Ua fa’alauiloa mai e le Pulega a le Kamupani va’alele a Samoa, le Polenisia le sauni e toe tatala lana tautua mo le motu tele o Salafai i le tausaga fou, ina ia fa’aauau ai pea le auaunaga a le kamupani va’alele mo motu e lua i Samoa, aemaise ai Amerika Samoa nei.

Na taua e le pulesili o le Polenisia ia Seiuli Alvin Tuala i se pepa o fa’amatalaga na tu’uina mai i le vaiaso na te’a nei e fa’apea, o le ulua’i malaga mo le malae va’alele i Maota, Savai’i ua fa’atulaga i le aso Gafua, aso 2 Fepuari 2015 ma le fa’amoemoe e tolu aso e malaga ai le va’alele i Savai’i.

“Ua i ai le fa’amoemoe o le aso Gafua, aso Lulu ma le aso Faraile, o aso ia ua fuafua e lele mai ai le Polenisia mai le malae va’alele i Fagali’i e aga’i atu i Maota, mo le tautuaina o le atunu’u femalagaa’i, tagata faipisinisi i le motu tele, atoa ai ma turisi e fia malaga e asiasi ma molimau i le matagofie o le motu tele o Salafa’i”, o le saunoaga lea a Seiuli.

O le va’alele fou a le Polenisia e tolu i ai ana va’alele na amata fealua’i i le masina o Setema na te’a nei, ua matua fesoasoani malosi i le siitia lea i luga o le auaunaga a le kamupani va’alele, ma ua mafai ai fo’i ona vaavaai le kamupani i le fa’alauteleina lea o lana tautua mo Savai’i atoa ai ma Manu’a i Amerika Samoa nei, e pei ona saunoa Seiuli.

Na taua fo’i e Seiuli e fa’apea, talu ai e na o le pau lea o le kamupani va’alele a le atunu’u, e teu fatu ai lava i o latou manatu le tulaga lenei, e leai se isi auala o femalagaaiga i luga o le ea e fa’alagolago i ai le atunu’u, ma manatu ai loa e toe fa’aauau le tautua mo le motu tele o Salafai i le taimi e lelei ma lava ai va’alele, e pei la ona i ai le taimi lenei.

E ese mai i malaga fa’aopoopo mo Savai’i, ua fa’alauiloa mai fo’i e Seiuli le sauni o le Polenisia e toe fa’aauau lana tautua mai Pago Pago mo le malae va’alele fa’avaomalo i Faleolo, amata atu i le aso 1 Fepuari 2015, mo pasese e malaga atu i Pago Pago ma le fa’amoemoe e fia malaga i Niu Sila, Ausetalia, Fiti ma Hawaii.

E le gata fo’i i lea, ae o se auala faigofie fo’i lea mo mo femalagaaiga mo le mamalu o le atunu’u o lo o aumau i le itu i Sisifo o Upolu, e malaga atu ai i Pago Pago ma toe fo’i mai.