Ads by Google Ads by Google

FA’AAOGA SESE LE TAUTUA A LE ‘ER’

Atonu e le te’i te’i vale le fa'afofoga a le atunu'u i se mata'upu na fa'aalia e le ali'i pule o le falema'i a le LBJ fai mai, mai le aofa'iga e tusa ma le 40,000 o gasegase e asia le falema'i i le tausaga i le potu tigaina ma gasegase fa'afuase’i (Emergency Room), e na o le 5% o i latou ia o gasegase  mo’i lava e mana'omia togafitiga fa'anatinati.

Na ta'ua e le ali'i pule o le falema'i o Michael Gerstenberger e fa'apea, o lea amio e foliga mai o se mea ua masani ai tagata o le atunu'u e fai, ina ia mafai ai ona vave maua togafitiga i le falema'i, peita'i i lona talitonuga, afai ae fa'aitiitia togafitiga e mana'omia  i le potu mo gasegase tigaina, o le a mafai fo'i ona fa'aitiitia le umi lea e fa'atali ai tagata o le atunu'u mo le va'aiga o se foma’i.

Na ta'ua e le ali'i pule e fa'apea, e mana'omia ona a'oa'oina mafaufau o le atunu'u ina ia latou iloa le 'ese'esega o tautua i le falema'i, ina ia mafai ai ona aga'i sa’o atu mo le va'aia o le togafitiga o lo o mana'omia.

Ae na ta'ua e ni isi o le atunu'u i le Samoa News e fa'apea, e mafua ona faia e ni isi o le atunu'u lea gaoioiga, ina ia taofia ai le fiu e nofonofo ma fa'atalitali se foma’i.

ìO isi tagata e silia lava i le 4 itula o nonofo e fa'atali se foma’i e leai lava se isi e alu atu, ae o lea tagata o lo o a'afia i se gasegase e mana'omia le faia i ai o se togafitiga fa'avavevave,î o le saunoaga lea a Timoteo Lumana’i o Aua.

Fai mai se tasi o tama matua, o ni isi o aso pe alu e va'ai le foma'i, e toeitiiti lava ta le 10:00 i le taeao fa'atoa amata ona gasolo tagata e va'ai le foma’i, ae na latou  nonofo mai lava i le falema'i e lei ta le 8:00 i le taeao.

ìO fea la e fa'avae mai ai o latou manatu fai mai afai e fa'aitiitia tagata e uia le ER ona vave lea ona maua le avanoa e va'ai ai le foma’i,î o le fa'asea lea a le susuga Lumana’i.

O le mata'upu i le tautua a le falema'i, e le fou i le fa'afofoga a le atunu'u ae maise lava i luga o le polokalama a le ali'i kovana i fa'ai'uga o vaiaso ta'itasi, ona o le naunau o le atunu'u e fa'aleo i le matua ia Togiola Tulafono fa'afitauli nei, ina ia mafai ai ona vave maua se fofo.

O le to'atele  o tagata e fa'asea i le falema'i, e afua atu i le fiu lea e fa'atali le taimi e va'ai ai se foma’i.

Na ta'ua e Gerstenberger i le feiloa'iga ma le 'aufaipisinisi i le vaiaso nei, e mafai ona fa'aleleia le tautua a le falema'i pe afai e galulue fa'atasi le atunu'u ma le falema'i, ma ia fa'aitiitia le manatu o le to'atele, e vave atu le fa'aaoga o le tautua a le ER e lelei e vave maua ai le foma'i,  aua o lea tulaga o le a a'afia ai ma le tautua a le foma'i mo le va'aia o isi gasegase.