O le agaga fa’afetai, meaalofa ma ta’aloga, o ni isi ia o auala na tapena e le malo e fa’ailoa ai lo latou agaga fa’afetai i le tautua a tagata faigaluega uma i Amerika Samoa, e tusa ai o lo latou sao i le atina’eina o le tamaoaiga o Amerika Samoa, lea na fa’ataunu’u i le malae o le Veterans Stadium i le aso Faraile na te’a nei.

Na faatumulia le malae i Tafuna i Ta’ita’i o le Tafatolu o le faigamalo a Amerika Samoa, tagata faigaluega a le malo, aemaise ai tagata faigaluega mai kamupani ma pisinisi tua, lea fo’i sa faia so latou sao i le fa’atauaina e le malo o le tautua a tagata faigaluega i le atunu’u.

Na tomua le polokalame i se sauniga lotu puupuu na saunoa e le ali’i Faifeau, susuga Rev. Asiata Fouvale mai le Ekalesia EFKAS a Matu’u ma Faganeanea, lea sa ia saunoa ai i le taua tutusa o le tautua a le tagata faigaluegag o loo galue i le malo, atoa ai ma le tagata faigaluega o lo o tautua i pisinisi ma kamupani tua.

Na taua e le ali’i Faifeau e fa’apea, tusa lava poo le a le ituaiga fa’atauva’a e galue ai le tagata faigaluega i pinsisi tua, kamupani ma le malo, ae afai e fa’amaoni i le fa’atinoina o lana pito laau, e fa’aeaina lena tagata e le Atua.