O le fa’aiuga o le vaiaso na te’a nei na auina atu ai i Ta’u i Manu’a le ali’i pagota o Leuma Malala mo le tuliina o lona fa’asalaga fa’afalepuipui, e tusa ai ma se poloaiga a le fa’amasinoga maualuga sa tu’uina atu i le Sui Komesina le tumau o le Matagaluega o Leoleo.

E 28 masina lea ua fa’asala ai e le fa’amasinoga ia Malala e taofia ai o ia i le toese, o se tasi lea o tuutuuga o lana nofovaavaaia e 7 tausaga, ina ua fa’amaonia moliaga mamafa e lua, o lona umia fa’asolitulafono o se a’upega fa’asaina fa’apea ai ma le fa’ao’olima i le tulaga lua.

I le taimi o lana fa’atoesega i luma o le fa’amasinoga i le aso Faraile na te’a nei, a o lumana’i ai le tu’uina atu o lana fa’asalaga, sa ia talosagaina ai le ali’i fa’amasino sili ia Michael Kruse mo se avanoa e saili ai se isi nofoaga e loka ai o ia, ona e fa’atolu ona fasi o ia e leoleo o le toese ma ni ali’i pagota.

E le i nofo lelei i le finagalo o le fa’amasinoga le talosaga a le ali’i pagota, ae na matua umi se taimi o iloilo e ali’i fa’amasino se ituaiga fa’asalaga e tatau ona fa’asala ai Malala e tusa ai o le solitulafono sa ia faia.

Ina ua mae’a ona tu’uina atu e le fa’amasinoga lana fa’aiuga ia Malala, na liliu atu ai loa Kruse ma poloa’i le afioga a Save Liuato Tuitele, lea fo’i sa i ai i totonu o le potu fa’amasino, ina ia saili se isi nofoaga e ese mai i le toese i Tafuna e tuli ai le fa’asalaga a Malala, ona o manumanuga a le fa’amasinoga i lona saogalemu e tusa o mea sa tutupu ia te ia a o taofia ai o ia i le toese.

Ina ua fesiligia e le Samoa News le afioga a Save i le taeao ananafi e tusa ai o lenei mataupu, na fa’amaonia mai ai e Save le mae’a lea ona auina atu o Malala e taofia i le falepuipui i Ta’u i Manu’a, e tusa ai o le poloaiga a le fa’amasinoga.

“O lea ua usitaia le poloaiga a le fa’amasinoga, ma ua mae’a nei ona auina atu Malala i Ta’u...e tuli ai lana fa’asalaga, ae se’i fai su’esu’ega a le Ofisa o Leoleo e tusa ai o mea sa ia taua i le fa’amasinoga na tutupu ia te ia”, o le saunoaga lea a Save.

Saunoa fo’i Save e fa’apea, afai ae mae’a suesuega a leoleo ua fa’agasolo e tusa ai o le fa’alavelave na taua e Malala i luma o le fa’amasinoga na tupu ia te ia ae fa’amaonia, ona fai ai loa lea o se isi la’asaga i le mea e tatau ona fai.

“Ae afai e uma ane su’esu’ega ae le fa’amaonia le molimau a le ali’i pagota, ona toe logo lea o le fa’amasinoga e tusa ai o le fa’aiuga o le su’esu’ega”, o le isi lea saunoaga a Save.

Na taua e le loia a Malala o Michael White i le Samoa News, e tusa ai o le fa’amatalaga a le ua molia ia te ia, e fa’atolu ona fasi o ia e leoleo ma pagota, ma, sa manu’a fo’i lona tino ona o lea fa’alavelave.