O le aso Toonai, Iulai 25 2026, na o’o mai ai le vala’au pa’ia a le Atua, i se tasi o tamalii, ua afu lana tautua i totonu o Amerika Samoa.  E ui ina leai sona toto Samoa, ae peitai, o lona fatu ma lona agaga, o ia o le Samoa moni.

O le susuga ia Lewis Joel Wolman, na soifua mai i le ‘aai o Madison, i le setete o Wisconsin, i Amerika, i ona matua, o Joseph “Murphy” Martin Wolman ma Anne Wolman.  O ia o le ui’i, o se fanau e to’alima.

Ua maliu o ia, i le 68 tausaga o lona soifua.

O “Lewis” e pei ona lauiloa ai o ia i totonu o Amerika Samoa, sa malaga mai i Amerika Samoa, e galue i le Ofisa o Fefaatauaiga (DOC), a’o fa’aigoaina o le EDPO (Economic Development Planning Office).  O lana galuega, o le ‘Coastal Zone Management Program Planner’.

Ae ina ua mae’a lana konakarate ma le malo, sa filifili o ia, e fa’amautu ai iinei i le teritori ma sa avea ai o ia ma Faatonu, o le nusipepa a le Samoa News, ma i’u ai ina ona faatauina le kamupani, i vaitaimi na sa na’o le fa’atasi i le vaiaso, ia lomiga o le nusipepa.  I lalo o le taitaiga a Lewis, na mafai ona lolomi fa’atolu i le vaiaso, ia le Samoa News, ma i’u ai lava ina vaiaso atoa.

O se taimi mulimuli ane, sa faapea ona faatauina atu e Lewis ia le kamupani nusipepa i le tina ia Vera Ho Ching Annesley ma le fanau, lea o lo’o latou pulea, e o’o mai i le taimi nei.

I le 2024, na avea ai Lewis ma se tasi o taitai autu i totonu o le kemupeni a le paga tauva i le tofi Kovana, a Pula ma Pulu, ma na avea foi o ia ma se tasi o faufautua i totonu o le ofisa a le Kovana ina ua tula’i mai le Faigamalo a Pula ma Pulu.

Peitai ane, e le’i atoa lelei le tausaga o le faigamalo fou, na tu’ua ai e Lewis ma lona faletua, ia Eletise Matagi Wolman, ia le teritori, mo Boulder, Colorado, lea sa o la fa’amautu ai, se’ia o’o ina maliu o ia.

Ua to’atele i latou ua fa’aleoina i luga o ‘upega tafa’ilagi, o latou alofa’aga ma fa’amaisega, mo le tina ia Eletise, le fanau e to’afa, fanau a fanau faapea le aiga fa’avauvau.

O Lewis, o se tasi o tamalii loto alofa ma le agamalu ma o se tagata foi, e fiafia foi e fai tala malie.  O se tagata fa’amaoni ma o se tagata sogasoga.  A’o avea o ia ma pule o le Samoa News/Le Lali, sa ia saili ma fa’atulagaina mea uma, so’o se vaega, e mafai ai ona fa’atinoina ma le atoatoa, ia lenei auaunaga.

I le amataga o le masina, na maua ai e le Faatonu o le Lali ia ni ata mai i le ‘Messenger a Lewis’, o se tasi nei o ata sa ia lafoina mai.  O ia ma si ona faletua o Eletise, ma si a la fanau, o, Tavie, Jessica, Homer ma Iopa, o a latou taitoalua ma nisi o fanau a fanau.

Ia manuia lau malaga le toe fo’i mai, Lewis.  Fa’afetai mo lou alofa, o au fautuaga ma fa’ata’ita’iga lelei.