa e le fa’apea e fia tagata leaga ai, ae ia e iloa, e ao ina e finau ma tauivi ia e manumalo. Amata mai le potu a’oga, ia lelei togi, ia manumalo i mea lelei uma, ae ‘aua lava ne’i galo ia te oe le Atua e ogatotonu i ai au taumafaiga uma.”

“A i ai fo’i la se fautuaga ou te fia fa’ailoa atu i le tupulaga talavou o le tatou atunu’u, e tasi lava, e pei ona pasi mai e lo’u tina ia te a’u lenei fautuaga, e fa’apena fo’i ona avatu, Afai e mafai e se tasi ona manumalo, aisea o le a e le mafaia ai,” o lana tala lea.