O ananafi na pasia ai e le maota maualuga a le Senate se latou i’gafono, e aloaia ai le soifua galue o le afioga i le ali’i senatoa ia Faumuina Tagisiaali’i, atoa ai ma le tu’uina atu o fa’amaisega i lona faletua ma le aiga, i le motusia fa’afuase’i o le mafutaga ma le tama o le aiga.

I se vaega o le i’ugafono a, o lo o taua ai le fa’avauvau o le atunu’u aemaise ai le itumalo o le Maoputasi, ona ua fa’ia se tasi o ona ta’ita’i sa tu’u atu lona soifua e tautua ai lona aiga, ekalesia ma tagata uma o Amerika Samoa.

O le afioga a Faumuina na tu’umalo i le masina ua te’a ina ua atoa le 70 tausaga o lona soifua, ma o lo o soifua mai pea lona faletua ia Jane Agnes Foster Faumuina, o ona alo e to’a 6 ma fanau a fanau e to’a 9.

A o le i avea Faumuina ma tasi auauna mo lona itumalo ma le atunu’u, sa a’oa’oina lona soifuaga talavou i le aoga a Malisi i Atu’u, sosoo ai ma le malaga atu i Samoa ma aoga i le Kolisi a Malisi Sagato Iosefo, ma toe taliu mai ai loa i Amerika Samoa nei ma fa’aauau lana aoga i le Aoga Maualuga a Samoana, ma fa’au’u mai ai i le tausaga e 1965.

O lana ulua’i galuega sa galue ai, o le avea lea ma failautusi mo le fela’uaina o oloa i totonu ma fafo o le atunuu a le kamupani a le Nupo mai le 1965-68, sosoo ai loa ma le faa faigaluega o ia e le kamupani a Leala i le 1972 na te vaaia uta ma pasese a le kamupani i feoaiga i le va o motu.

O lona tomai masani i le fa’atinoina o ituaiga galuega nei, na tofia ai o ia e le kamupani va’a la’u uta o le Polynesia Shipping e avea ma pule o le ofisa i le teritori mo le sefulu tausaga, (1973-83), seia oo ina avea o ia ma Pule Aoao atoa ai ma le tulaga o le Sui Peresetene mo le kamupani va’a a Leala mo le 17 tausaga (1984-2001).

A o galue ai o ia i galuega e pei ona taua i luga, sa lagona e Faumuina le musumusuga e tatau ona avea o ia ma faipule o lona itumalo i le Fono Faitulafono, o lea na ia tauva ai loa mo le tofi faipule a lona itumalo o le Maoputasi #9 i le 1971 ma manumalo ai, ma ia nofoia ai le nofoa o le itumalo mo nofoaiga sosoo e lua, amata mai i le 1971 e o o atu i le 1975.

Sa le i fesiligia lana auaunaga i totonu o lona aiga, nu’u ma le itumalo, ma fa’a suafaina ai loa o ia e lona aiga i le suafa o ‘Iulogologo’ i le 1994, ae o le tausaga e 1997 na tasi ai le aiga potopoto e fa’a suafa o ia i le suafa Faumuina.

A o le i tofia o ia e le itumalo o le Maoputasi e avea ma Fa’alupega mai le 2009 e o o atu i le 2012, sa ia umia le tofi Pulenu’u mo lona itumalo mo le 6 tausaga sosoo, ma, o lana tautua ma le tele o galuega lelei sa ia faia mo le itumalo na mafua ai ona tofia o ia na te nofoia le nofoa o le Itumalo i le maota maualuga i le 2013 mo le tofi Senatoa.

“E ui e le umi se taimi na tautua ai le afioga a Faumuina i le Senate, ae sa matua iloga lona fa’amaoni ma le le solomuli i le tauaveina o ona tiute”, e pei ona taua i se vaega o le i’ugafono a le senate.

Na tofia Faumuina e avea ma taitai o le Komiti o Aoga a le Senate, ae sa sui taitai i le Komiti o Fela’uaiga, Uafu ma Malaeva’alele, faapea ai ma le tele o komiti sa avea ai o ia ma totino e aofia ai le Komiti o Tulafono faapea ai ma le Komiti o le Paketi.

O lo o taua foi i le iugafono a le senate e faapea, o le afioga a Faumuiina, o se tasi o senatoa sa le utuva le auai i iloiloga a komiti eseese, sa matua fa’aalia foi lona naunau ma le loto fiafia e auai ma faasoa atu ona lagona ma manatu lelei, aemaise ai mataupu e pei o tulaga tau aoaoga, uafu, pisinisi ma mataupu e aofia ai le aganuu, ma o se senatoa fo’i e fa’agalo gata lana tautua i le maota maualuga.

I lana Ekalesia, sa avea o ia o se tagata lotu fa’amaoni i le Ekalesia Katoliko, e pei ona avea ai ma teutupe a le Puleaga Katoliko a Samoa Pago Pago mai le 1990 e o o atu i le 1992, ma o se auauna sa maoa’e lana tautua i le Ekalesia, o le a misia fo’i o ia e le to’atele.

E tele fa’ataitaiga lelei sa faia e le afioga a Faumuina e pei ona atagia i lona soifuaga tautua, ma o lona tuua o le malo, o se tulaga lea o le a matua misia ai o ia e lona aiga, nuu, itumalo ma le atunuu atoa.

O le po anapo na taunuu ai i fanua le Sa o le afioga i le alii senatoa ia Faumuina, ma ua mapu atu nei o ia i le maota gasegase o le LBJ i Fagaalu, e fa’atali ai ona sauniga fa’alemalo lea ua fuafua mo le aso Tofi o le vaiaso nei, ao lumana’i ai ona sauniga mulimuli i le aso Faraile e sosoo ai.

O le taeao nei lea ua fa’amoemoe e faitau ai i luma o le maota o sui lenei i’ugafono, a o lumana’i ai le tauaaoina atu i le faletua ia Jane Agnes, i le aso o le sauniga fa’alemalo e pei ona fuafuaina i le aso Tofi o le vaiaso nei.