O A'U FA'APEA LAVA NA E SAU E TOE FA'AFO'I

Na masau ane le ta'avale na ave mai e le tama o Patolo, i le saoga lea e sau mai tai i le uati lea i Apia, e alu agai i uta i le magatolu lea e i Taufusi, ae o le sau i uta le ta'avale a Leoleo, taofi atu le ta'avale ae ua le tu mai, liliu loa ma fai loa tuliga. Ua 'oso atu le tuliga i uta i Sinamoga, tau atu i le isi magatolu 'oso i Alafua, ia 'oso atu i le auala fa'alava i uta o Alafua, toe 'oso a'e i tai i Lotopa, toe fa'asasa'o mai i Pesega.

E o'o mai le tuliga i'ina, oka o le la e poloka mai le auala i le fai auala, taufetuli atu loa ma Leoleo ua toso mai i fafo le ave ta'avale ma ave loa loka. Ua loka nei le tama o Patolo, ua o'o i le aso o lona fa'amasinoga, valaau mai le ali'i Leoleo, "O le fa'amasinoga lenei i le va o Patalo ma le Ofisa o Leoleo.!!" savali atu loa Patolo ma tu i luma o le fa'amasino, ia fesili atu loa le ali'i Fa'amasino.

"O le ave ta'avale saoasaoa, ana e le poloka lava i le faiga auala la i Pesega, semanu lava e le maua lava oe..e moni ea moliaga...te ioe i ou moliaga ia, lou susuga Patolo ?"

"Ioe e moni ma fa'amaoni, e leai lava se mea ou te tete'e ai. O a'u o se tagata e tausi tele i tulafono o lo'o fa'amalosia nei e ali'i Leoleo, po'o o Malu fo'i o le Malo."

"O a'u fo'i o le tagata to'aga tele i le lotu, ae i le tolu vaiaso i te'a atu nei, ma matu'ai atoatoa ai lou fiafia ia te a'u."

Na toe fai atu lea o le tama o Patolo, "Ina ua manava mai i le galuega, ua leai so'u toalua, fai mai tamaiti o lo'u aiga o le ua o ma le Leoleo, e leai se mea e gata mai lou fiafia, ua tumu a'u i le fiafia ua alu atu ai le fafine. Ae te'i i lo'u vaaia le ta'avale a Leoleo ua tuli i lo'u ta'avale."

Na fa'a'auau pea le tala i si tamaloa o Patolo, "FA'APEA A'U IA, AI UA KOE SAU LE LEOLEO E MOMOLI MAI LE FAFIGE."

ALI'I FOMA'I MA LE TOEAINA O LUA

Ua o le toeaina o Lua ma lana to'alua e vaai lana foma'i i Fagaalu, ma fai loa le foma'i, "Ua a mai ?" fai atu le toeaina o Lua, "Ua ese lava le alofa o le Atua ia te a'u i lenei vaitaimi ua ou malosi lava." fai atu le foma'i, "Oi malo lava o lena ua tele le suiga ia te oe ali'i Lua."

Fai atu le toeaina, "Ua ou talitonu i le alofa o le Atua ia te a'u, a o'o i le po ou te savali ai e fa'aaoga le faletaele. oute savaliatu, e le tau kiina le moli, e ta'ala loa le faitoto'a fa'afuase'i ona ola le moli, e uma loa ona fa'aaoga, ia te'i lava ua pe'a tapuni atu le faitoto'a."

Fai atu loa le foma'i i le olomatua, se'i sau lava i totonu i la'u ofisa, fai atu le foma'i e uiga e tala nei na fai atu ai le toeaina, po'o le a mea ua tupu i le toeaina, ae lele mai le olomatua, "O i aue, vaai oe le ali'i foma'i, e leai lava se Atua ki moli i totonu o le ma fale, leaga le toeaina e valea tele, o totonu o le PUSA AISA lena ua fai ai lana feau vai....."

TAMA LEAGA E LE PALAA'I I SE ISI

Alu atu le tamaloa o Tia i lana solofanua i o'o mai loa i le pa (bar beer) i le isi pa i Apia, nonoa loa i fafo lana manu ae alu loa i totonu ma inu ai. Inu, inu ona sau loa e asi mai lana solofanua, ua leai se mea, toe alu atu loa i totonu o le pa fa'asasa'o atu loa i le mea fa'aleo tele leo o le fa'ali ma fai loa.

"Ia uma atu la'u fagu vailima ua toe aumai la'u solofanua, a leai, o le a ou toe FAIA TOE FAI FO'I LAU MEA LEA I LE VAIASO NA TE'A NEI." Ia uma lo'u fagu Vailima lea tasi, oute alu loa i le'o nonoa maia mai solofanua ua tupu loa ma le mea. E sau i fafo ua atu lona solofanua, 'oso loa i luga ma alu loa. Ae tamo'e mai lava le patena (bartender) ma fesili loa ia Tia, "O le a lau mea na fai i le vaiaso ua te'a." ae tali atu i ai le tamaloa fia tama leaga, "SA OU SAVALI I LE FALE."

 LAUGA O LE FAIFEAU

Ua le iloa le pulou a toeaina o Lafolafoga, o le mea na fai, na fa'atalitali lelei lava a o'o loa i le aso Sa, ua sau nei i le Falesa e su'e ai sana pulou, aua e toatele fo'i toeai'ina e o atu i le lotu ma a latou pulou, ae tautau i le pito i tua o le falesa. A o le mafaufauga na o'o i le toeaina, e o'o loa i le taimi o le Lauga ia tu loa i luga se'i mai loa sana pulou a se isi tagata ma alu loa i le fale, ae te'i ua o'o mai i le Lauga ua te'i lava ua manaia le lauga i lana fa'alogo.

O le lauga i Tulafono e 10 lea na fai mai e le faifeau, uma le lotu sau i fafo ma feiloa'i ai ma tagata lotu, alu atu loa si toeaina a Lafolafoga, na feiloa'i loa ma le Faifeau, fai atu loa i le Faifeau, "Malo lava le lauga, manaia tele i le fa'amanatu mai 'ia matou Tulafono e 10, aemaise lava o a'u ali'i Reverend."

Fai atu loa le Faifeau, "O le fea le vaega tonu lea o le tulafono 10, o le AUA LE GAIO ?." fai le toeaina lea, "E leai...e leai e le le'o vaega lena o le tulafono. Ae o le vaega lea E AUA LE MULILUA...lea ua fa'ato'a ou manatua le mea na GALO AI LO'U PULOU fa'afetai tele lava le fa'amanatu mai."

UA GALO IA TE A'U

Uma le tifaga ua o le fale o le ulugali'i lea o Sione ma si ana to'alua ma le uo lelei lava a Sione, o Iosua, sa nonofo lava i luga o nofoa, fai atu le toeaina o Sione, "Honey..se'i alu lava e aumai ni ma apa Coors Lite ma Iosua." Ia o'o i le isi taimi ua valaau atu le toeaina i lana to'alua, 'Sugar' a leai le lena, o le isi taimi 'Baby' a leai lena o 'Hon"

Fai atu loa le toeaina o Iosua, "Sole fa'ato'a fa'alogo lava lea ua e valaau ina si olomatua i na mau igoa....a ali'i Sione ?..... ua leva tausaga ae o le a fa'ato'a fa'alogo ia te oe ua e fa'aiogaina igoa mananaia ?" Ae musumusu mai le toeaina o Sione, "Ua atoa nei le lima tausaga UA GALO IA TE 'AU LONA IGOA."