O le aso ananafi na amata ai le tautua fou a le kamupani va’alele mai Samoa, le Polenisia mo motu o Manu’a, e pei ona fa’amaonia mai e le afioga i le alii kovana ia Lolo Matalasi Moliga, i le aso na tatala aloaia ai le va’a fou o le Segaula lea ua fa’amoemoe e fealua’i i le va o motu o Manu’a.

Saunoa le alii kovana e fa’apea, o le amatalia ai o le auaunaga a le Polenisia mo Manu’a, o le a mafai ai ona tali tulaga pagatia ua tele tausaga o fetaia’i ma le itumalo i le tele o tausaga.

E tolu malaga i le vaiaso lea ua faafoeina e le Polenisia mo Manu’a - Aso Gafua, Aso Lulu ma le Aso Faraile.

Ae na taua e ni isi o le itumalo sa mafai ona fesiligia e le Samoa News e fa’apea, o le itu e pito sili ona taua o le a maua mai i le auaunaga fou a le Polenisia, o le a mafai ai ona maua fesoasoani mo ni isi o le itumalo e aafia i gasegase, ma ua manaomia le vave auina mai i Tutuila mo togafitiga.

“E faafetai i le faigamalo atoa ai ma le kamupani a le Polenisia, ina ua mafai ona a’e se tofa e tatala mai le latou auaunaga i Manu’a, o se fesoasoani sili lea mo le itumalo talu mai taimi e tele e lei toe lele ai se va’alele i Manu’a”, o le saunoaga lea a le tofa a Leau Nevile o Ofu.

O le masina na te’a nei na tuuina atu se talosaga a le Polenisia i le Matagaluega o Feoaiga a le fetarale (USDOT), mo se faatanaga e lele ai lana vaalele i Manu’a, ona o tulafono a le feterale e le mafai ai ona sese’e se isi kamupani va’alele ese i malae va’alele o lo o i lalo o pulega a le malo tele.

O lea talosaga mai le Polenisia sa lagolagoina e le malo atoa ai ma le Fono Faitulafono. Ma sa talia e le USDOT lea talosaga, e faafoeina ai e le Polenisia malaga mo Manu’a mo le 30-aso.

Saunoa le afioga i le alii senatoa ia Galea’i M. Tuufuli e fa’apea, o fuafuaga uma o lo o faia e le malo ma lagolago i ai le Fono Faitulafono, o le taumafai lea ina ia faaleleia tulaga o atina’e i motu o Tutuila ma Manu’a.

“E fa’afetai i le alii kovana ma le faigamalo i le manatu alofa i le itumalo o Manu’a, ma le tulaga pagatia o lo o fetaia’i ma i latou i le tele o tausaga, o se fesoasoani sili fo’i lea mo tagata faimalaga i Manu’a, i le maua o le avanoa e malaga ma vave taunuu ai i Manu’a po o Tutuila fo’i”, o le saunoaga lea a Galea’i ina ua fesiligia e le Samoa News e tusa ai o lenei tala fiafia ua maua e Manu’a.

Saunoa le alii kovana e fa’apea, o taumafaiga a le faigamalo mo Manu’a, o se auala ina ia mafai ai ona atina’e ma fa’aleleia motu o Manu’a, ina ia latou maua faamanuiaga uma o lo o maua e le motu o Tutuila.