E to’atele le mamalu o le atunu’u ua latou fa’alia le agaga fa’afetai i le Komiti Fa’afoe ma le Pulega o le Falema’i i Fagaalu, ona o suiga ua faia i totogi o a latou tautua lea ua fa’aitiitia ai le tele o tautua i le $5, e pei ona amata fa’amamalu o le aso Lulu na te’a nei, Oketopa 1, 2014.

E ui e le o se pau tele lea ua molimauina i lenei taimi, peita’i na taua e ni isi le taua o le suiga ua faia e le falema’i, e fesoasoani ai i le tulaga pagatia o lo o i ai aiga lima vaivai e le o gafatia totogi o pili a le falema’i.

“E ui e na o le $5 lea ua fa’aitiitia mai pili a le falema’i, ae o le itu taua ua i ai se faaitiitiga mai le tulaga maualuga sa i ai, e ao ai ona fa’afetaia le pulega ma le komiti faafoe a le falema’i, i lo latou alofagia o le atunuu ma le tagi tagi atu i le tele o aso”, o le saunoaga lea a le tina o Marieta Amituana’i o Malaeimi.

Na taua e le faletua o Marieta e fa’apea, o ia le isi tina sa masani ona telefoni i le falema’i i le tele o masina, e talosaga i ai mo se avanoa e tuutuu ai i lalo pili ua fai si maualuluga, e le gafatia fo’i e lona aiga ona totogi nei pili taugata.

“Sa i ai le taimi e le i gafatia ai e lo’u aiga ona ave ni isi o le fanau e vaai le foma’i ina ua mama’i, ona ua le gafatia e le tamaoaiga ona totogi le falema’i, ae fa’afetai i le agagalelei o le Atua, e ui e le i aumai ni vailaau mai le falema’i ae sa toe maua lava e le fanau le tino malosi ma le soifua maloloina lenei”, o le saunoaga lea a Marieta i le Samoa News.

Na taua e le Ta’ita’ifono o le Komiti Fa’afoe a le LBJ ia Leilua Mase Akapo i le vaiaso nei e fa’apea, o se tasi o mafua’aga ua ala ai ona a’e se finagalo i le Komiti Fa’afoe e fa’a pau ese le isi $5 mai totogi a le falema’i, toeititi to’a sefulu tagata o le atunuu ma aiga e valavalaau atu i vaiaso uma ma talosaga atu, pe mafai ona tuu tuu i lalo pili a le falema’i ua fai si taugata, ma ua le gafatia e le malosi o le latou tamaoaiga.

Saunoa Leilua e fa’apea, ina ua iloilo e le komiti faafoe le tulaga o lo o i ai le tamaoaiga o le atunuu ma aiga taitasi, ma iloa ai le tulaga o le 87% o aiga o le atunuu e aofia i latou i le vaega o tagata e vaivai ma maualalo le tamaoaiga, na a’e ai loa se manatu ua tatau ona talia le fautuaga e faataugofie pili a le falema’i.

Ae na taua e le tama matua ia Fereti Fonoti o Tafuna e fa’apea, e tatau ona silasila toto’a le falema’i i le feagaiga sa osia e le malo tele o Amerika ma tuaa ua taooto mai Tiasa, lea o lo o taua ai le le tatau lea ona totogi e le atunuu se tupe pe a vaai le foma’i.

“I lo’u talitonuga, e tatau ona saili e le falema’i ma le malo ni fesoasoani tupe mai fafo e faatupe ai auaunaga uma a le falema’i mo le atunu, ae tatau lava ona talavai fua le atunuu i le falema’i i soo se taimi”, o le saunoaga lea a Fereti.

E ui i se finagalo o le tama matua ia Fereti i le talavai fua lea o le atunuu, ae sa ia faafetaia le pulega a le falemai ona o le fuafuaga e tuutuu i lalo le totogi e vaai ai le foma’i.

“Na ou sau i le aso Lulu na te’a nei e le o suia lava le tau o pili a le falema’i, ae fa’afetai o lea ua ou sau i le aso (aso ananafi) ao lea ua aloaia suiga i pili a le falema’i, o se tulaga lelei fo’i lea mo a’u ma si o’u aiga lima vaivai, atonu fo’i o se tala fiafia lava fo’i lea mo le atunuu atoa aemaise lava i aiga lima vaivai”, o le isi lea saunoaga a le tama matua o Fereti.

Na taua e se tagata e faigaluega i le falema’i i le Samoa News ananafi e fa’apea, e tele le suiga o tagata na asia le falema’i talu mai le aso Lulu na te’a nei, ina ua aloaia suiga fou i pili e totogi e le atunuu, ma o lea suiga e pei ona taua e le molimau e aofia ai le to’atele o tagata ua vaaia le lolofi atu e fia vaai se foma’i pe faatino fo’i ni isi o auaunaga masani a le falema’i i isi vaega.

Ae ui i taumafaiga a le komiti faafoe a le falema’i e tau faaitiitia pili a le falema’i, e le o se itu lea na nofo lelei i finagalo o ni isi o senatoa, ona e talitonu i latou, ua masani lava le atunuu i le maualuga sa masani ona latou totogiina, aemaise ai fo’i le ono aafia ai ma tupe maua a le falema’i mo le tausaga tupe fou lenei ua amata.

Na faamanino e Leilua i luma o le komiti o le Soifua Maloloina a le Senate i le vaiaso nei e fa’apea, ina ua faaitiitia pili a le falema’i i le $5 i le amataga o le tausaga nei, sa vaaia ai le amata toe lolofi atu o tagata e vaai le foma’i, ma e i ai lo latou talitonuga o le a fa’apena fo’i le suiga lea ua latou toe fai i pili a le falema’i.

Mo le vaaia o le foma’i, e $25 le totogi sa i ai, peita’i o lea ua fa’aitiitia i le $20, ae mo isi talavai sa ta’i $15, o lea ua fa’aitiitia i le ta’i $10 i le taimi nei.

Saunoa le afioga i le alii faipule ia Tautasi Archie Soliai e fa’apea, e ui e taua le fuafuaga a le falema’i ina ia fa’aitiitia pili mo le atunu’u, e tatau foi ona vaavaai toto’a le komiti fa’afoe i le isi itu o le siliva, ona o le isi lea alaga tupe o lo o faalagolago i ai le falema’i mo ana tupe maua e fa’atino ai lana auaunaga i le atunuu.

Saunoa Taotasi e fa’apea, afai e i ai se faaletonu i tulaga o tupe maua a le falemai mo le ulua’i kuata o le tausaga tupe lenei, atonu e mafua mai ona o le faaitiitia o pili i le $5, e ui o se fuafuaga sa ia taua “o se fuafuaga lelei mo tagata uma”.

Ae na taua e le afioga i le alii senatoa ia Magalei Logovii e fa’apea, o tagata o lo o pito sili ona faasea i le taugata o pili a le falema’i, o tagata ia e le o naunau e tausi lelei o latou soifua maloloina, ae naunau lava latou e faataugofie pili a le falema’i, ina ia mafai ai ona alu i soo se taimi e siaki le fomai.

Sa ia taua fo’i e fa’apea, o tagata o lo o pito sili ona faasea i le taugata o pili a le falema’i, o tagata fai mai e le gafatia ona totogi le $15, o i latou ia o lo o tumu tumu ai taaloga Bingo i fa’aiuga o vaiaso i le tele o afioaga i le atunuu.

I lona talitonuga, e fiu lava le falema’i ma le komiti faafoe e fetuutuuna’i pili a le falema’i, e le mafai ona taofia ai le toatele o tagata e manaomia le tautua a le falemai, sei vagana ua tausisi tagata uma i mea tausami latou te faaaogaina i tua i aiga, ona faatoa mafai lea ona foia le faafitauli o le mama’i soo o tagata.