Ua silia ma le 10 tausaga talu ona amatalia le galuega alofa a le Global ENT lea e auina mai ai foma’i fa’apitoa mai Amerika e faia ta’otoga fa’apitoa e le mafai ona fa’atino e le to’atele o foma’i taliga.

O le ali’i foma’i mai le setete o Uosigitone ia Dr. Richard Wagner ua fa’asefulu ai lea ona malaga mai i Amerika Samoa, ina ia faia taotoga aoga tele mo tagata ua a’afia o latou taliga, ua le toe lagona se mea, ma nisi ua leaga “kapelau o latou taliga.”

I sana fa’amatalaga e tusa o lana galuega lenei, sa ia fa’ailoa mai, “O le galuega e leai se totogi mo Amerika Samoa, o se talosaga mo se tupe toina mo le matou sosaiete o Foma’i taliga Global ENT, lea ua fa’atupeina lea tautua.”

O lana tala e to’aono i latou foma’i fa’apitoa e lelei agava’a, o lo’o aofia i lenei asosi, ma ua o’o i latou i le tele o atunu’u o Aferika, Amerika i Saute, Pasefika, Atu Karepiana, Sasa’e Tutotonu, ma isi lava malo e matua maulalo le tamaoaiga tausi o aiga o i ai, ina ia tautuaina o latou taliga.

I se tala a Wagner, “O le tele o tagata e fa’aletonu o latou taliga, e maua mai lea i aiga sili ona vaivai le tamaoaiga tausi i le lalolagi, ma e ui ona o lea e i ai le afaina i Amerika Samoa, ae le ogaoga tele mo le to’atele o tagata, e to’agaogao mamao atu nai lo isi malo o le lalolagi ua matou i ai, e pei o Peru, El Salvador ma Chile, aua fo’i, e le taitai ona o i latou e faia ni talavai, e ola lava le tagata ma le afaina o i ai se’ia maliu.”

“Ona ua le va’ai toto’a fo’i matua i ni afaina o le fanau o i ai, pe ua le ta’ua fo’i e le fanau i matua o lo’o faigata ona ia lagona se mea, pe na taia fo’i lona taliga i se mea ma ua tiga tele ai. E matele ina nofo le tamaititi e le tautala se’ia o’o ina afaina tele ua ma’i ai.”

Ina ua fesiligia Wagner e tusa ai o se mea e faia ina ia taofiofi ai le leaga o taliga, o lana tali, “O le to’aga e fai talavai o taliga, e siakia ai le fa’alogo a le fanau ma totonu o taliga, pe e tatau ona fufulu mai taetuli o i ai. O nisi taimi ua manatu lava i tatou e fufulu i taimi uma i le fale, peita’i, e ao ina siakia fo’i e le foma’i po’o a mai taliga o le fanau.”

“Peita’i, a fa’alogoina loa e le fanau ua tau le lelei le fa’alogo, e ao ina fa’ao’o mai mo se siakiga i le potu talavai i le LBJ, afai o se ta’otoga matuia, e faatali lava le isi a’u malaga mai e fa’atulaga ai le taotoga, ae o le tele lava o taimi, ua fa’atino lava e Tui, le uso foma’i Samoa, le taotoga ma manuia ai.”

Ua fa’ailoa mai ua silia ma le 60 taotoga ua mae’a faia talu mai ona amatalia le tautua a le Global ENT i Amerika Samoa, o ituaiga o taotoga nei e toe fa’alogo ai taliga o i latou ua logoa. I le asiasiga e lua vaiaso a Dr Wagner, na faia ai fo’i isi taotoga. E toe taliu mai i le masina o Me, ma le masina o Aukuso o lenei tausaga, mo isi taotoga ua fa’atulaga e le LBJ.

E tolu ituaiga o taotoga o lo’o ia fa’atinoa, Fufulu mai totonu ma siakia lelei po’o atoatoa totoga uma o taliga, Lipea le Tigipelau o taliga ma le Toe Fa’afo’i mai lau Fa’alogo.

Na fesiligia pe na fa’apefea ona tau ane le latou auaunaga e fa’ao’o mai i Amerika Samoa. Saunoa Dr. Wagner e faapea, “O le tama foma’i Samoa e igoa ia Victor lea sa ma galulue fa’atasi i Uosigitone, sa ia augani mai ia matou, alofa e fa’ao’o mai le matou auaunaga i lona Malo, e leai ni foma’i taliga o i ai, i le tausaga lea e 2003.”

Ua mae’a faia asiasiga i Manu’a ma ua o’o fo’i Wagner i Samoa, ae o lana malaga mai ia Me 2015, o le a fa’ato’a toe fa’atumau ai lana asiasiga i Samoa e va’aia ni ana ma’i.

O le upega tafa’ilagi a nei foma’i aoga tele ua mafai ona maimoa ai i le: www.geoutreach