O le taeao ananafi na amata aloaia ai le polokalame a le malo, lea e maua ai e fanau aoga le avanoa e galulue ai i avanoa faigaluega fa’avaitaimi mo le tuuaga lenei o aoga, ina ia maua ai lo latou tomai i auala eseese e fa’atino ai galuega i totonu o le malo ma kamupani tua.

O se sauniga lotu pu’upu’u na fa’ataunu’uina i le Fale Laumei na tatala aloaia ai lenei polokalame taua, lea na fa’atumulia i fanau aoga e silia i le to’a 600 ua maua avanoa e galulue ai i le polokalame, o matua aemaise ai sui o Matagaluega ma Ofisa o le malo, fa’apea ai Kamupani Tumaoti ua sauni e ofo atu avanoa faigaluega mo fanau aoga.

Na fa’amamafa e le ali’i faifeau mai le Ekalesia EFKAS i Pago Pago ia Rev. Fa’atauva’a Talamoni i fanau aoga, le taua o le fa’amaoni i so o se galuega e tu’u atu e Ofisa po o Kamupani o le a latou galulue ai.

“O le fa’amaoni i mea itiiti o le mea lilo lena o le olaga fa’aeaina, afai fo’i e tu’uina atu se galuega fa’atauva’a ia te outou e fai, ia outou fa’atino i le loto fa’amaoni”, o le saunoaga lea a Rev. Talamoni.

Na taua e le Fa’atonusili o le Matagaluega o Tagata Faigaluega a le malo o lo o fa’atautaia lenei polokalame ia Sonny Thompson e fa’apea, o tupe uma e fa’aalu e le malo e fa’atupe ai polokalame mo fanau aoga i tausaga taitasi, o tupe alu aoga ia a le malo e tapena ai fanau aoga mo le ulufale atu i fale faigaluega.

“O le tiute o le malo, ia tapena avanoa lelei mo fanau aoga e fa’alautele ai lo latou iloa i auala e fa’atino ai galuega, ina ia mafai ai ona taunu’u le manu lauti a le malo, o tupulaga talavou o lo o i ai le lumana’i mo le atunu’u”, o le isi lea saunoaga a Thompson.

Na fa’afetaia e Thompson Matagaluega ma Ofisa uma a le malo ua mafai ona tu’uina atu la latou lagolago mo lenei polokalame.

Sa ia fa’afetaia fo’i sui o Kamupani tumaoti sa mafai ona fa’atasi atu, i avanoa ua mafai ona latou ofo atu e galulue ai fanau aoga i totonu o latou kamupani, atoa ai ma le fa’afetai i matua sa mafai ona fa’atasi atu e lagolago polokalame a fanau.

O le fa’afetai fa’apitoa a Thompson e fai ai o ia ma sui o le malo, sa ia fa’afetaia ai le Fono Faitulafono, ona o le avanoa na mafai ai ona latou pasia ai le pili tupe e $200,000 sa tu’uina atu e le faigamalo, e fesoasoani ai i le fa’atupeina o le polokalame mo fanau aoga.

“O le fa’anaunauga o le afioga i le ali’i kovana ia Lolo Matalasi Moliga ma le Lutena Kovana ia Lemanu Peleti Mauga, ia fa’aauau pea polokalame fa’apenei e fesoasoani ai i le unaia o fanau aoga ina ia fa’amasani latou i galuega i totonu o le malo ma kamupani tua”, o le saunoaga lea a Thompson.

E 8 vaiaso lea ua fa’atulaga e le malo e galulue ai fanau aoga mo le polokalame lenei, lea e silia i le 600 avanoa faigaluega ua mafai ona ofo atu e le malo mo fanau aoga, e pei ona saunoa Thompson.