O ananafi na amata aloaia ai le fa’amasinoga autu o se ali’i o lo o tu’uaia e le malo i le moliaga mamafa o le talepe fale i le tulaga muamua, atoa ai ma isi moliaga mama e tolu, ma ua gafa nei ali’i e to’afa ma tama’ita’i e to’alima o le Vaega Iloilo Iuga, mo le iloiloina o mau faamaonia o lenei mataupu.

O isi moliaga o lo o tu’uaia ai Naseri Lemoa e pei o le fa’ao’olima i le tulaga tolu, inupia ae lei atoa le 21 tausaga, fa’apea ai ma le fa’aleagaina o meatotino a se isi tagata, na afua mai i le fa’alavelave lea na tula’i mai i le po o le aso 2 Oketopa 2013 i Ottoville, ina ua ia ulufale fa’amalosi i totonu o le fale o se aiga ma ia tago i le manava o se teineititi sa moe i luga o se nofoa i totonu o le potu malolo.

Na taua e le loia a le malo ia Tony Graf i lana ulua’i folasaga e fa’apea, na fa’ateia le aiga na a’afia ao momoe i totonu o le potu malolo o le latou fale pe tusa o le itula e 4:00 i le vaveao, ina ua ee le teineititi na moe i luga o le nofoa, ina ua te’i a o moe i le tago atu o se tagata i lona manava, ma vaaia se tagata o lo o tu i lona luga.

Na taua e Graf e fa’apea, na aapa atu le ali’i o Lemoa ma pupuni le gutu o le teineititi na ee i lona lima, ae fetaui ma le oo mai o le tina o le teineititi ma fesiligia loa o ia po o a ana mea e fai i totonu o le latou fale.

E le i umi e pei ona taua e Graf ae oo atu ma le isi tama a le fafine, ma ia taofia loa Lemoa e fa’atali ai le taunuu atu o leoleo lea ua latou fa’afeso’otaia.

Na taua fo’i e le itu a le malo e fa’apea, na ta’amilo solo le fafine e ana le fale i lona fia iloa pe na fa’apefea ona ulufale atu le ua molia i totonu, ma ia vaaia ai le screen wire o le faitoto’a e ui atu i le fale ta’avale ua sasae, atoa ai ma le fa’amalama e va ai le fale ta’avale ma le potu malolo, e le gata ua sasae le screen wire ae ua tatala ese fo’i fa’amalama sa i ai, ma o iina na ui atu ai le ua molia i totonu.

Na fa’ai’u le ulua’i folasaga a Graf i lona finauina lea o le vaega iloilo iuga, ina ia fa’afo’i atu le fa’aiuga e nofosala Lemoa i moliaga uma e fa e pei ona tu’uaia ai o ia e le malo.

Ae i le isi itu o le mataupu e pei ona finau ai le ali’i loia fautua o Douglas Fiaui o lo o tula’i mo Lemoa, o le mataupu e pei ona tu’uaia ai Lemoa e le malo, e autu i se ali’i talavou na matua ova le ‘ona ma ana fa’aiuga fa’avalevalea sa faia e aunoa ma ni fa’avae.

O Lemoa sa fai lana tagamea i le fale fai tagamea i le latou nuu i le po o le aso 1 Oketopa, 2013, e lei umi ae o atu ni ana uo ma tauanau o ia latou te o e inu le pusa pia o le Tausala lea na fa’atau atu e le isi a latou uo, ma ina ua uma le inuga i le po lea, na taape uma uo a Lemoa ae tula’i mai ai loa lagona le mautonu i le ali’i talavou, e le iloa pe fa’apefea ona alu i le fale o lea ua ova lona ‘ona, ina ne’i iloa o ia e lona tina ona sasa lea o ia pe otegia fo’i.

A o taumafaufau Lemoa i se tonu o le a fai e pei ona fa’amatala e lana loia, sa oso ae i lona mafaufau le tonu lona lua (plan B), o lona alu lea i le fale o lona aunty i Ottoville e moe ai mo le po, ina ia aua ai nei iloa o ia e lona tina sa ‘ona.

Fai mai Fiaui, e masani lelei lava Lemoa i le fale a lona aunty i Ottoville, sa latou fa’amuli ai ma lona tina mo le umi e masina atoa i le isi taimi, ao malaga lona aunty ma le latou aiga i fafo, e fa’atele fo’i ona o atu lona aunty i le aiga o Lemoa i Tafuna ma latou eva ai, latou te masani uma foi ma lana fanau.

Na taunuu le ua molia i luma o le fale ona ia tu’itu’i lea mo se taimi umi, peitai e leai se isi na tali atu, ae talu ai ua malulu le po ma ua manaomia fo’i e le ua molia le fia malolo, na ia sasae ai loa le screen wire o le faitoto’a o le fale ta’avale ma ulufale ai i totonu ina ia maua ai se vaega e malolo ai.

Na taunuu le ua molia i le potu malolo ma ia vaaia ai se teineititi o lo o moe i luga o le nofoa, e fou lana vaai i lea teineititi, e le i vaai muamua ai fo’i i le aiga o lona aunty, o lea na ia taumafai ai loa e fafagu i luga, ae na avea ma itu na ala ai i luga le teineititi ma ee, ma feala uma ai le aiga.

Na ioe Fiaui i luma o le vaega iloilo iuga, e le o tete’e le ua molia i moliaga mama e tolu e pei ona tu’uaia ai o ia e le malo, lea e aofia ai le inupia ae lei atoa le 21 tausaga, tago i le manava o le teineititi, atoa ai ma le fa’aleagaina o meatotino a le aiga o lona aunty, ae o le moliaga o le falepe fale, o lo o tete’e ai Lemoa ona o mafua’aga e fa’avae i le tulafono.

Na finau Fiaui e fa’apea, o le tagata na te fa’atinoina le moliaga o le talepe fale i le tulaga muamua, na te faia pe afai e ulufale fa’amalosi i totonu o se fale i se taimi o le po, ma le fa’amoemoe e fa’atino ai se solitulafono.

Fai mai Fiaui, e le i ulufale Lemoa i totonu o le fale a lona aunty ona o se manatu e fa’atino se solitulafono, ae na alu i ai ma le fa’amoemoe e malolo ma moe ai, ina ne’i fasi pe otegia o ia e lona tina i lona ‘ona.

O le afioga i le fa’amasino sili ia Michael Kruse o lo o iloiloina lenei mataupu, i le lagolago a afioga i ali’i fa’amasino lagolago ia Logoai Siaki ma Fa’amausili Pomele.