Ua tatou i ai nei i se aso e fa’apitoa mo Tama uma lava! Po’o fea o i ai lou Tama i lenei aso, e tatau ona o’o atu ia te Oe se fa’amanuia, ma toe fesiligia, “O e fa’atauaina lou avea ma se Tama?”

I totonu o aiga, o le li’o sili ona la’ititi ua fa’ataua ai e le Atua le Tama, e na te va’aia lelei, puipui ma fa’amalumalu ia saogalemu lona aiga o totino e aofia ai le tina o le aiga ma le se fanau!

Ona fa’asolo mai lea i Ekalesia e fia ua mae’a fa’atula’ia i le tatou atunu’u ina ia soifua o tatou tagata e tusa o le amiotonu a le Atua, ma o lo ua mae’a tofia ma fa’au’uina o latou Taiulu - Ta’ita’i o Ekalesia Ta’itasi.

O isi ia Tama, ua tepa taula’i i ai le atunu’u e avea ma latou sulufa’iga e fautuaina o latou olaga i aso faiso’o, ina ia saofaga sa tautua ma auaunaga ia Ieova le Atua, le tama o le Foafoaga o lenei lalolagi.

Mo le Ekalesia Katoliko i le Pule’aga Samoa Pago Pago, ua mae’a fa’atulaga le fesuia’iga o le Fa’atama Epikopo mo i latou. Lea ua fa’atulaga ai le aso 22 Aukuso, 2013 ina ia fa’atautaia ai le Fa’au’uga o Epikopo Peter e suia ai Epikopo John Quinn Weitzel.

Ua silia ma le 27 tausaga le tautua a Weitzel i Amerika Samoa, ma ua mae’a ona fa’atulaga lana malologa ona ua tino matua fo’i ua sili mamao ma le 75 tausaga e tusa ai ma i’ugafono e ao ina malolo mai ai ta’ita’i o Pule’aga Taitasi a lea ekalesia i le lalolagi atoa.

Mai le Ekalesia Penetekoso i Peteli ma Tafuna ua mae’a faia ai le ‘aiga tele i le falea’iga fo’i o le Jade i Nuuuli e le mafutaga tina, ina ia ofoina ai o latou alofa’aga fa’apitoa i le fa’atama o le latou Ekalesia - Rev. Elder Dr. Vaiao ma se tasi o uso a Fa’afeagaiga i le latou fo’i tapua’iga.

E mautinoa o lo’o faia fo’i le measili e isi uma Ekalesia e fa’amanatu ai le aso o Tama i o latou Tama uma fa’aleagaga, ae o se mea mautinoa, e o’o lava i Tama uma i totonu o aiga, e taumafai lava le tina ma le fanau, “Ia iloga so latou sao e fa’amanuia ai lenei aso fa’apitoa mo tama uma i Amerika Samoa ma atunu’u i fafo.”

Tama, tau na’o se tu’ualalo, ia sagai a’e ‘ai o le tai, toe tepa i lau puipuiga po’o malupuipuia le fanau ma le tina i totonu o lou lotoifale? Alofagia, ia muamua lava e onosa’i e pule ma le onosa’i mea e tutupu i totonu o si ou aiga, ae le’i matala le faitoto’a ma iloga mai, e i ai se lape i lau va’ava’aiga malu o si ou aiga. O lou tiute o le avea ma Ulu, aua ne’i avea, ae ia e maua’a i lou lea tofi na amatalia ai si ou aiga!

Ia tumau i le Atua lou fa’amoemoe e te gafatia ai ona tineia mailei a le fili, ma ia sagatonu ai au fa’ai’uga, ae malutia ai fo’i lou lotoifale mai ufanafana mu uma a le fili o lenei lalolagi!

“Ia manuia le aso o Tama - Tama uma o Samoa!”