... o le tautua

Na aloaia e le malo i le aso Faraile na te’a nei e ala i meaalofa ma faailoga taualoa, tautua a ni isi o ana tagata faigaluega ua tele tausaga o le latou tautua i totonu o matagaluega ma ofisa a le malo.

Na mua’i faia le tula’i fa’aaloalo mo ni nai minute e aloaia ai soifua o tagata faigaluega ua maliliu, ao tolaulau e le susuga a Sonny Thompson suafa o i latou ua fai i lagi le folauga, e le gata i afioga i Senatoa e aofia ai ma le afioga i le alii senatoa ia Faumauina Tagisiaalii lea na tuumalo i le vaiaso ua te’a, ae sa aofia ai ni isi sa galulue i le vaega faamalosi tulafono, e aofia ai le sa avea ma Teutupe a le malo ia Dr. Falema’o Phil Pili.

Mo i latou na aloaia tausaga o a latou tautua i le malo, e aofia ai le susuga a James Taylor mai le Ofisa o Fesootaiga a le malo (ASTCA) lea e 58 tausaga o lana tautua, o le faletua ia Avei Sunia Pou lea ua atoa le 51 tausaga o lana tautua i le falema’i o le LBJ, o le tamaitai faiaoga ia Asolelei Tanu mai le Ofisa o Aoga ua atoa le 42 tausaga o lana tautua, ma le susuga ia Ulugaono Waldie Allen ua 41 tausaga o lana tautua.

O le aso Faraile lava fo’i na te’a nei na aloaia ai ma le malolo litaea o le susuga a Ulugaono, e pei ona fa’alauiloa aloaia e le Fa’atonu o le latou matagaluega ia Thompson.

E malolo litaea Ulugaono o lo o ia umia le tofiga o le Sui Fa’atonusili o le Matagaluega o Tagata Faigaluega a le malo.

O le faailoga taualoa mulimuli na tuuina atu lea i le susuga a Mautonu Seui Jr, o se tagata faigaluega mai le Ofisa o Galuega Lautele a le malo i Tafuna, i le atoa ai o le 26 tausaga o lana tautua talu mai le tausaga e 1988.

Saunoa le tamaitai fa’atonusili o lea matagaluega ia Faleosina Voigt e fa’apea, o le susuga a Seui Jr, o se tagata faigaluega e galue malosi toe galue fa’amaoni i le fa’atinoina o le galuega na tofia o ia e galuega ai.

Mo se fa’ataitaiga o lana saunoaga na ia taua ai e fa’apea, o taimi uma o aso taitasi e vaaia ai le mama o totonu o le ofisa, faasolo atu i le fale taele e mama mea uma, o iina e atagia mai ai le ituaiga tagata faigaluega e i ai Seui Jr.

O fa’ailoga na tuuina atu i tagata faigaluega na aloaia tausaga o a latou tautua, na saunia lava e matagaluega o lo o galulue ai i latou nei.

Saunoa le susuga Thompson e fa’apea, o le agaga o le alii kovana ma le faigamalo, ia mafai ona aloaia tautua a tagata faigaluega i le malo ma kamupani tua, ina ia momoli atu ai i tagata faigaluega le feau, o lo o amanaia e le malo la latou tautua i aso uma.