E le fa’atafa le Road Marshall i le faatinoina o ona tiute na tofia i ai o ia e le kovana sili, atoa ai ma le faatautoina o ia e le Komesina o Leoleo na te faamalosia tulafono i taavale a le malo o lo o soona faaaoga e tagata faigaluega i taimi le tatau, e ala i le taofia o ta’avale na te maua o lo o faaaoga e aunoa ma e faatanaga, ona loka lea o le ta’avale ae faasavavali tagata faigaluega a le malo na malaga atu ai i le taavale.

O le vaiaso na tea nei na loka ai e le susuga i le Road Marshall ia Alu Fa’amasino ta’avale e lua a le Ofisa Loia Fautua mo Tagata Lautele ae faasavavali loia na o atu i taavale i o la aiga, faapea ai ma isi taavale e tolu na ia taofia i le aso Lulu na te’a nei ae faasavavali tagata faigaluega a le malo na malaga atu i ia ta’avale.

Na taua e le susuga Fa’amasino i le Samoa News e faapea, o mea e lua e mafua ai ona ia taofia se taavale a le malo pe a tuana’i itula faigaluega i aso taitasi, atoa ai ma le faaiuga o le vaiaso, pe afai e le o i ai se pemita e faataga ai ona fealua’i le ta’avale mo le 24 itula faapea ai le faaiuga o le vaiaso, atoa ai ma le leai o se tusi e faataga ai ona fealua’i le tagata faigaluega a le malo i lea ta’avale.

I le aso Lulu na te’a nei e pei ona taua e le susuga Fa’amasino i le Samoa News, na ia taofia ai se taavale a le Ofisa o Femalagaaiga ina ua siaki atu e leai se faatanaga e mafai ai ona faafoe e alii e toalua na malaga atu i le taavale lea taavale a le ofisa, ma ia faia ai loa le faaiuga e loka le taavale ae faasavavali ali’i faigaluega na malaga atu ai.

E faapena foi i isi taavale e lua a isi ofisa o le malo na ia lokaina, na faia ina ua siaki atu e leai se pemita e faataga ai ona fealuai le isi taavale ae o le isi taavale e leai se faatanaga e fealua’i ai.

E tusa ma le 10 taavale a le malo na siaki e le susuga Fa’amasino i le afiafi o le aso Lulu na te’a nei i le taimi o lana poloka i Malaloa ae na o le tolu taavale na ia lokaina.

I le vaiaso na tea nei, sa ia lokaina ai taavale e lua a le Ofisa Loia Fautua mo Tagata Lautele, ina ua leai se faatanaga e faafoe ai e le alii ma le tamaitai loia na malaga atu i taavale ia e lua taavale a le Ofisa.

“Ou te faamalumalu i le mamalu o tagata faigaluega a le malo o lo o aafia i taimi o a’u poloka ma siakiina o ta’avale, ae o le mea e fia faailoa atu, e mafua ona ou faia lenei tulaga ona o lo o faatino la’u galuega na tofia i ai a’u e le alii kovana, atoa ai ma le faatautoina o a’u e le komesina o leoleo mo le faatinoina o lenei tiute,” o le saunoaga lea a Fa’amasino i le Samoa News.

O le fautuaga a le Road Marshall i tagata faigaluega a le malo latou te faafoeina taavale a latou ofisa, ia mautinoa e i ai se faatanaga mai le faatonusili e mafai ai ona ia faafoeina se taavale a le malo, ma ia mautinoa foi e i ai se pemita e faataga ai ona fealua’i le taavale i le tuana’i ai o aso ma itula faigaluega, aua afai e leai, o le iuga e loka e ia le taavale ae faasavali le ave ta’avale.

O le vaiaso na tea nei na tuuina atu ai e le tofa Fiu Saelua lea o lo o faauluulu i ai tagata faigaluega a le Ofisa o le Kovana sili, sana tusi i Faatonusili o Ofisa uma ma Matagaluega a le malo, e faailoa atu ai ni isi o suiga ua faia e taofia ai le tele o talosaga e tuuina atu mo pemita faataga e faaaoga ai taavale a le malo, ma tapulaa ai le taimi e tatau ona tuuina atu ai ia talosaga i totonu.

Talu ai le tele o talosaga e tuu atu ae ua oo i le taimi e tatau ai ona faaaoga taavale, ua faatulaga ai e Saelua e faapea, soo se matagaluega a le malo e toe fia talosaga mo le fia faaaogaina o taavale a latou ofisa, e tatau ona tuuina atu a latou talosaga i totonu o le 48 itula, ae le mafai foi ona sili atu i le 5 aso le umi e talosaga ai se ofisa mo le faaaogaina o se taavale i le tuana’i ai o taimi ma aso faigaluega a le malo.

Saunoa le tofa Fiu e faapea, e ui o lea ua sologa lelei le faamalosia o le tulafono mo le soona faaaoga le tatau o taavale a le malo i le tuana’i ai o itula ma aso faigaluega a le malo, ae foliga mai o lo o maitauina pea ni isi o ofisa e tuai le tuuina atu o a latou tusi talosaga mo se faanataga e faaaoga ai taavale pe a tuana’i itula ma taimi faigaluega.

O se tasi o faafitauli e pei ona taua e Fiu ua maitauina, o le faatuatuai lea ona tuuina atu o talosaga ina ia mafai ai e tagata faigaluega ona maua taavale e o ma latou i o latou aiga.

“Afai o le tulaga lena, e le tatau ona faatonuina tagata faigaluega na e galulue ova taimi, aemaise ai lava e le o i ai se tulafono e talia ai ni itula ova taimi i le taimi nei,” o le saunoaga lea a Fiu i lana tusi.

“O se tasi o itu ua ou maitauina i le taimi nei, o ni isi o ofisa e faatali lava a latou talosaga faatoa tuuina mai ua latalata ina maea taimi faigaluega o le aso ae o isi taimi e te’a le 4:00 faatoa tuuina mai talosaga, ma le lava ai le taimi matou te iloiloina ai le manaoga e faatatau i le faaaogaina o taavale i le taimi e tuanai ai itula faigaluega a le malo,” o le saunoaga lea a Fiu.

O ni isi o faafitauli e pei ona taua e le tofa Fiu, o ni isi o ofisa o lo o latou tuuina atu talosaga mo le ta’i fa i le lima vaiaso e faaaoga ai taavale a latou ofisa i le maea o taimi faigaluega a le malo, ma le faamoemoe e faaauau pea ona tuuina atu lea talosaga i lea taimi ma lea taimi.

“Talu ai o mafuaaga ua ou taua i luga, e faamanatu atu ai e faapea, e tatau ona tuuina mai talosaga uma lava i totonu o le ofisa i totonu o le 48 itula po o aso faigaluega e lua ao lumanai le taimi e fia faaaoga ai le taavale, ae le sili atu foi i le 5 aso faigaluega le umi e faaaoga ai le taavale, o lea auala ua faia ina ia mafai ai ona fuafua tatau e ofisa taitasi le fuafuaga mo le faaaogaina o latou taavale,” o le saunoaga lea a Fiu.

Talu ona amata faamalosia mai e le kovana ma le faigamalo le tulafono fou e faatatau i taavale, ua silia i le 50 taavale a matagaluega ma ofisa eseese a le malo ua loka e le Road Marshall, ina ua maua latou te le o usitaia tulafono e pei ona tuuina mai e le kovana.