E $1.8 miliona e le i mafai e le Pulega o le Eletise ma le Suavai a Amerika Samoa (ASPA) ona latou aoina mai i le Kuata 1 o le Tausaga Tupe lenei 2016, e pei ona taua i le latou ripoti mo le Kuata muamua.

O lo o taua i le ripoti a le ASPA e fa’apea, o se tasi o fa’afitauli ua le mafai ai ona latou ausia tupe sa valoia e maua mai i le Kuata 1, e mafua mai i le fa’aitiitia lea o le tau o le suau’u, aemaise ai le tuai mai o tupe fesoasoani mai le feterale, ma tula’i mai ai loa a latou tupe sa mafai ona ao mai i le $28.5 miliona, ae $29.1 miliona a latou tupe fa’aalu, mo ulua’i masina e tolu o le Kuata 1 na te’a nei, lea e aofia ai Oketopa e oo mai ia Tesema 2015.

Talu ai o suiga e pei ona taua, na fa’aitiitia ai loa e le ASPA a latou tupe fa’aalu mai lo le aofa’i sa fa’atulaga i le paketi, ona o le taumafai ina ia fa’a fetaui ma tupe sa mafai ona latou aoina mai i auaunaga ma a latou tautua masani.

E ui i le laititi o tupe sa mafai e le ASPA ona ao i le Kuata 1, ae na mafai lava ona latou ausia ni isi o matati’a mo le latou auaunaga i le atunu’u, e pei o ana auaunaga i le suavai, eletise, suavai lafoa’i ma le lapisi.

O ni isi o lu’itau o lo o taua i le ripoti o lo o fetaia’i pea ma le Pulega i le tele o taimi, o le tulaga lea i le aoina mai o tupe e fa’atupe ai isi a latou auaunaga.

“O le tulaga i tupe o lo o taumafai e ao mai, o le isi lea lu’itau tele o lo o matou feso’ota’i pea, ona o le taumafai e fa’atupe ai ni isi o poloketi mo le fa’atinoina o la matou auaunaga. O ni isi o lu’itau e aofia ai fela’uaiga mo Manu’a, ma ua matou molimauina ai le avea pea lea o lea tulaga o se lu’itau tuga mo le Pulega i masina ta’itasi,” o se vaega lea o le ripoti a le ASPA sa tauaao atu e le Pulesili, le afioga i le matua ia Utu Abe Malae.

Ona o ia tulaga o lo o avea ma fa’afitauli i le tautua a le ASPA, o lo o fa’aauau pea ona latou galulue soosoo tau’au ma le Pulega  Uafu ma Malaeva’alele ina ia mautinoa, o lo o tulaga lelei ma fa’aauau pea fela’uaiga mo Manu’a i soo se taimi e malaga ai le MV Sil fa’alua i le masina.

I le tulaga o le Suavai Lafoa’i, ua mae’a nei ona fausia le galuega mo le tosoina lea o paipa e fesootai ai le afioaga i Fagatogo mo le suavai lafoa’i, i lalo o se galuega sa fa’atupe e le feterale, ae mo nofoaga o lo o fa’aaogaina ai tane (septic tank) o lo o fa’atupe e le US-EPA, e 17 nofoaga sa talosagaina ai tane nei ua pasia e le UA-EPA, ma ua amata ona galulue le Ofisa mo le fausia o tane i le mae’a ai lea ona talia e le Ofisa e pasiaina pemita mo galuega o talosaga (PNRS).

I vaega tupe sa fa’apaketi mo le vaega a le Suavai Lafoa’i, e lata i le miliona le tupe ua mafai ona fa’aaluina e lea vaega e fa’atino ai ana galuega mo le ulua’i tolu masina o le tausaga tupe lenei, ae lata i le $50,000 na fa’aaoga e le vaega o le Lapisi e fa’atino ai fo’i lana auaunaga.

Na taua i le ripoti le aga’i i luma o le auaunaga a le vaega o le Lapisi, ma ua to’atele fo’i le atunu’u ua latou molimauina le tulaga lelei o lea tautua, e pei ona galulue ai le ASPA ma ni isi o konekarate tua i le fa’atinoina lea o le galuega.

O se tasi o itu o lo o ave i ai le fa’amamafa a le Ofisa o le ASPA i le taimi nei, o le tautua a le vaega o le Suavai taumafa mo le atunu’u, lea ua latou fa’aaluina le $2.4 miliona mai le latou paketi fa’atulagaina e $4.4 miliona e fa’atupe ai ni isi o ana auaunaga.

O ni isi o galuega sa fa’atinoina talu mai le Kuata 1 e aofia ai le toe faia o suiga i tane tetele o lo i luga o le mauga i Utulei, le Tramway, lea ua 85% le aofa’i o le galuega ua mae’a ma le fa’amoemoe, e tatau ona mae’a atu le Kuata lona lua ua mae’a atoa le galuega.

O le fa’afitauli sa tula’i mai i le vaivai lea o le suavai mo ni isi o aiga i le afioga i Tula ua mae’a nei ona foia, ma ua toe molimauina le malosi o le suavai i nofoaga maualuluga e pei ona tula’i mai ai le fa’afitauli.

O se tasi o fa’afitauli i le tulaga o le suavai taumafa ua mae’a fo’i ona foia, o paipa sa liki mai ai le suavai mai fa’atanoa vai i ni isi o afioaga, po o suavai fo’i ia e le o totogia.

E le o toe mamao se taimi ae mae’a loa le galuega tele o lo o fa’agasolo i Satala, mo le fausiaina lea o le nofoaga autu e tu’u i ai afi a le ASPA. Ua mae’a ona fausia ma fa’apipi’i afi eletise e 7 atoa ai ma nofoaga e fa’atutu ai, pau le tulaga o lo o fa’agasolo i le taimi nei, o le fausiaina lea o le puipui e 8 futu lona maualuga mo taimi o galulolo, ma ua fa’amoemoe e tatau ona o o atu i le masina o Me 2016 ua mae’a atoatoa lenei galuega.

E tusa ai ma le ripoti ua taoto a le ASPA, e to’a 417 le aofa’i o ana tagata faigaluega o lo o fa’atinoina la latou auaunaga mo le atunu’u, ma e tusa ma le $69,000 ua fa’aitiitia ai le tupe na fa’aaoga e le vaega a le Eletise e fa’atino ai lana auaunaga o le atunu’u i le Kuata 1, nai lo le aofa’i o le tupe sa fuafua ma valoia i le paketi e tata’u ona fa’aaoga.