I le fonotaga a le Asosi Kirikiti Fa’asamoa i Amerika Samoa, lea sa faia i le Potu Fono o le Maketi i Fagatogo, i le aso Faraile ua te’a, sa fa’atulaga ai nisi o latou mataupu e ao ina talanoaina ma fa’amautu mo le amataga o le Liki Kirikiti o le Vaiaso o le Moso’oi 2015.

O le vaiaso mulimuli o Oketopa ua faatulaga lea o le vaiaso Moso’oi i Amerika Samoa.

Na fa’alogoina le fiafia o sui usufono mai afio’aga e iva, o le a aofia i le liki Kirikiti  o le Moso’oi mo lenei tausaga. Ua mae’a fa’atulaga fo’i, e fa’atautai lua e le Asosi Kirikiti ma le Ofisa o Turisi a le malo lenei liki.

“O le fa’atautaiga o le liki Kirikiti lenei e faia lava e le matou Asosi Kirikiti Fa’asamoa, peita’i, o isi mea uma e tapena mai e le Ofisa o Turisi, aua o le ‘auga lea o le Liki lenei, o lo ua fa’atautaia mo le fa’amanatuina o le Vaiaso o le Moso’oi 2015.” O se saunoaga lea a le ali’i peresetene o le Asosi Kirikiti Fa’asamoa  So’oamali’i Sonny Lefaoseu.

O le laulauatofi o le Asosi Kirikiti sa ta’ita’ia le fonotaga ma fa’asolo maia fo’i mataupu e ao ina talanoaina ma fa’amautu. Mai le to’aiva o afio’aga ua i ai latou ‘au kirikiti e lua afio’aga ua ta’ilua a latou ‘au, Vaitogi ma Faleniu.

“O le tatou liki lenei, e se’i lava numera a ‘au ta’itasi ina ia fa’atulaga aga’i i ai ta’aloga i aso ta’itasi e faia ai. E le pei o le faiga o le liki kirikiti a le Malo si a tatou liki.” Ua fa’aalia fo’i le fiafia o sui o ‘au ta’itasi, ma fa’ailoa latou manatu, “Matua manaia, e tofu o’o uma lava ‘au e ta’a’alo ma isi ‘au, vaivai pe malolosi.”

Ona ua mae’a fo’i ona fa’atulaga ta’aloga a ‘au ua aofia i lenei liki, o lea ua fa’ailoa mai ai e So’oamali’i, “O le tatou liki e amata lava i le ta’aloga fita i le va o Mosi’ula mai Masefau ma le Pisisami mai Vaitogi, pe a mae’a fo’i ni tautalaga aloa’ia o le aso. E faia uma ta’aloga i aso e faia ai, i le malae i Faga’alu.

O aso ua atofa mo ta’aloga e fa’apitoa lava mo le aso To’ona’i, peita’i ua aofia atu ai ma aso Gafua, aso Lua ma aso Tofi. Pe a o’o loa ina mae’a lelei le ta’amilosaga a Au ta’itasi, ona saili lea o ‘au e fa ua maualuluga manumalo, o ‘au na e saili Siamupini ma ‘au e lua lea ua fa’atulaga e masi’i mai Samoa.

O ‘au ua vala’aulia mai Samoa o le ‘au Siamupini mai Sili i Savaii ma le ‘au a le Ainiusami mai Lefaga i Upolu. O lona uiga, e ono ‘au e saili siamupini i lenei tausaga mo le Moso’oi 2015, e fa mai le liki a i tatou ma le lua e masi’i mai Samoa. Peita’i, ua fa’aalia mai fo’i, sa taumafai mai fo’i le ‘au a Niu Sila, peita’i, ua toe le gafatia ona o taimi faigaluega o tagata ta’a’alo a lea ‘au, ae ua fa’ailoa mai, e fa’ato’a mafai ona tapena mai mo le Moso’oi 2016.

Ua le mafai fo’i ona auai mai ma le siamupini o Hawaii i lenei lava fa’agatama, ae ua tu’u fo’i se matua tapena lelei mai ‘au nei i le tausaga a sau.

Ua fa’ailoa mai o tulafono kirikiti uma lava sa fa’aaogaina e le Liki a le malo, o le a toe fa’aaogaina, ae ua i ai nai mea e lua e ao ina fa’amanatu mai, afai e sapo le polo i luga o le alatele ma totonu o le sami, e le pe ai se tasi. O le tulafono ina ia le lavea ai se tasi o tagata ta’a’alo pe a oso i le sami ma le alatele ona o le manatu e sapo le polo mamao na.

O le isi vala, ua fa’ailoa mai e fa’aaoga sa’o na’o polo kirikiti e gaosi fa’asamoa moni. O lenei Asosi Kirikiti Fa’asamoa i Amerika Samoa ua fa’ato’a tolu ai lenei o tausaga talu mai ona fa’atula’ia, ma sa latou agaga mo le vaitaimi tonu o le Vaiaso ole Moso’oi ina ia latou fa’atautaia ai latou liki.

O le latou laulauatofi o tutula’i mai e aofia ai le Peresetene So’oamali’i Sonny, Sui Peresetene o Kolio Lea’e, Failautusi o Mui Loia ma le Teutupe o Savaliga Afu. O afio’aga ua i ai nei latou ‘au e aofia ai: Masefau, Alofau Metotisi Autalavou, Fagaitua Tunaula, Seaula mai Aoa, Nua ma Seetaga, Vaitogi, ma Faleniu.