Ua fa’alauiloa e le alii sa avea ma Pulesili (CEO) o le falema’i o le LBJ ia Joseph Davis-Fleming e faapea, na te ono finauina i le fa’amasinoga le mataupu lea ua tuuaia ai o ia e le Komiti Faafoe a le LBJ,  o ia le mafuaaga ua tele ai faafitauli o lo o feagai ma le falema’i, e pei ona taua i le ripoti a le Medicaid ma le Medicare (CMS).

O le tausaga na te’a nei na amata galue ai Fleming i le LBJ mo lana konekarate e 3 tausaga, peita’i o le vaiaso muamua o Iulai na fa’amavae ai o ia mai lana galuega, ae o le aso Faraile na te’a nei na ia faatoa tuua ai le teritori ae malaga atu i Texas, mo le faamautuina o gaioiga uma mo lana galuega fou i le falema’i i Rwanda i Aferika.

I se imeli na maua mai ia Fleming i le vaiaso nei i Hawaii, sa ia taua ai ni isi o tuuaiga faasaga i le Komiti Faafoe o le LBJ, e pei o le latou faaopoopo lea o tupe latou te maua i taimi o a latou fonotaga ta’i fa’alua i le masina i le ta’i $200, atoa ai ma le totogi o i latou ina ia latou pulea ai le falema’i a le malo.

I tulafono a Amerika Samoa o lo o taua ai le fono o le komiti faafoe pe a ma le fa’atasi i le masina, o sui foi o le komiti e totogi latou i le ta’i $5,000 i le tausaga, sei vagana ai le taitaifono e $6,000 lona totogi i le tausaga.

E ese mai i tuuaiga faasaga i totogi ua sili a le komiti faafoe i taimi o a latou fonotaga, o lo o tuuaia foi e Fleming le komiti faafoe i lo latou totogiina lea o i latou lava ina ia mafai ai ona latou pulea le falemai i taimi e toesea ai le ‘CEO’, ma o se faiga lea ua soli ai tulafono ma ta’iala a le feterale, o se tasi lea o vaega e tele o lo o taua i le ripoti a le CMS.

O tupe o lo o tuuaia e Fleming ua toe faaopoopo e sui o le komiti faafoe mo a latou faamanuiaga tau tupe, e le i aofia i totonu o le paketi a le falema’i, ae o tupe fo’i nei sa tatau ona alu e tausi ai tagata mama’i.

Sa ia taua fo’i e fa’apea, e ui i nei taumafaiga uma a le komiti faafoe, o galuega uma lava mo le faagaioiina o le falema’i o lo o fa’atinoina uma e le pulega a le falema’i.

Na taua foi e Fleming le pepelo o le molimau a le taitaifono o le komiti faafoe (Leilua Mase Akapo) sa fai i luma o le fono, e fa’atatau i le leai o sona sao e foia ai faafitauli e pei ona taua i le ripoti a le CMS, aemaise ai o le faamatuuina atu o faamaumauga e fa’atatau i le faatinoina o ana galuega i tusitala.

Na taua e Fleming e fa’apea, o le ali’i faipule ia Faimealelei Anthony F. Allen na faamatauuina faamaumauga faasaga ia te ia, o ia fo’i lea o lo o mafua ai le tele o faafitauli, ma, e feteena’i le avea o ia ma totino o le komiti ae o ia fo’i o le faipule.

Ina ua fesiligia e le Samoa News le afioga a Faimealelei e tusa ai o lenei mataupu, sa ia teena ai lona faamatauuina atu o ripoti faasaga ia Fleming e pei ona tuuaia ai o ia.

Na taua e Faimealelei e fa’apea, o latou ma le loia sili ma le susuga a Fleming na nonofo i lalo, ona ia faitau lea o vaega uma o le tusi e faamuta ai le tautua a Fleming ia te ia, ina ua mae’a, sa ia tauaao atu loa le tusi ia Fleming.

Saunoa fo’i Faimealelei e fa’apea, afai e saili le tagata na ia ave kopi o le tusi i tusitala, o Fleming lava, ma o se itu e faanoanoa ai le faatali o Fleming sei alu ese atu ma le atunuu ona faatoa fai mai lea o ana faasea ma tuuaiga.

Fai mai Faimealelei, talu mai le taimi na faatoa faa faigaluega ai Fleming e oo mai i le taimi na muta ai lana tautua, na te lei faia ma se galuega e foia ai faafitauli na taua e le CMS i lana ripoti o le 2010.

fa’aliliu Ausage Fausia