Ua toe taliu le sui sa o’o mai o le Ofisa o le Soifua Maloloina a le Iunaite Setete o Amerika, Tyler M. Sharp,Ph.D. peita’i, ua ia fa’ailoa mai, “Ua i ai le lisi o mea e ao ina mulimulita’ia le Matagaluega o le Soifua Maloloina, e ao ina fa’autagia atu i le mamalu lautele o le atunu’u mo puipuiga o le gasegae o le Dengue i Amerika Samoa.”

O Tyler M. Sharp, o ia o le Epidemicologist a le CDC ma le Matagaluega o le Soifua Maloloina a le Iunaite Setete mo le fa’ama’i lenei o le Dengue, ma ua sau sa’o lava ia, ona o lea ua a’afia le teritori ma e televave fo’i lona a’afiaga o i ai, ma e tatau fo’i ona latou fa’aaogaina fa’amaumauga uma ua mae’a tu’ufa’atasia e le Matagaluega o le Soifua Maloloina a le tatou teritori nei.

“I le tulaga o le fa’ailoa atu ile mamalu lautele o mea e tatau ona nofouta i ai, ia le toe fa’ateleina le Dengue ona o le namu, ua matua sili Amerika Samoa i le galuega fa’amama ua ou molimauina. Lona lua o le fa’ailoa atu o mea uma e ao ina fa’aleleia e aiga ta’itasi i o latou laufanua, ina ia le toe fa’apuna fanau ai namu ma a’afia ai tagata o aiga i lenei fa’ama’i fita.” O se tala lea a Sharp.

O nisi o mea ua fa’atulaga nei e fa’atino ai galuega mo tagata ua a’afia i le Dengue, ua fa’ailoa mai, “O i latou ua va’aia o lo ua fa’ato’a maua, ia le tau fa’aaogaina i ai su’esu’ega e tatau ona auina atu i fafo, ae ia sefe mai ia su’ega, ae togafitia loa e pei ona fa’atulaga. Fa’ainu le tylenol e taofia ai le fiva, ma ia to’aga e inu le vai auli ma juice suamalie e fagaina ai le tino o le tagata gasegase.” Ae fa’amolemole mai fo’i le ali’i foma’i, “Ia taofia a tatou vai samoa e masani ona fa’ainu ai fanau, ae faia na’o le fa’atonuga ua tu’uina atu.”

Ina ua fesiligia Sharp e tusa ai o sailiga mo le 5 ituaiga o ma’i Dengue lea e masalomia o maua ai o tatou tagata, ae fa’ailoa mai e ia, “E leai mai suesuega uma ua mae’a faia ma maua mai tali mo Amerika Samoa, e na’o le Dengue numera 3 o lo’o maua ai i tatou i le taimi nei. Peita’i, ona ua tigaina nisi aua ua o’o i le vaega lua o le Dengue ae fa’ato’a sau i le falema’i, lea ua ala ai ona i ai nisi ua maumau le soifua ona o le fa’ama’i.”

Ua fa’ailoa mai fo’i e Sharp fa’atasi ai ma Scott Anesi, e tusa ai o la’ua faiva tau fa’amaumauga patino i le Dengue, “E leai lava se vaifofo e tu’u sa’o atu i le tagata ina ia inumia e te’a ai le Dengue, e o’o mai lava i le taimi nei, e na’o le tylenol po’o isi fuala’au e te’a ai le fiva e tatau ona inumia, ae ‘aua lava ne’i inumia se ituaiga fuala’au tau ‘asprin’ ona e ono a’afia ai le ma’i i se isi fa’aletonu, ma le inumia loa o le tele o le vai auli, ina ia lava pea le vai i le tino o le gasegase.”

Ina ua fesili pe i ai se fautuaga e tatau ona fa’ao’o atu i tagata ia taofia ai le o’o atu ina tuga tele le ma’i ae fa’ato’a avatu i le falema’i mo le siakiga, ae fa’ailoa mai, “Ina ia le tigaina le ma’i, ia vave ona avatu i le falema’i, e fa’atonu mai fo’i e le foma’i mea e ao ina fai, ona mautinoa lea e le umi ona ma’i ae toe malosi le sui. Ia va’ai toto’a fanau, a amata loa ona vevela, fai le gaoioiga tatau ona faia, ae a masalomia pea o le Dengue, va’ai loa le falema’i e saogalemu ai.”

Ta’ua e Sharp, “Ua ou alu nei ma fa’amaumauga uma o le Dengue iinei, e aoga mo le aga’i i luma o togafitiga, ma e feso’ota’i mai lava i matou i le Matagaluega o le Soifua Maloloina, e fa’ailoa atu se isi suiga ua i ai i le fa’ama’i lenei, ae fa’afetai i le aufaigaluega a le Public Health, ASEPA, matagaluega uma o le Malo ma isi fo’i kamupani tumaoti ae maise aiga uma o Amerika Samoa mo le fa’amama, ua matua mafuli tagata uma e faia le galuega lelei, ia saogalemu le soifua lautele o le atunu’u.”