“O le taimi tonu lava lenei ua tatau ai ona tulai mai le malo e fai se gaioiga ina ia taofia ai siitaga nei, aua afai e le mafai ona taofi, o lona uiga o le a sili atu ona pagatia Amerika Samoa i le taugata o talavai i le falemai,” o le saunoaga lea a Reupena Aviata i le Samoa News.E ui o lea e lei faamamaluina siitaga fou a le falemai e pei ona fuafuaina i le faaiuga o le masina nei, peitai ua i ai nisi o le atunuu ua latou fesiligia le talafeagai o nei siitaga, pe a faatusatusa i le tulaga taugata ua oo i ai le tau o le soifuaga i le taimi nei.O nisi na fa’aalia lo laotu atugalu ona o lenei si’i fou, ae o ni isi na fa’aalia lo latou lagolagoina o nei si’itaga, ae ia fuafua i le ituaiga togafitiga.Na taua e Aviata le matuia o nei siitaga, aemaise lava o ia se tasi o tagata e faamama le toto, ma ua foliga mai ai o se avega lea o le a tauave i le faia o lenei togafitiga.O le finagalo foi lea o le tina o Elisapeta Uta ma Togiaso Finau mai Tafuna ma Aua, o nisi o tina matutua e aafia i le gasegase o le suka, ina ua la maua faasalalauga e uiga i le siitaga fou a le falemai i Fagaalu.Ae na taua e Uta, e faigata ona toe taofiofi le fuafuaga a le falemai lea ua faalauiloa mai, ona o lea foi ua manino le le mafai e le malo ma le Fono Faitulafono ona taofi siitaga faaopoopo a le Faalapotopotoga o le Eletise ma le Suavai e pei ona i ai nei, faapea ai ma le siitia pea lea i luga o le tau o oloa.“Afai o lea ua manino le agai pea i luga o le tau o oloa, atoa ai ma le siitia pea lea o pili a le eletise ma le suavai, o le mea moni foi lea, e le mafai lava e le malo ona taofi siitaga a le falemai lea ua faalauiloa mai i le taimi nei,” o le saunoaga lea a le faletua o Finau.E talitonu nisi o le atunuu e aofia ai se tasi o tamalii faipisinisi, ma nisi o tagata faigaluega a le malo, e tasi lava le auala e mafai ai ona taofi siitaga a le falemai, o le totogi atu lea e le malo o le tupe lea e tatau ona latou totogiina lea fai mai le falemai e le i totogiina atu, peitai o le faaeteetega o le malo e pei ona taua e nisi o ana tagata faigaluega, afai ae totogi e le malo le tupe lea i le falemai, o lona uiga o le a tulioso mai foi le ASPA ma le Kolisi Tuufaatasi ma faatagisia mai ina ia totogi atu foi e le malo la latou tupe lea e le o totogiina atu.E toalua isi tagata na fesiligia e le Samoa News i le aso ananafi i le nofoaga o loo i ai le falemai i Fagaalu, i ni o latou finagalo e tusa ai o nei siitaga, ma o se tasi o i laua nei lea e lei finagalo e faailoa lona suafa, sa ia taua le faigata tele o nei siitaga mo i latou uma lava e aafia i ituaiga gase e pei o le suka, toto maualuga faapea ai ma le vaega e faamama le toto.“E tau feololo mai lava siitaga nei mo i latou e aafia i mai laiti e pei o le flu ma le tino gagase, peitai o i latou e aafia i gasegase pipisi e pei o le toto maualuga ma le suka lea foi e aafia ai lo`u tuaa, o se tulaga faigata tele mo i latou nei ma o latou aiga le tulaga taugata lea ua i ai le tau o nei tautua,” o le molimau lea a lenei tina talavou.O le aso 24 o Tesema lea ua faamoemoe le falemai e tatau ona faamamaluina ai loa ana siitaga e pei ona faalauiloa mai, ona o le manatu e tau sailia ai se tupe e fesoasoani ai i le faatinoina o lana tautua i le atunuu.