Tatou ave le faafetai i le Bluesky Communications i le fesoasoani mai i le tuuina atu o tala o le liki kirikiti o le Fu’a o lenei tausaga.

I'A VAI (3-1) vs LUPELELE (3-2). I le aso Gafua ua te’a na tumutumu le au maimoa i le malae i Fagaalu aua le taaloga i le va o Lupelele mai 'Ili'ili, ma Teine o I'a Vai mai Malaeloa.

Sa manaia faate'a a Lupelele, le teine o Hanna ma Fa'atali ma isi o suite'a. E oo mai i le 15 'ai, ae ua lima pe a le I'a Vai.

Tau su'e mai e le I'a Vai a latou teine e to'alua, e faafetauia te'a a Lupelele. Ae na taia te’a i faiga a Fia ma Melissa.

E uma 'ae ona ta-ta le I'a Vai, ua atoa lelei ia pe a Hanna e valu i le 'olo, ae soso'o atu i ai ma Faatali e tolu ma isi pe na maua mai i le talituaa.

Tuli loa e Lupelele ‘ai ma na manaia le latou ta i le tamua, i le teine o Pina lea na maua ona 'ai e 15, toe alu atu ma Faatali, lelei foi lana ta e 19 ‘ai, soso'o ai ma Faaeteete e 5 ‘ai.

E o’o loa ‘ai i le 23 ae alualu foi loa i luga ma pe, i le lelei o le te’a. E 8 olo a Tauia, o Fia e 4, Melissa e 4, ae o le isi tolu pe na maua i le sapo.

E 80 ‘ai o Lupelele na tuli, maua ai e 81 a le I’a Vai ae 17 pe, lea na manumalo ai loa I’a Vai i le taaloga.

PAGO 'A' (1-2-2) vs AETO 'B' (1-3). O le taaloga lea i le va o au a Pago Pago e lua, na fa’ataunu’uina lava. Na manumalo le latou 'A' i le latou taaloga lea na fai i lena aso ma le 'B', na vaaia ai le toatele o teineiti laiti i le lelei o le  faate'a, pe a to'oaaga la e fai.

LUPELELE (4-2) vs MANULELE TAUSALA (0-5). I taaloga o le aso To’ana’i, na ta-ta muamua Manulele Tausala ma na faaalia le manaia o le fa'ate'a a le teine o Hanna a le Lupelele.

E sefulu tasi lelei 'olo na maua e Hanna i lena aso ma e lua faiaina a Lupelele o lo’o i ai nei - Teine o le Agasa ma le I'a Vai.

I le ta-ta a Manulele Tausala sa maua ‘ai e 46 ae 19 pe.

I le taimi na ta-ta ai Lupelele, e valu pe ae maua ‘ai. Teine na 'ai silia o Faatali e 15 ana 'ai mo le Lupelele.

A'o tamaita'i na lelei mai le latou taumafaiga i le 'au a le Manulele Tausala, Malia (11), Sophy (8) Faga (6) ia ma le tamaita'i o Siga e lima (5).

TEINE O LE ASAGA (4-0) vs TEINE O LE AETO 'A' (2-2-1).  O se taaloga manaia lea na faia i le aso Toana'i, i le finau toe mataalia uma 'au e lua i lena aso, o faate'a a le Asaga, o Akape ma Alleluia, e malolosi tele.

Na ta-ta muamua Teine o le Aeto, e ta ia To'a ma Gagamoe e le'i taitai 'ai, faatoa tolu sefulu 'ai, ia na o atu loa, ia le iloa loa e Akape ma Alleluia se ituaiga te'a e te'a mai ia i le toalua ia. E 80 ‘ai a le Aeto, ae faatoa 15 pe.

Tuli loa e Teine o le Asaga ia ‘ai a Teine o le Aeto. Na tutu foi le tamua a le Asaga, le faletua o Fatima ma Fiafia, ua alu ai lava 'ai e 34, ae faatoa tasi le pe.

Na ta-ta uma le 'au a le Asaga, maua 'ai 96 ae uma loa latou pe.

Toe o atu loa le Teine o le Aeto, ma latou pe ia e lima e totoe nei, aua le tuliina o 'ai e 16 a le Asaga.

Ae uma lelei lava pe na e lima, ae na'o o le fitu 'ai na maua ai, ua toe malo nei Teine o le Asaga.

O tamaita'i na maua 'ai silia a le Asaga o Fiafia e 14, Fatima ma Akape e ta’i 11, ma le Teine o le Aeto o Uato'a e 26 ma Gagamoe e 21.