Ua toe taunu’u mai fo’i i le teritori se vaega o foma’i mai le ‘Oregon Health Sciences University’ (OHSU), mo le fa’aauauina o le latou galuega o lo o ofo fua mai, e ala i le fa’aauauina lea o a latou su’esu’ega i a’afiaga o le gasegase o le fatu lea e taua o le ‘rheumatic heart disease’.

O lenei fa’ama’i e pei ona taua i fa’amaumauga a foma’i, o lo o fa’atupulaia i atunu’u tau atina’e, ae i totonu o le malo tele o Amerika, ua fai si umi e le i toe vaaia ai lea gasegase.

E silia i le vaiaso na galulue ai foma’i nei i totonu o le teritori, ma latou asia ai le aoga a Leone Midkiff, amata mai i le vaega o le K-5 e o o atu i le vasega 8, ma o nei foma’i mai le OHSU o lo o aofia ai foma’i e i ai lo latou tomai fa’apitoa i togafitiga o le fatu.

O i latou nei e aofia ai Dr. Erin Madriago; Dr. Jen Huang; Dawn Fleming ma Kim Lowman, ma o le latou galuega fesoasoani na matua lagolagoina malosi e le vaega mai le StarKist e taua o le Heart2Heart Charity, i lalo o se fesoasoani mai le LBJ atoa ai ma le Matagaluega o le Soifua Maloloina.

O isi aoga na asia e lenei au malaga e aofia ai le aoga maualuga i Kanana Fou, Fa’asao Marist, atoa ai ma le aoga tulaga muamua a Matafao, lea na latou faia ai siaki mo le silia i le to’a 1,000 fanau aoga.

O fanau aoga sa maua le avanoa e siaki ai i latou, e aofia ai le siakiina o vaega o le fatu, ina ia mautinoa pe o a’afia i latou i le gasegase o le ‘rhumatic heart disease’ (RHD), ma taua ai e le foma’i o Dr. Beth Parker mai le LBJ e fa’apea, e to’atele atu i latou o lo o a’afia i le ‘RHD’ nai lo le aofa’i sa latou mafaufauina e ono a’afia, ma ua fa’amoemoe o le masina o Novema e tatau ona tuuina mai ai a latou fa’amaumauga aloaia e tusa ai o lenei suesuega.

O AI E MAUA I LE ‘RHD’ AE AISEA FO’I E MAUA AI?

O le gasegase lenei e taua o le ‘Rheumatic heart disease’, o se tasi o gasegase e sili atu ona matuia, ona o lo o i ai le feso’otaiga ma le gasegase e taua o le ‘rheumatic fever’, po o le ‘fiva rumatika’ e pei ona silafia ai e le to’atele o le atunu’u.

O le ‘Fiva Rumatika’ la e ta’atele i fanau e amata atu i le 5 tausaga ma fa’asolo atu ai i le 15 tausaga le matutua, ae mafai fo’i ona a’afia ai fanau e laiti ane atoa ai ma tagata matutua.

I le tele o tausaga ua mavae i totonu o le malo tele o Amerika ma isi atunuu tetele o le lalolagi, o le ‘Fiva Rumatika’ e ta’atele i atunu’u tau atina’e.

Fai mai Dr. Parker, o le gasegase lenei o le ‘Fiva Rumatika’, e afua mai pe afai ua i ai se feso’otaiga a le tino ma le siama e taua i le gagana faaperetania o le ‘streptococcal bacteria’, po o le siama lea e mafai ona maua i le fa’ai po o le pa’u o le tino o le tagata.

Afai e le togafitiina le siama lea ua a’afia ai lou fa’ai po o le pa’u o lou tino i totonu o le 9 aso pe sili atu fo’i i le fualaau sa’o ma talafeagai, o le a amata loa ona a’afia le vaega o lou tino lea e tete’e atu i fa’amai, lea e taua i le gagana faaperetania o le ‘autoimmune response’, ma amata ai loa ona sosolo atu le siama i isi vaega o le tino e pei o sooga o ponaivi, ma fa’asolo atu ai lava i le fatu.

O le to’atele o le atunu’u, fa’atoa o lava e vaai le foma’i ina ua latou fa’alogoina le tiga tutui o vaega o le tino, ae foliga mai i le su’esu’ega sa faia, e fai lava si to’atele o i latou i totonu o Amerika Samoa e a’afia i le ‘RHD’, ma e foliga mai o le to’atele o fanau o lo o a’afia o lo o i ai a’afiaga i vaega o latou fatu, ae le o lava foliga vaaia o le gasegase e mafai ona fa’ailoa atu ai i o latou matua a’afiaga o lo o a’afia ai latou.

Na taua e Dr. Parker e fa’apea, e taua tele tulaga o puipuiga mo fanau ina ia aua ai ne’i a’afia i latou i lenei gasegase. E tatau ona fufulu mama lima o fanau i  le fasi moli lea e pe ai le siama, po o le ‘antibacterial soap’, ina ia puipuia ai o latou pa’u mai le osofa’i e iniseti nini’i, ma ia vave vaai le foma’i pe a i ai se a’afiaga i o latou fa’ai po o latou pa’u fo’i.

fa’aliliu Ausage Fausia