Ua fa’aalia e le Minisita o Ta’aloga a Amerika Samoa, o ia fo’i lea o le Fa’atonusili o le Matagaluega o Tupulaga Talavou, Tina ma Tama’ita’i ia Jonathan Fanene, le le toe i ai o se isi taimi na te toe fa’ama’imauina, talu ona taliu mai le malaga mai Ta’aloga a le Pasefika i Papua Niu Kini i le vaiaso na te’a nei, ae ua vaavaai loa lona Ofisa i auala e atina’e ma fa’aleleia ai ‘au ta’aalo a Amerika Samoa mo isi ta’aloga a le Pasefika i le lumana’i.

“E tele fa’afitauli ma lu’itau sa ou maitauina mai i la’u malaga i Papua i le amataga o le masina lenei o Iulai, a’o o’u i ai i Ta’aloga a le Pasefika, lea la ua ou fo’i mai i le atunu’u, ma o lea ua amata ona galulue lo’u Ofisa i le fa’atinoina o vaega uma sa ou maitauina sa fa’aletonu, ina ia mautinoa e le toe tula’i mai nei fa’aletonu i isi ta’aloga a le Pasefika i le lumana’i,” o le saunoaga lea a Fanene i se fa’atalatalanoaga ma le Samoa News i le vaiaso nei.

Na taua e Fanene e fa’apea, afai sa ausia e Amerika Samoa pine e tele mai Ta’aloga a le Pasefika faapea ai Ta’aloga Siisii Uamea Mamafa a le Oceania i le tausaga lenei, lona uiga e tatau ona sili atu pine e maua e au ta’aalo i isi ta’aloga i le lumana’i.

E anoanoa’i fesili ma finagalo fa’aalia o le to’atele o le atunu’u aemaise ai ni isi i faiaoga o ‘au ta’aalo, i gaioiga e tatau e le malo ona faia ina ia siitia ai le maualuga o ‘au ta’aalo a Amerika Samoa i le lumana’i.

“O fea o i ai ni fale taalo e koleni ai ‘au ta’aalo a le atunu’u o pei o fale taalo tetele o loo maua e Samoa ma isi atunuu o le Pasefika. O fea ni fale e koleni ai fanau mo ta’aloga ‘aau, e ese mai i lo le koleni i le sami ma swimming pool. Afai e mana’o le malo ia tele ni pine auro e maua e ‘au a Amerika Samoa, e tatau ona i ai ni faiaoga ua i ai le tomai fa’apitoa e aoaoina fanau i ta’aloga. E tatau fo’i ona i ai ni tauvaga poo ni ta’amilosaga e fa’amasani ai ‘au ta’aalo a le atunuu, ae le na o le o’o lava i le taimi o ta’aloga, tuli oso i le va’alele ma o e tausinio. O le fesili, o i ai ni faiaoga fa’apena i le atunuu i le taimi nei e fesoasoani i le atina’eina o ta’aloga,” o le fesili ia ma manatu na fa’aalia e se tasi o faiaoga o ‘au ta’aalo a le atunuu.

Na taua e Fanene i le Samoa News le sainia lea e le Ofisa o Ta’aloga a Samoa o se latou maliliega, mo le faia o se mafutaga o ta’aloga fefa’auo i le va o ‘au ta’aalo a Samoa ma Amerika Samoa i le masina o Ianuari 2016, ina ia mafai ai ona koleni ma fa’a masani ‘au ta’aalo i ta’aloga eseese, ao lumana’i ai ta’aloga faitauina a le Pasefika.

“E 8 ta’aloga eseese lea ua sainia i le matou maliliega ma le Ofisa o Ta’aloga a Samoa e faia i le tausaga fou, e iloilo ai pe ua lava tapena tatou ‘au mo isi ta’aloga a le Pasefika, faapea ai ta’amilosaga a le Oceania aemaise ai Ta’aloga Laiti a le Pasefika (Mini Games), lea ua fa’amoemoe e tali malo ai Vanuatu i le 2016.

O ta’aloga uma ia na tausinio ai Amerika Samoa i Ta’aloga a le Pasefika i Papua, o ta’aloga ia na taua e Fanene o le a amata ai ta’aloga fefa’auoa’i ma ‘au ta’aalo mai Samoa i le tausaga fou.

Saunoa atili Fanene e faapea, o lenei fuafuaga, o se tasi lea o mataupu sa talanoaina i Talanoaga a Samoanalua (Samoa Talks) lea e faia i tausaga ta’itasi, ina ia fa’aleleia atili ai sootaga ma atina’e i le va o Samoanalua.

“O le taua o ta’aloga fefaauoa’i ia, e aoga e atina’e ma siitia ai le tomai o fanau i le ta’aloga, ae maua ai fo’i isi auala e fesoasoani ai i le fa’alauteleina o aoaoga mo ia ta’aloga i le atunuu.”

“Ou te talitonu atoatoa i le taua o le a’oa’oina lelei o fanau i ta’aloga eseese, pau lea o le auala e mafai ai ona atina’e ta’aloga eseese i le atunu’u.”

“I le tulaga o fale taaalo, o lea ua finagalo le alii kovana ia Lolo Matalasi Moliga e fa’aaoga le Fale Taalo a Tupulaga Talavou i Pago Pago pe a tatala aloaia i le masina fou, e avea ma nofoaga autu o koleniga mo isi ta’aloga, ae o nofoaga eseese lea ua mae’a ona tapena i le V.A Stadium i Tafuna, o lea fo’i ua fa’atulaga e koleni ai isi Asosi o Ta’aloga e pei o le ausiisii, au pii (wrestling), taaloga Ping Pong, faapea ai le ‘Judo’, o le agaga atoa o le alii kovana, ia tatala soo se avanoa e aoaoina ai fanau i soo se ta’aloga.”

E ui e le o i ai se fale fa’apitoa e koleni ai ta’aloga ‘aau i le atunuu i le taimi nei, peita’i na taua e le susuga Fanene, o loo maualuga le lagona o le malo e mafai ona fesoasoani ai le Vaega a le Rotary Club i le fausia o se fale ‘aau mo ta’aloga ‘aau, i le latou galuega tele lea ua valaoia e le o toe mamao se taimi ona amata fausia loa lea i le atunuu.