O le tele o manaoga tau tupe na fetaia’i ma se ulugali’i i le atunu’u, e aofia ai ma le nofo aitalafu o se tasi o pisinisi sa la puleaina, na mafua ai loa ona unaia o la loto la te fa’aaoga sese tupe sa la maua mai le polokalame o le ‘1602’, lea na faatupe mai e le feterale e fausia ai fale mautotogi mo tagata lima vaivai, e pei ona fa’aalia e le itu a le ulugali’i ua molia i ni fa’afinauga sa tu’uina atu i luma o le fa’amasinoga feterale i le laumua i Uosigitone i le vaiaso na te’a nei.

O John Emil Kruse ma lona faletua ia Elaine Kruse, o lo o molia i laua e le malo feterale i moliaga ta’itasi, o le la fa’aaoga lea ma le iloa o meatotino a le malo, mo manaoga tau pisinisi atoa ai ma manaoga mo i laua lava.

O le susuga a John Kruse, e le gata o ia o le Fa’atonusili o le Ofisa e Pulea Tauofoga ma Meatotino a le malo, ae o i laua fo’i ulua’i tagata Amerika Samoa na fa’amanuiaina i le tupe o le polokalame a le ‘1602’ ua molia e le malo feterale.

O le la ulua’i iloiloga sa faia lea i le aso 14 Novema 2014, lea sa fa’aaogaina ai ituaiga feso’otaiga e taua o le ‘video conference’, sa fa’amauina ai le tete’e o i laua i tu’uaiga a le malo feterale, ma ua fa’atulaga ai loa le isi a laua iloiloga e faia lea i le aso 5 Fepuari 2015, lea o le a la tali ioe ai i tu’uaiga fa’asaga ia te i laua, ma lau ai fo’i ma le la fa’asalaga.

I le mataupu a John Kruse, ua talosagaina ai e le itu tete’e se fa’asalaga nofova’ava’aia mo ia, e aofia ai se fa’asalaga fa’a falepuipui e tuli lava i lona fale (home detention) i so o se umi e finagalo i ai le fa’amasinoga.

Ae mo Elaine Kruse, ua talosagaina fo’i e le itu tete’e se fa’asalaga nofva’ava’aia mo ia, ia aofia ai ma se tu’utu’uga o se fa’asalaga fa’afalepuipui i lona fale mo le 12 masina, atoa ai ma ni isi lava tu’utu’uga e finagalo i ai le fa’amasinoga.

Sa fa’ailoa fo’i e le itu tete’e i le fa’amasinoga le malilie o le ulugali’i, la te toe totogiina i le malo feterale so o se vaega tupe e fuafua atu e le fa’amasinoga, a ia le ova atu ma le $200,000.

I se vaega o le fa’afinauga a le itu tete’e sa tu’uina atu i se tusitusiga e 24 itulau i uma o le fa’amasinoga, e le gata o lo o taua ai le ofo atu e John Kruse o lona lava fanua e fausia ai le la fale sa fuafuaina i lalo o le polokalame, ae sa ia talosagaina fo’i se vaega tupe e $1.2 miliona e fa’atupe ai le la galuega, peita’i e na o le $864,095.04 na pasia e le Pulega a le Faletupe o le Atina’e a Amerika Samoa.

Ua finau fo’i le itu tete’e e fa’apea i le tulaga sa’o lava ia sa tatau ona i ai le mataupu lenei, sa le tatau lava i le ulugali’i ona la taliaina le tupe ina ua fa’aitiitia le tupe sa la taosagaina mo le la galuega, ae sa tatau ona la teena.

Ui o lea, sa la manatu e talia le tupe ua tu’uina atu, ma le fa’amoemoe e fausia ai le la galuega, i le mae’a ai lea ona maua atu o se fa’amalosiga mai le kovana o Amerika Samoa ina ia fa’aauau pea le la galuega, e ui e le taua i le fa’afinauga le suafa o le kovana atoa ai ma le taimi sa faia ai lea fa’amalosiga.

I le taimi na amata ai loa ona galulue le ulugali’i mo le fausiaina o le la galuega, o le taimi tonu fo’i lea ua leai ma ni konakarate fau fale lelei o lo o totoe, ua toe lava o konekarate e leai se agava’a e fa’atino ai le galuega, ona ua tele ina fa’aaoga konekarate lelei i isi fo’i galuega a le polokalame lava lea

A o fa’agasolo pea le galuega, o le taimi fo’i lea sa maitauina ai e le ulugali’i le tele o manaoga tau tupe ua fetaia’i ma i laua, e aofia ai ma le aitalafu a se tasi o pisinisi sa la puleaina o le Region Pac, ma manatu ai loa John Kruse o le a la fa’aaogaina se vaega o le tupe sa la maua mai i le polokalame, e tali atu ai i ni isi o manaoga mo le la aiga atoa ai ma le la pisinisi.

Mo Elaine Kruse e pei ona taua i le fa’afinauga a le itu tete’e, sa ia taua lona fa’atinoina o le solitulafono ina ua tele galuega sa feagai ma ia, atoa ai ma le le mautonu o le mafaufau i fa’aiuga fai, ina ua ia vaaia fo’i le leai o se tali i le tele o le mau fa’afitauli ua fetaia’i ma laua ma lona to’alua, ae ua vaai fo’i le le lava o le la fa’asoasoa i le itu tau tupe.

(O le fa’aauau atu i le aso a taeao le vaega lona lua o lenei mataupu).

fa’aliliu Ausage Fausia