Na avea le iloiloga sa valaauina e le Komiti o le Fa’agaioiga o le malo a le maota o sui o le aso Faraile (Fepuari 6) ma le Ofisa o Oloa a le malo na maua ai e afioga i faipule, e le fa’amaonia le molimau sa tu’uina atu e le Sui Fa’atonusili o le Ofisa o Galuega a le malo, e faapea o le fa’afitauli ua tuai ai galuega fa’atino mo mea sa fa’aleagaina i le galulolo o le 2009, o lo o fa’atali le pasiaina o pemita mo nei galuega uma mai le Ofisa o Oloa a le malo.

Na taua e le sui fa’atonusili o le Ofisa o Oloa a le malo ia Sapia’i Ma’o e fa’apea, e leai ma se talosaga mo ni pemita o galuega o le galulolo o i ai i le latou ofisa i le taimi nei, ae o talosaga uma lava mo pemita sa tu’uina atu, ua mae’a ona faia i ai tauofoga ma ua mae’a fo’i ona fa’atino ni isi o galuega.

Talu ai le taua tele i afioga i faipule o le mataupu e fa’atatau, i le tele o galuega sa fuafua mo afioaga ma itumalo talu mai le taimi na mae’a ai le galulolo, a o lea e o o mai i le taimi nei e le i fa’ataunu’uina lava, ua manatu ai loa le komiti o Galuega Lautele a le maota e sili pe a toe valaau se isi iloiloga ma le Ofisa o Galuega Lautele a le malo.

Na fesiligia e le afioga i le ali’i faipule ia Faimealelei Anthony Fu’e Allen le sui fa’atonusili o le Ofisa o Galuega Lautele a le malo ia Fa’alavai Taase i le lua vaiaso talu ai, i se tulaga o ni galuega sa fuafua mai ina ua mae’a le galulolo, pe fia ni galuega e o o mai lava i le taimi nei o lo o totoe pea e le i mae’a, e fia se tau aofa’i mo nei galuega, ae o le a fo’i le mafua’aga o le fa’atuai.

Na taua e Ta’ase i luma o le komiti e silia i le $10 miliona le tau aofa’i o galuega sa fuafua mai i le taimi o le galulolo, e o o mai lava i le taimi nei e le i fa’atinoina.

O se tasi o mafua’aga na taua e Ta’ase o lo o fa’atuai ai galuega nei, o lo o fa’atali pea talosaga sa tu’uina atu i le Ofisa o Oloa a le malo mo pemita o nei galuega.

O ni isi o galuega na taua e Ta’ase i lana molimau e aofia ai le fausiaina o le auala i Afao ma fa’asolo atu ai i Failolo, e fa’apena fo’i i le itu i sasa’e e amata atu i Lauli’i e o o i Fagaitua, atoa ai ma ni isi o galuega i auvai ma taligalu o nu’u itumalo.

Na avea le molimau lea a Ta’ase ma itu na fa’atulaga ai loa e Faimealelei le iloiloga a lana komiti, ma valaaulia ai le sui fa’atonu ia Sapia’i Ma’o e o o atu e molimau, ona o lo o toesea le Faatonusili o le Ofisa ia Tiaotalaga John Kruse mo ni isi o fuafuaga i fafo.

Ina ua fesiligia e Faimealelei ia Ma’o pe fia ni talosaga mo galuega o le galulolo o lo o taoto i le latou ofisa e le i faia i ai sa latou fa’aiuga, na fofola aao o le tama’ita’i sui fa’atonu ma saunoa i le komiti e fa’apea, “e leai ma se talosaga mo ni galuega o le galulolo o taatia i le matou ofisa i le taimi nei, o talosaga uma lava sa fa’aoo atu e ni isi o ofisa o le malo e aofia ai le Ofisa o Galuega, ua uma ona faia i ai le fa’aiuga ma ua mae’a fo’i ona fa’atino ia galuega”.

Na toe fesili Faimealelei ia Ma’o pe moni molimau ua mafua ona tuai le amataina o galuega i ni isi o nu’u ma itumalo, o lo o tau fa’atali pemita mai le latou Ofisa, na soisoi le sui fa’atonu ma toe saunoa, “e leai ni talosaga mo ni pemita o ta’atitia i le matou ofisa, o talosaga uma lava ua uma ona toe fa’afo’i i ofisa o le malo sa auala atu ai”.

Ina ua fesili le to’atele o faipule mo galuega i totonu o latou afioaga ma itumalo talu mai le galulolo, po o i ai ni talosaga o taoto i le Ofisa o Oloa a le malo, na tali Ma’o e leai ni talosaga o i ai.

Mo se fa’ata’ita’iga o le afioaga o Fagatogo lea na fesiligia e le ali’i faipule ia Maugaoalii Leapai Tusipa Anoa’i, po o i ai ni isi talosaga mo galuega o lo o fia fa’aleleia mo lona nu’u e pei o auvai, ae na tali le molimau e leai ni talosaga mo Fagatogo o totoe i le latou ofisa, se’i vagana ai lava le talosaga mo le fausiaina o le taligalu i tua o le Tedi of Samoa sa tu’uina atu, pau lava lea o le galuega sa talosagaina mo Fagatogo.

Na taua e Maugaoali’i lona le fiafia i le taligalu lea ua mae’a ona fausia i tua o le Tedi of Samoa, e fai o le maualalo ae leai lava fo’i se aoga pe afai ae toe tula’i mai se isi galulolo i le lumana’i.

Mo le afioaga o Fagaalu i le taligalu e puipuia ai le palapala o le paka lea ua amata ona tafea i le sami, ma fa’asolo atu ai i tua o le faleaoga a le Aoga a Matafao, e leai ma se talosaga mo se pemita o i ai e pei ona molimau Ma’o.

E fa’apena fo’i i le afioaga o Aua, Nuuuli, Pago Pago ma le fa’asolo atu i le falelima i Sasae e pei ona fesiligia ai le molimau, e leai ma ni talosaga mo ni pemita mo galuega tetele o lo o fuafua e fausia ai.