E ui i fa’asea mai ni isi o le atunu’u e aofia ai ma le ali’i faipule ia Fatulegae’e Palepoi Mauga i le aumai fua o faiaoga mai Samoa, e a’oa’o fanau aoga i aoga maualuluga ma aoga maualalo i le atunu’u, peita’i na fa’amaonia e le Fa’atonusili o Aoga i luma o le maota o sui i le vaiaso nei, e fa’aauau pea le aumai o faiaoga mai Samoa e tali i le manaoga o lo o i ai, o le le lava lea o faiaoga.

Saunoa Vaitinasa Dr. Salu Hunkin-Finau i luma o le komiti o Aoga a le maota o sui e fa’apea, o le a fa’ataunu’uina pea le fa’amoemoe e pei ona galulue ai ma le malo o Samoa, i le aumaia lea o faiaoga ua i ai le agava’a fa’apitoa e galulue i Amerika Samoa nei.

E ui e le i fa’alauiloa e Vaitinasa pe to’afia le aofa’i sa’o o faiaoga ua fa’amoemoe e malaga mai, peita’i na pau lana saunoaga, “o le vaiaso fou lea ua fa’amoemoe e taunu’u mai ai se vaega muamua o faiaoga mai Samoa ua fa’amoemoe e malaga mai e galulue iinei”.

Saunoa le ta’ita’ifono o le Komiti o Aoga a le maota o sui ia Vaetasi Tuumolimoli Saena Moliga, o se tasi fo’i sa galue mo le Ofisa o Aoga i le tele o tausaga e fa’apea, e le taua po o fea e aumai ai le faiaoga, pau le itu taua i lona talitonuga, ia i ai se faiaoga na te a’oa’oina fanau aoga.

Saunoa Vaitinasa e fa’apea, o ni isi o faiaoga o lo o taumafai e saili mai i Samoa, o i latou e i ai le agava’a i mataupu fa’apitoa e pei o mataupu tau Sainisi, (Science) Su’esu’ega Lautele (Social Studies), atoa ai ma isi lava mataupu e maualuga ai lo latou silafia.

Ina ua fa’atoa fa’alauiloa le fuafuaga a le Matagaluega o Aoga mo le aumaia o faiaoga mai Samoa e pei ona fa’ailoa e Vaitinasa i le Samoa News i le vaiaso nei, e silia i le to’a 50 faiaoga sa fa’aalia lo latou naunau e fia malaga mai e tali i le valaau, ae talu ai o ni isi o fa’afitauli na tula’i mai ao tau fuafua mai lenei fa’amoemoe, ua fa’aitiitia ai i se aofaiga maoa’e le aofa’i o faiaoga o le a malaga mai.

Na fesiligia e le Samoa News Vaitinasa i se aofaiga sa’o o faiaoga o le a malaga mai, ae na saunoa le pule aoga e fa’apea, “e le o toe to’atele ni faiaoga ua fa’amoemoe e malaga mai”, e aunoa ma lona fa’ailoa sa’o mai o le aofa’i o faiaoga.

O le vaiaso fou lea ua taua e Vaitinasa e tatau ona o o atu i ai ua amata ona gasolo mai faiaoga mai Samoa, lea ua fa’amaonia le malaga mai e galulue i totonu o potu aoga.

Saunoa le ali’i faipule o lo o tete’e i le aumai o faiaoga mai Samoa ia Fatulegae’e mo le tau toe teuteuina o lana ulua’i saunoaga sa tuuina mai i lenei mataupu e fa’apea, “ou te le ita i le aumai o faiaoga mai Upolu, ae pau lou fa’anoanoaga, e i ai fo’i isi faiaoga Upolu ua leva ona faiaoga ae laititi o latou totogi, ae o le vaega fou lea o le a o mai, e le gata e saini totogi tetele i konekarate, ae o le a tele isi penefiti e agava’a ai e pei o fale e nonofo ai, ta’avale fa’apea ai ma alauni”.