O le ali’i lea sa avea muamua ma faiaoga i le Kolisi Tu’ufa’atasi (ASCC), lea o lo o tu’uaia i lona faia o uiga mataga i ni ali’i talavou se to’atolu e aofia ai ma le tu’uina atu o le ‘ava malosi ia te i latou, ua amata aloaia nei i luma o le Fa’amasinoga Maualuga lana fa’amasinoga autu.

O tu’uaiga fa’asaga ia James Barlow na afua mai i le fa’alavelave lea na tula’i mai i le masina o Oketopa 2011, i lona ave lea o pia i ali’i talavou e to’atolu o lo o a’afia i lenei mataupu, fa’amatamata i ata leaga, atoa ai ma lona faia i ai o amioga mataga fa’afeusuaiga.

O le ulua’i molimau na valaau e le malo i le taeao ananafi, o se tasi o ali’i talavou na a’afia i lenei mataupu, lea ua 17 tausaga lona matua i le taimi nei, ae sa 14 tausaga lona matua i le taimi tonu na tula’i mai ai le fa’alavelave.

Na taua e le ali’i i lana molimau tauto e fa’apea, i le aso 24 Oketopa 2011, sa alu ai e saili se tasi o ana uo e fesili i ai po o fea ua ave i ai lona mitiafu sa ia te ia, ae tau atu ai o lo o i ai lana uo ma le isi ali’i i le fale o Barlow, ma tauanau ai loa o ia e lana uo la te o i totonu o le fale.

Ina ua taunu’u i totonu o le fale, sa ia iloa ai o lo o inu  fagupia a Barlow ma ali’i e to’alua o lo o latou i ai, ona avatu lea ia te ia o se fagupia lapo’a ma inu ai loa, ae ua galo ia te ia po o ai na ia avatu le fagu pia ia te ia.

Na taua e le molimau le fai atu o Barlow ia te ia la te o i totonu o le potu moe, o iina na fa’atino ai e Barlow uiga mataga ia te ia, ina ua mae’a, sa tu’u atu e le ua molia le $5 ia te ia ma lana fa’aupuga, e aua ne’i ona ta’uina i se isi le mea sa tupu.

Ina ua fesiligia e le loia a le malo ia Tiffany Oldfield le molimau pe sa i ai se isi mea sa tupu ina ua uma ona fa’atino e le ua molia uiga mataga ia te ia, na tali le molimau, sa ia vaaia Barlow ma le isi ali’i i totonu o le potu moe, ma fa’atino ai uiga mataga, ona valaau mai lea o le ali’i o lo o i totonu o le potu moe ia te ia ma le isi ali’i o lo o la nofonofo i fafo o le potu malolo, la te o atu la te matamata i la mea mataga ma Barlow o lo o faia.

Ina ua fesiligia e Oldfield pe sa ia vaai i gaioiga mataga a Barlow ma le isi ali’i na a’afia sa faia, na tali le molimau, ‘ioe’.

Na taua e le molimau e fa’apea, pe tusa o le itula e 12:00 i le leva o le po, na latou o uma ai loa ma Barlow ma i latou e to’atolu sa i ai i le fale e fa’atau mai se sikaleti a Barlow i le faleoloa, ae maua ai loa latou e leoleo, ina ua tifa tifa solo le ta’avale a Barlow i luga o le auala, ma tau lavea ai le ta’avale a leoleo i luma o se faleoloa.

Na fesili Oldfield i le molimau po o ai o latou na loka e leoleo, ae ne tali le molimau, na loka uma lava latou e to’afa sa o i le ta’avale.

Na taua fo’i e le molimau e fa’apea, pe tusa o le itula e 10:00 i le po lava lea ina ua mae’a ona fa’atino e Barlow uiga mataga ia te ia ma le isi ali’i, na latou o ai i le faleoloa e fa’atau mai ni isi fagupia mo i latou, o Barlow na alu i totonu o le faleoloa ma fa’atau mai fagupia.

Ina ua fesiligia e le loia a Barlow ia Chris Lee le molimau pe sa i ai se taimi na ia tuua ai le fale o Barlow ina ua mae’a ona fa’atino e le ua molia uiga mataga ia te ia, na tali le molimau, e leai, sa latou eva ai lava i le po atoa ina ua uma ona fa’atino e Barlow uiga mataga ia te ia.

Sa ia taua fo’i i lana molimau, e ui lava sa niniva lona ulu i lana fagupia e tasi sa inu, ae sa mafai lava ona ia maitauina mea sa tutupu i le taimi na latou o ai e fa’atau mai se sikaleti, ma i’u ina taofia ai le latou ta’avale e leoleo.

E 19 le aofa’i o tu’uaiga ua faia e le malo fa’asaga ia Barlow, ma o lo o taofia pea o ia i le toese i Tafuna ina ua le mafai ona ia totogi le $100,000 na fa’atulaga e tatala ai o ia i tua.

O le afioga i le ali’i fa’amasino sili ia Michael Kruse o lo o gafa ma le iloiloina o le mataupu a Barlow, lea fo’i o lo o lagolagosua i ai afioga i ali’i fa’amasino lagolago ia Logoai Siaki ma Fa’amausili Pomele.