O le aso 5 Ianuari 2015 na aloaia ai ni isi o suiga tetele a le Matagaluega o Leoleo a le malo, aua lava le fa’aleleia atili o lana auaunaga i le atunu’u, e pei ona taua e le Ta’ita’i Leoleo ia Tauese Va’a Sunia, o ia fo’i lea na sainia le poloaiga e fa’amaonia ai suiga e pei ona faia nei.

O ni isi o ia suiga e aofia ai le aveese mai o Cpt. Pou Supapo mai lana galuega o lo o galue ai i le taimi nei i le Ofisa o Leoleo i Tafuna, ae ua toe tofia nei o ia e toe fa’aauau lana tautua i le vaega o le Internal Affairs Unit a le ofisa o leoleo.

O lea suiga e pei ona saunoa Tauese, o le a taofia ai ni fete’enaiga e tula’i mai pe afai e su’esu’eina mataupu a matagaluega ta’itasi i totonu lava o le Ofisa o Leoleo.

O Lt. Ruta Letuli lea ua tofia na te vaaia le ofisa o leoleo i Tafuna mo se taimi le tumau, o fa’atonuga fo’i o lana auaunaga o le a tu’uina atu e Tauese.

O le isi suiga  o le aveese mai lea o Lt. Siaosi Aiono mai le galuega sa galue ai, o le fa’auluulu lea i ai o le vaega a le Traffic Division, ae o le a ripoti sa’o atu o ia i le ali’i kapeteni o Cpt. Lima Togia i le Ofisa autu o Leoleo i Fagatogo, mo le tu’uina atu o fa’atonuga mo ia i so o se aso.

O le alu ese mai ai o Lt. Aiono mai le tulaga sa galue ai, ua faia ai loa le isi suiga i le aveese mai lea o Lt. Tolia Solaita mai le vaega o lo o galue ai i le Ofisa o Leoleo i Tafuna, ae ua tofia o ia e fa’auluulu i ai le vaega a le Traffic Division i lalo o le fa’amalumaluga a Tauese.

O le suiga mulimuli e aofia ai le aveese mai o tama’ita’i leoleo su’esu’e e to’alua mai le Vaega o Leoleo Su’esu’e (CID) ia Vasa Wells ma Alisha Godinet, ae ua toe tofia e galulue i le vaega a le Patrol Division a le Ofisa o Leoleo.

O le tama’ita’i leoleo o Wells o lo o i lalo o le ta’ita’iga a Cpt. Togia mo le tu’uina atu i ai o ana fa’atonuga, ae o le tama’ita’i leoleo ia Godinet o le a i lalo o le va’ava’aiga  a Cpt. Paulo P. Leuma mo le tu’uina atu i ai o ana fa’atonuga.

“Ou te talitonu ma mautinoa o suiga nei o le a fesoasoani i le fa’aleleia o le tautua a le ofisa o leoleo i le atunu’u, e mana’omia ai lo tatou galulue fa’atasi i le fa’amalosia o nei suiga uma”, o le saunoaga lea a Tauese i le taimi sa ia sainia ai le poloaiga.