Ads by Google Ads by Google

Aloaia tautua a nisi o ali’i ma tama’ita’i leoleo

O le taeao ananafi na aloaia ai e le Matagaluega o le Puipuiga o le Saogalemu Lautele tautua a ni isi o ali’i ma tama’ita’i leoleo, o lo o galulue mo le puipuia lea o le saogalemu o le atunuu atoa.

 

O se sauniga puupuu na faataunuuina i le potu fono a le Ofisa o Leoleo i Fagatogo na aloaia ai le tautua a i latou ua faamanuiaina i faailoga o Leoleo o le Kuata Muamua o le tausaga tupe 2014, lea e aofia ai le masina o Oketopa e o o atu ia Tesema 2013.

 

O le afioga i le Sui Komesina o Leoleo, o ia fo’i lea o lo o avea ma Komesina le Tumau i le taimi nei, le tofa Leseiau Laumoli na fai ma sui o le alii Komesina e faafetaia ali’i ma tama’ita’i leoleo sa faamanuiaina i lenei faamoemoe.

 

Saunoa Leseiau e faapea, talu ona amata mai le polokalame lenei a le Ofisa o Leoleo i tausaga ua mavae, e i ai alii ma tamaitai leoleo ua ta’i fa’alua pe faatolu fo’i ona latou maua faailoga faapitoa nei, ae i ai fo’i leoleo latou te le i ausia lava lenei tulaga maualuga.

 

“O le fesili la ua tula’i mai, aisea ua silia ai i le fa’atolu ona maua e le isi leoleo faailoga faapitoa nei ae le i maua lava e le isi leoleo,?” o le fesili lea a Leseiau. “E tasi lava le upu e faamatala ai, e mafua mai, e le o fa’amaoni le leoleo e faatino ona tiute.”

 

Na faamanino e Leseiau e faapea, e le o se manatu ina ia faavaivai ai lagona o isi leoleo o lo o taumafai e ausia lenei faailoga taualoa, ae o se lu’i mo alii ma tamaitai leoleo uma lava ina ia latou tausinio e ausia lenei tulaga maualuga, aua o galuega lelei nei e mulimuli mai mo i latou i le lumana’i.

 

Na taua e Leseiau e faapea, talu ona avea o ia ma leoleo a le malo, e le i faatasi lava ona ia talosaga i le Matagaluega mo se tofi (rank) e tuu atu mo ia, ae o tofi uma sa ia maua, o tofi sa tuuina atu e le Ofisa o Leoleo ia te ia.

 

“O la’u lu’i lenei mo outou uma o lo o i ai i le sauniga lenei, ua latalata mai le aso ou te alu ese ai mai le tofiga lenei (Sui Komesina), ae talu ona ou leoleo, ou te le i fesili lava i le ofisa o leoleo mo se tofi, a outou le faamaoni, tou te le oo mai lava i le tulaga lenei o le a ou tuua ae ou alu ese,” o le saunoaga faaiu lea a Leseiau.

 

O i latou la nei sa faamanuiaina i faailoga taualoa sa saunia e le Ofisa o Leoleo, mo le Leoleo o le Kuata Muamua 2014:  Vasega o Leoleo Su’esu’e - Det. Filemoni Amituana’i; Vaega Traffic Division - Officer Fale Mareko; Leone Substation - Officer Levi Tafaovale; Tafuna Substation - Officer Moeoge; Fagaitua Substation - Officer Mafina Sevaaetasi.

 

O le susuga ia Officer Leuma Puaauli na ia maua le faailoga o le Officer of the Year 2013 mo le Ofisa o Leoleo i Fagaitua.

 

Sa faapea fo’i ona aloaia ai ma alii Fuimu e to’afa ua ausia tusi pasi e avea ai ma alii Fuimu mo le vaega a le Fire Division, ina ua latou ausia aoaoga sa faia mo le umi e 180 itula, ma maua ai tusi pasi i le vaega o le ‘Basic Fire One Training’.

 

O i latou ia e aofia ai Fulu Thompson; Vaiaii Tagala; Setu Tusi ma Matamu Oti