E le o tagata ‘overstayer’ uma ua mae’a ona lesitala o latou suafa i le polokalame a le Kovana o le ‘Amnesty Prgoram’ e agava’a i latou i le polokalame, e pei ona fa’amalamalama e le Loia Sili i luma o le Komiti o Mataupu Tau Tulafono a le Senate i le vaiaso na te’a nei.

Na taua e le Loia Sili o le malo ia Talauega Eleasalo Ale e fa’apea, tusa lava pe ua uma ona lesitala le tagata i le polokalame, ae afai e iloilo atu e le komiti faafoe ana faamaumauga ae maua ane ai e le agava’a o ia, e le taitai taliaina lea tagata i le polokalame.

Mo se fa’ataitaiga o se tagata sa faamaonia e le faamasinoga sana solitulafono mamafa, o le isi lea mafua’aga e le talia ai se tagata i lalo o le polokalame.

O lea iloiloga na valaauina e le Komiti a le Senate, i lo latou fia malamalama atili lea i le polokalame o le ‘Amnesty’, ae maise ai o le pili taufaaofi mai le faigamalo lea ua i luma o le Fono, e talosagaina ai se suiga i le tulafono mo tagata mai fafo e talia i le teritori i le tausaga e tasi, ina ia suia le numera o lo o i ai i le tulafono ae maua ai le avanoa o tagata mai fafo ua maea ona lesitala i le polokalame e fa’aleleia ai a latou pepa nofomau.

Na taua e Talauega i lana saunoaga i luma o le komiti, o le fa’afitauli i tagata mai fafo o lo o nonofo faasolitulafono i le teritori, o lo o aafia ai ni isi o tautua a le malo e pei o le falema’i, aoga ma isi.

Na fesiligia e le komiti le alii loia, i le mafua’aga ua ala ai ona a’e se manatu i le kovana e faia le polokalame lenei, ae na tali le loia sili, “o le agaga atoa o le kovana ma le faigamalo, ia aumai i latou nei e le o i ai ni pepa nofomau e fa’aleleia a latou pepa nofomau, ina ia agava’a i latou i galuega ma amata loa ona totogi a latou lafoga mo le malo, e fesoasoani ai fo’i i le totogiina o isi pili o lo o totogi e le malo”.

O le isi laasaga o le polokalame lenei pe afai ae pasia e le fono le pili taufaaofi, o le amata iloilo lea e le komiti faafoe o igoa uma o tagata ua lesitala.

O atugaluga o ni isi o senatoa, ina nei avea le polokalame lenei ma auala e talia atu ai ma le tagata ua uma ona faamaonia e le faamasinoga i ni solitulafono mamafa, ma maua ai fo’i le avanoa e nofo ai pea i le teritori, ae na faamanino e le loia sili, e le manaomia e le malo ni tagata mai fafo e solitulafono.

O tagata e silia i le 3,000 ua uma ona lesitala i le polokalame, o ni isi o i latou nei sa i ai muamua a latou ID, peita’i ua le mafai ona toe fa’afou ina ua malaga i fafo a latou sponsor, ma ua fautuaina i latou nei e saili ni isi a latou sponsor.

Na tautino le loia sili i luma o le komiti, afai e sologa lelei le faamalosiga o tulafono tau femalagaaiga e pei ona latou amataina i le taimi nei, e i ai lona talitonuga e le tatau ona toe i ai ni tagata mai fafo e nonofo faasolitulafono i le atunuu i le lumanai.