Ua fa’aalia le agaga fiafia ma le loto fa’afetai o le to’atele o le atunu’u i suiga fou ua fa’alauiloa e le kamupani va’alele a Samoa, le Polenisia, i le fa’alautele lea o lana tautua mo Savai’i i le tausaga fou, aemaise ai o le i ai o isi ana malaga fa’aopoopo mo le malae va’alele tele i Faleolo, lea ua faigofie ai mo tagata e fia malaga i isi atunuu i fafo atu o Samoa ona faia feutanaiga mo femalagaaiga.

O le to’atele o le mamalu o le atunu’u na mafai ona talanoa mai i le Samoa News, o tagata e masani ona femalagaa’i i le va o Samoa e lua, aemaise ai ma ni isi o le aufai faipisinisi.

Na taua e le susuga Toomata Viliamu e fa’apea, o le tulaga manuia i suiga ua fa’alauiloa e le Polenisia, ua atagia mai ai le ave o le fa’amuamua a le kamupani va’alele i le mamalu o le atunuu o lo o latou fai paaga i aso fai soo, ina ia vave ma lelei tulaga o femalagaaiga.

Na taua e Talifilemu Agatonu ma lona faletua o Anarita e fa’apea, o laua e masnai ona malaga i Savaii i mataupu e fa’atatau i le la pisinisi faatau oloa Samoa ma galuega taulima, ma o ni isi o taimi e faigata auala o femalagaaiga i luga o va’alele ma le sami, peita’i o le toe fa’aauau o le tautua a le Polenisia i le malae va’alele i Maota, o se itu taua lea mo i laua i le lumana’i.

“O ni isi o ma oloa taulima e aofia ai ma oloa Samoa, o lo o aumai i ni isi o pisinisi i Savai’i, ma o se itu fiafia lea ua maua i le tausaga fou, ona o lea ua mautinoa le toe lele o le Polenisia i Savaii, o le a fesoasoani malosi fo’i ia maua ma ni isi o tagata faipisinisi i le atunu’u”, o le saunoaga lea a Talifilemu.

Na taua e le Pulesili o le Polenisia ia Seiuli Alvin Tuala e faapea, talu ai e na o le tasi lava le kamupani va’alele o lo o tautuaina le atu Samoa i le taimi nei, ua manatu ai le pulega a le Polenisia e fa’alautele lana tautua mo isi motu o le atu Samoa e aofia ai Savai’i, aemaise ai o le fa’atumauina o lana tautua ua tatala mo Manu’a, ina ia mautinoa e maua e le atunuu se tautua lelei i le lumana’i.

Na taua e Valasi Atoe o Manu’a e fa’apea, o le faigofie o femalagaaiga mo Manu’a i le taimi nei ina ua tautua le Polenisia, ua mafai ai ona televave femalagaaiga mo le motu i le taimi nei, aemaise lava pe afai o se manaoga e tula’i fa’afuase’i mai.

Na matua fa’atumulia malae va’alele i Pago Pago ma Fagali’i i le vaiaso na te’a nei, i le to’atele o le mamalu o le atunu’u ua auto va’a atu e fai aso fiafia i Upolu ma Savai’i, ma ua atili ai ona lelei le tautua a le kamupani va’alele ina ua fa’aopoopo le latou va’alele fou i le masina o Setema na te’a nei, lea ua tolu ai va’alele o lo o tautuaina le atunuu i le taimi nei.