Ads by Google Ads by Google

Tala I Vaifanua

Pago Pago, AMERIKA SAMOA -

PASIA I.R.S FA’ATULAGAGA TUFATUFA AI SIAKI  STIMULUS AMERIKA SAMOA

 

Ua fa’ailoa e le Teutupe a le Malo o Amerika Samoa, Ueligitone Tonumaipe’a, ua pasia e le fetarale (I.R.S) le ala na fa’atulaga e le latou matagaluega e tufatufaina atu ai siaki a le Stimulus mai le Malo tele, e fesoasoani I aiga ona o le pagatia i le Coronavirus. O lea vaega tupe sa taua’aoina mai i le aiaiga o lo’o fa’atulaga i le CARES Act ma ua mae’a i ai lea tinoitupe fa’asoa i le tatou Malo.

 

I le vaitau lenei, ua fai sina leva ona maua siaki nei a isi tagata faigaluega sa faila a latou lafoga i fafo, peita’i o i tatou uma sa faila lafoga i le tatou nei malo, o lo ua fa’ailoa mai o le ala ua fa’atulaga e tufa mai ai, e fa’auia i le pusameli ua i lau faila o le lafoga, pe fa’aulu fo’i i lau teugatupe e pei ona e manatu ai i le taimi na faila ai lau lafoga fa’aletausaga, 2019 po’o le 2018.

 

O le isi lua vaiaso pe a taunu’u mai lea vaega tupe mai le IRS ona fa’atulaga lea o le tufatufaina o siaki e ala i le meli ina atu i le tagata faila lafoga.

 

Fa’ailoa fo’i le agaga fa’afetai o Tonumaipe’a i le  i le peresetene o le Malo Tele i lenei fo’i foa’i mo tagata faigaluega uma lava ma latou aiga, ua le gata i lea, ae ua fa’aoo atu fo’i le fa’afetai i le Failautusi o le Tupe a le malo tele Steven Mnuchin, le Konekeresi ma i latou uma na auau fa’atasi ina ia fa’auia lea alamanuia mo tagata faigaluega uma i le malo tele ma ona teritori.

 

E i ai aiaiga tamau o le a a’afia ai nisi e maualuluga tele a latou siaki totogi, ma ua le agava’a ai i lenei alamanuia. O nisi ua faila ta’ito’atasi latou lafoga ae ua sili atu i le $99,000 lo latou totogi, ua maua la e ia lea siaki, ae o ulugalii e faila fa’atasi le lafoga ae silia le tupe maua i le $198,000 ua le maua fo’i e lea ulugalii ni siaki, peita’i e maua lava siaki a le fanau ua lisia i a latou lafoga.

 

Ua fa’ailoa mai fo’i e le teutupe a le Malo, afai e le’i failaina lau lafoga o le 2019, “O le IRS o le a latou te’ena le maua o sau siaki Stimulus ona ua le failaina lau lafoga o lenei tausaga, pe fa’aaoga fo’i e i latou fa’amaumauga o lau lafoga na faila i le 2018.”

 

Pe afai o le a i ai nisi au fa’afesili ua mafai ona e faia lea i le Upega Tafailagi stimulus@tr.as.gov