Ua sauni le malo e aloaia le tautua a tama ma tina matutua o le atunu’u, e ala i se sauniga fa’apitoa e faia i le vaiaso fou i le Maota o le Lee Auditorium i Utulei, ma tufatufa ai ni nai mea alofa ua saunia e le malo mo i latou i le Kerisimasi ma le Tausaga Fou.

Na fa’amaonia mai e le Fa’atonusili o le Ofisa o Tagata Matutua (TAOA) ia Ale Tifimalae i le Samoa News e fa’apea, o lenei polokalame na tauala atu i se fautuaga a le afioga i le ali’i kovana ia Lolo Matalasi Moliga, ina ia i ai se sauniga fa’apitoa e aloaia ai e le malo le tautua ma le sao a nai tagata matutua, ae taoto atu i lalo o le fa’atautaiga a lona Ofisa.

O le aso 10 Tesema, 2014, o le aso Lulu lea o le vaiaso fou i le itula e 8:00 i le taeao lea ua fa’atulaga e amata aloaia ai lenei polokalame, lea fo’i ua valaaulia uma ai tama ma tina matutua uma i le atunu’u, ina ia autova’a atu e molimauina lenei polokalame fa’apitoa o i latou.

Saunoa Ale e fa’apea, o lenei polokalame, o se tasi lenei o fuafuaga faataoto mamao a le ali’i kovana ua leva ona silasila mamao i ai, ona o le naunau lava e ave le fai mea sili i tama ma tina matutua o le atunu’u, e aloaia ai le latou tautua mo le atunu’u i tausaga ua mavae.

“O le finagalo moni lava o le ali’i kovana, e tatau pea lava i le malo ona ave le fa’amuamua ma le fa’aeaea i tagata matutua, o i latou ia sa galulue punoua’i i le asaina maia lea o le gasu o le taeao, aua se manuia o Tutuila ma Manu’a, e tatau fo’i la i le malo ona tali atu e tusa ai o lea tautua”, o le saunoaga lea a le ali’i fa’atonusili.

E tusa ai o le polokalame mo lenei fa’amoemoe e pei ona tapenaina e le Ofisa o le TAOA, o le sauniga lotu puupuu e tatala ai le polokalame ua sauni i ai le susuga i le Tiakono ia Malaki Timu, ona fa’asolo ai lava lea o le polokalame seia taunu’u i le saunoaga autu o le aso, lea ua tapena i ai le afioga i le alii kovana ia Lolo.

O le mae’a ai o le tatala aloaiaina o le fa’amoemoe, ona feagai ai loa lea ma Fa’afiafiaga Fa’aleaganu’u ua tapena i ai Tina ma Tama matutua ua lautogia mo le fa’amoemoe.

“O meaalofa ua saunia e le Ofisa i lea aso, e fa’apitoa lava mo Tama ma Tina matutua o le atunu’u, o le a tapenaina fo’i e le Ofisa se taumafataga mama mo lea fa’amoeome”, o le saunoaga lea a le tofa Ale.

Talu ai le polokalame faapitoa ua tapena i ai le malo mo tagata matutua, ua fuafua ai, o le a leai se taumafataga masani a tagata matutua e maua i le aso Lulu lea, ona o lea ua fa’atasi uma tagata matutua mo le polokalame fa’apitoa lenei, e pei ona fa’amaonia mai e le afioga i le ali’i fa’atonusili ia Ale.