O lo o fa’aauau pea le tu’uina atu e le malo o ana fesoasoani mo aiga na a’afia maota ma laoa i lologa ma timuga i le vaiaso na te’a nei, e ala i le sapalai atu o taumafa mo i latou i nofoaga o lo o fa’amautu ai i le taimi nei, a o fa’agasolo ai galuega mo le toe fa’aleleia o maota ma laoa sa fa’aleagaina i le tetele o tafega.

O le ulua’i fonotaga a le kapeneta ma le afioga i le alii kovana ia Lolo Matalasi Moliga i le aso To’ona’i na te’a nei, talu ona toe taliu mai le kovana i le atunu’u, sa ia fautuaina ai ni isi o fa’atonusili ina ia vaavaai po o a ni auala e mafai ona fesoasoani atu ai le malo i aiga na mafatia i le fa’alavelave, a o tau fa’atalitali ai ni fesoasoani mai le malo tele.

O fesoasoani na taua e le fa’atonusili o le Matagaluega o le Puipuiga o le Saogalemu Lotoifale (DHS) ia Utuali’i Iuniasolua Savusa e aofia ai le sapalai atu e le School Lunch o taumafa ta’i tolu i le aso, talu mai lava le aso na fa’aleagaina ai maota ma laoa seia o o mai lava i le taimi nei.

O aiga uma i le pitonu’u o Gataivai o lo o a’afia i lenei fesoasoani, e pei ona i ai le to’a 73 o lo o fa’amautu i le maota o le ali’i Faifeau i Gataivai lava, ma le to’a 13 lea na fa’amautu i le faleaoga a Samoana, ua tausia nei i latou i le maota o le Ekalesia EFKAS i Fagatogo, ma o lo o sapalai atu ai e le School Lunch i aso ta’itasi.

Saunoa Utuali’i e fa’apea, o le to’atele o aiga mai Gataivai, ua amata ona toe fo’i atu e toe fa’aleleia vaega o latou fale sa fa’aleagaina, pau taimi e fo’i ane ai i le nofoaga o lo o fa’amautu ai, o le taimi e taunu’u ai le latou taumafataga, se’i vagana ai le aiga e to’a 13 ona sui lea ua fa’amautu nei i le maota o le Ekalesia EFKAS i Fagatogo, o lo o tau sailia se fale mautotogi e aga’i i ai, ona ua fa’aleagaina le fale mautotogi lea sa nonofo ai i Gataivai.

Ua mae’a fo’i ona asia e le Matagaluega o le Soifua Maloloina nofoaga o lo o fa’amautu uma i ai aiga nei, ma ua fa’amaonia mai tulaga lelei ma le saogalemu, e pei ona fa’ailoa e Utuali’i i le latou fonotaga ma le ali’i kovana.

Ua fautuaina e Lolo le fa’atonusili o Galuega Lautele a le malo ia Faleosina Voigt ina ia aga’i atu ni isi o lana aufaigaluega e fesoasoani i aiga nei mo le toe fa’aleleia o vaega o latou maota ma laoa sa fa’aleagaina.

“E tatau ona taulamua le Ofisa o Galuega Lautele a le malo i le ofoina atu o galuega fesoasoani mo aiga na a’afia, afai latou te manaomia se fesoasoani mai le malo, ave i ai la outou fesoasoani, ua manaomia le tatau ona toe fo’i atu aiga i o latou maota ma laoa, ia fa’atino fo’i e le malo lana pito laau e fa’ailoa atu ai lo tatou naunau e ola fesoasoani mo le atunuu”, o le saunoaga lea a Lolo sa tu’uina atu ia Faleosina.

“Mo le vaega a le Pulega o le Eletise ma le Suavai (ASPA), e tatau ona mataitu e outou tulaga o le eletise ma le suavai po o tulaga lelei i aiga nei, afai ua motusia le eletise ma le suavai, ia mautinoa e toe ola. Talosaga atu foi i le Peresetene o le Faletupe o Atina’e, silasila ane pe le talafeagai ni nonogatupe mo ni isi o aiga ua a’afia, ina ia mafai ona maua ai se fesoasoani mo le toe fausia o fale e nonofo ai”, o le isi lea fautuaga a Lolo i isi sui o lana kapeneta.