Ua faailoa mai Allen Allen Jr., o se tasi o alo o le atunu’u ua lauiloa i taaloga volipolo, e faapea o nisi o alo o le atunu’u e malaga mai i le polokalama mo le taumafanafana 2015 a  Troy & Theodora Polamalu Foundation e aofia ai Yeshua Moe Maxwell, o se tasi fo’i e talenia tele i ta’aloga volipolo, ma ua liteaea mai i le Maligi Koa o le Vaega Au a le malo tele.

Ua o’o mai se tusitusiga a Maxwell, lea ua ia fa’ailoa mai lona igoa Samoa moni “Aupiu Savea Tuitoga Ma’atoe Moe Maxwell” mo le silafia a le atunu’u pele, e le’i ola ane ai, ae ua fiafia tele o le a o’o mai, e fetufa’i sona iloa ua i ai, ma fa’asoa se taleni ua fa’amanuia ai le Atua ia te ia, ma fanau a le atunu’u o lona tupu’aga.

“O se tala fiafia ua ou maua, ae o se avanoa matagofie, ou te asia ai o’u tua’a ma eleele na afua mai ai so’u tupu’aga. Ae silisili o se avanoa e fa’asoa ai se iloa ua ia te a’u, o se tagata fa’atauva’a lava, ma se taleni e ao ina tufa atu, mo le mamalu o alo o Amerika Samoa,” o sana fa’amatalaga lea i le Samoa News.

O lona tupuaga mai lona Tina o Manuosefusi Tina Moe, o se alo e fa’asino ia Atoe Tina Moe ma Folole Ava, ma sa alaala i latou i  Aunu’u. I le taimi nei, ua alaala lona aiga i Mapusaga Fou, ma o lo ua avea lona Uncle o Kilipoa ma suli o lona aiga e va’ava’aia latou eleele ma meatotino.