O le fuafuaga a le Ofisa o Lafoga a le malo e fa’alafoga alofa o ali’i faifeau, e le gata ua fa’aalia ai le tete’e o ni isi o faifeau ma totino o Ekalesia eseese i le atunu’u i lea fuafuaga, ae sa latou taua fo’i le leai o se mea e toe tau tipi ai fua le lafoga mo alofa o ali’i faifeau.

“Aisea e toe fa’alafoga ai fua alofa o ali’i faifeau, o lea lava ua mae’a ona tipi ese le lafoga ma le saogalemu i le taimi nei, afai e le o faia uma e faifeau o isi Ekalesia, o le galuega la lena a le malo e fai, o le saili po o fa’alafoga alofa o faifeau uma i le atunu’u, ae o le matou Ekalesia, o lo o tipi le lafoga ma le saogalemu a le faifeau”, o le saunoaga lea a le susuga a Tui Epati, o le Teutupe lea a se tasi o Ekalesia EFKAS i le Itumalo o le Maoputasi.

E to’afa ali’i faifeau atoa ai ma Ofisa maualuluga a ni isi o aulotu na fesiligia e le Samoa News e fa’atatau i le mataupu lenei, ma latou taua ai le mae’a lea ona fa’alafoga o alofa a latou faifeau o lo o maua i le taimi nei.

“Ua silia ma le 20 tausaga talu ona faia e le matou aulotu le fuafuaga lea, e o o lava i le matou faifeau fou lea ua sefulu tausaga talu ona matou galulue, o lo o fa’aauau pea e o o mai i le taimi nei”, o le saunoaga lea a le Tiakono a se tasi o aulotu EFKAS i le itu i Sasa’e o le atunu’u, e le i finagalo e fa’ailoa lona suafa.

E o o lava fo’i i susuga i ali’i faifeau na fesiligia i lenei mataupu, e leai se isi o i latou na finagalo e fa’ailoa o latou suafa, ona o manumanuga lava ina ne’i a’afia ai a latou galuega ona o a latou finagalo fa’aalia.

Saunoa le isi faifeau e fa’apea, i lona lava talitonuga, e le tatau ona fa’alafoga le alofa a le faifeau o lo o maua, o le taulaga lea o lo o foa’i atu e le Ekalesia e tausi ai le faifeau ma lona aiga, o lo o galulue e fafaga le soifua fa’aleagaga o tagata.

“O tagata uma lava o lo o galulue i soo se galuega i le atunu’u, o lo o galulue mo le taui, o vaiaso ta’itasi po o le ta’ilua fo’i e maua ai a latou totogi, e le tagata i lea, e tofu le tagata ma lona maota, o lana ta’avale, o le fanua, ma le anoanoa’i o ana meatotino o lo o i ai, ae o le faifeau, o le tagata ese o lo o aumau i lea nu’u ma lea nu’u, e leai sona fale, e leai sona fanua, o lana galuega, o le tapu’e lea o le soifua fa’aleagaga o le aulotu ma tatalo ina ia manuia galuega o lo o galulue ai le aulotu, ona fa’amanuia lea o le Atua i le aulotu e ala i tupe ma soo se fa’amanuiaga, ma foa’i atu ai loa e le aulotu tupe e fai ai lo latou alofa i le faifeau, i lo’u la talitouga, o le alofa, o le tupe paia o lo o foa’i atu e tagata ekalesia mo le faifeau, o lana taulaga fo’i lea i le Atua”, o le saunoaga lea a se tasi o ali’i faifeau ua silia i le 30 tausaga o lana auaunaga i le galuega a le Atua.

Na taua e Latu Apelu, o se tasi o tama matua mai se tasi o ekalesia i le itu i Sisifo o le atunu’u e fa’apea, so o se tupe o lo o totogi ai faifeau e pei o le alofa, teutusi o lo o ave fa’ameaalofa atoa ai fo’i ma faifeau o lo o maua a latou totogi, o le tupe paia lea o lo o ofo atu e tagata aulotu e fai meaalofa ai i le faifeau, o le latou sefulua’i fo’i lea i le Atua, o le tupe paia a le Atua, e le tatau fua la ona fa’alafoga.

Na taua e le ali’i pule o le Ofisa o Lafoga ia Richard Jimmerson i le Samoa News i le vaiaso na te’a nei e fa’apea, so o faifeau e i ai sona laisene na te maua se tupe mai so o se galuega na te faia e aofia ai le tausi aulotu, faia o fa’aipoipoga, maliu, fa’aulufalega, ma so o se isi lava auaunaga, e agava’a lea tupe maua ona fa’alafoga i lalo o tulafono lotoifale a Amerika Samoa.