Ua amatalia nei le kosi mo A’oa’oga Fa’apitoa o Puna’oa o le Gatafale lea e fa’atautaia a le Itu o Fa’amaumauga a le Matagaluega o Alamanuia o le Gataifale ma le Vaomatua [DMWR]. O lea kosi na fuafua ia maua le to’a 15 -20 o tamaiti talavou o lo’o auai i a’oga maualuluga i le teritori.

“O i latou nei o le a a’otauina fo’i i lenei tausaga, ia mafai ona faautagia e i latou galuega tima’i a le matou matagaluega o alamanuia o le Gataifale ma le Vaomatua, ia fa’afaigofie fo’i i le lumana’i galuega fa’apea a le Matagaluega, ma tufa atu fo’i so latou iloa i o latou tupulaga ma tagata lautele o le latou nu’u ma aiga!”

Sa i ai pepa talosaga e fa’atumuina mo le ulufale o nei fanau i le a’oa’oga lea, ma afai e mae’a le 4 itula i le aso e tasi, ua tatau ona a’oa’oina i latou i lea vaega ma lea vaega o le tautua, ma fa’alautele lo latou silafia i tulaga o le soifua so’ofa’atasi o le gataifale ma meaola uma o i ai, a’au ma ‘amu, i’a ma le tagata soifua, ae maise ai fo’i le vaomatua, meaola uma o i ai ma le tagata soifua.

“E afua ona tau leai se i’a e maua, ona ua so’ona fagota, ina ia fuaina ma fa’atau atu, ae o le fofoga taumafa lava latou sa sau a’i le soifuaga o aiga samoa i tausaga ua tuana’i, e le taitai ona mae’a ai pe fa’aititia le aofa’i o le i’a i le gataifale!” O se tasi lea o manatu fa’aalia i totonu o lea a’oa’oga fa’apitoa, ma e moni ma fa’amaoni lava lea manatu.

Peita’i e le na’o lea le afaina ua fa’aititia ai i’a, ae ua fa’aleagaina fo’i le ‘amu e maua ai lana mea’ai, ua fa’aleagaina le a’au, o le ofaga o meaola uma o le sami, ma ua fa’alapisi fo’i le tagata ola i ona tafamaota ma ona tuamaota, ua lolotu timuga ma ua tatafe atu aga’i i le sami, ma to’a ai ma ua fa’aleagaina ai tatou a’au ma ‘amu.

O nei ituaiga o a’oa’oga, e matala ai mafaufau o le fanau, ma latou iloa ai, e le tatau ona latou faia nei ituaiga o uiga! “E tatau ona taofia nei faiga, ae ia fa’asao le gataifale mai le fa’alapisi i ai i taimi uma, aua e toe fo’i mai lava le afaina ia i tatou ma lo tatou soifua maloloina.”

O lo ua i ai le vasega o faia’oga e to’afa e fa’atautaia a’oa’oga a le fanau, pe afai fo’i e togisilia se tasi i su’ega e faia i lea aso ma lea aso, e maua fa’ailoga o i latou na.

O le a’oa’oga ua fa’agasolo nei na amatalia i le aso Gafua na te’a nei Iulai 22, 2013 ae o le a fa’amutaina ia Aokuso 2, 2013.

I le fa’ai’uga o lenei kosi mo le fanau a’oga, e mafai fo’i ona talosaga mai nisi o fa’alapotopotoga i tua i nu’u po’o afio’aga mo lea ituaiga o a’oa’oga fa’apitoa e tima’ia ai le taofia o so’o se ituaiga o fa’aletonu e ala ai ona afaina o tatou gataifale ae maise o ona puna’oa eseese o i ai mo i tatou ma o tatou fanau i le lumana’i.

O le kosi lea o lo’o fa’atautai lua e le WPRFMC ma le DMWR ma ua tatau lava ona faia aua galuega i le lumana’i e feso’ota’i ai le matagaluega o afio’aga i Fa’asao o le Gataifale ina ia taofia le so’ona fagotaina o i’a o le gataifale, se’ia toe va’aia fo’i ua lava ma totoe mo le lumana’i.

O se tasi o mafutaga sa latou talosaga ma ua mae’a fo’i ona faia lea kosi, o le Aualofa a le LDS i Alao. O i latou lea sa talosaga e fia manino fo’i ia i latou nei a’oa’oga aoga mo le gataifale o le afio’aga ma ala e mafai ona fa’atumau ai ona sosia mo le fofoga taumafa o le afio’aga. Fa’afetai, ua mae’a lea a’oa’oga, ma ua latou fa’atino kilini ma fa’amama le matafaga i le tele o taimi.

I le tala mai e 12 afio’aga ua mae’a fa’atautaia ai lenei polokalama o le VMPA - Fa’asao o le Gataifale i Afio’aga ma ua lisia mai i latou o: Aoa, Vatia, Alofau, Sailele, Alega, Auto, Matu’u ma Faganeanea, Amaua, Poloa, Fagamalo ma Ta’u.

A mae’a lenei kosi ae o le a fa’atautaia se Togalauapi a le  Fiafia e Fagota [Hooked on Fishing] e fa’atauatia lea i le Ta’elega i Alega o le 2 Dollar Beach ma e moetasi fo’i lea tolauapi. O tausaga o le fanau o le a aofia ai e afua lea i le 8-14 tausaga le matutua ae o le a maua fo’i tusi talosaga mo se avanoa o lau tama i le Ofisa lava o le Gataifale ma Faigafaiva i Fagatogo.

Ua fa’ailoa mai o le toe tolauapi lea mo le fanau i lenei fo’i tu’uaga o a’oga, ona a’e lea o a’oga i le tausaga a’oga fou, ae aoga tele e tima’i ai le fanau, ma maua ai nisi fo’i o mataupu e mafai ona faia ai a latou poloketi fa’asaeanisi mo le latou taumafai.