Ua fa’alia e ni isi o le atunu’u lo latou fa’afetaia o suiga fou ua fa’alauiloa e le pulega a le falema’i o le LBJ i Fagaalu, i le suia lea o le tautua sa ofo atu e le vaega a le ‘Primary Care Clinic’, i le tautua fou ua fa’aigoaina o le ‘Non Urgent Clinic’.

Na taua e le to’atele o le atunu’u na mafai ona fesiligia e le Samoa News i le vaiaso nei e fa’apea, o suiga ua fuafua le LBJ e amata i le vaiaso fou, e le gata o ni suiga ua leva na tatau ona fai, ae o se suiga fo’i o le a mafai ai ona foia le fa’afitauli o lo o masani ona tula’i so o mai, i le fiu lea o tagata e fa’atali le taimi e vaai ai le foma’i.

“O le fa’afitauli i le fiu e fa’atali le taimi e vaai ai le foma’i, e le fou i Amerika Samoa ma le falema’i, ae fa’afetai i le pulega fou ua i ai nei ona o le manatu e ave la latou fa’amuamua i le atunu’u, ina ia taofia ai le fiu e fa’atali le taimi e vaai ai le foma’i”, o le saunoaga lea a le tama matua ia Leaupepe Lagofa’atasi, 67 tausaga le matua mai le afioaga o Fagaalu.

Na taua e Leaupepe e fa’apea, o le tele o masina e alu ai i le falema’i mo ana talavai masani, ae o ni isi fo’i taimi e asiasi fa’afuase’i ai i le falema’i ona o ni ma’i e a’afia ai lona soifua maloloina, ma, e i ai lava taimi e o o atu ai lava i le ta’i 4 itula pe sili atu fo’i o fa’atali lava le taimi e vaai ai se foma’i.

Na taua e le tina matua o Mareta Ugapo-Brown, 61 tausaga mai Iliili lona fiafia tele ina ua fa’alauiloa suiga fou a le falema’i, ona o ia le isi tagata sa a’afia ai fo’i i le fa’afitauli lenei i se taimi ua tuana’i, i le silia lea i le 4 itula o nonofo lava ma si ana fanau e fa’atali le taimi e vaai ai se foma’i, ina ua a’afia si ana tama e 8 tausaga i se tasi o fa’ama’i pipisi i le atunu’u.

“O se suiga ua leva na tatau ona fai, afai e fa’aauau pea ona fetaia’i le atunu’u ma fa’afitauli ona o le fa’aletonu o le tautua a le falema’i, ailoga e toe i ai se isi e fia sau i le falema’i, ae fa’afetai i le ali’i pule sili fou ua i ai nei atoa ai ma le pulega atoa, ona o suiga fou ua fa’amoemoe e amata i le vaiaso fou”, o le saunoaga lea a Mareta.

E to’alua isi tama’ita’i foma’i pasi i le LBJ sa la fa’aalia lo la lagolagoina o suiga ua faia, ina ia fa’aitiitia ai le umi o le taimi e fa’atali ai le atunu’u mo le vaaia o se foma’i, aemaise ai lava ia taofia ai le toe faia o faitioga ma fa’asea a le atunu’u i le aufaigaluega a le falema’i.

Na taua e tama’ita’i faigaluega ia e to’alua a le falema’i, o ni isi fo’i o taimi e fiu lava e tau fa’amalamalama i le atunu’u le mafua’aga e tuai ai ona maua le avanoa e vaai le foma’i, ae ona o le atunu’u lava e faigata ona fa’amalie o latou finagalo.

Saunoa le Foma’i Sili ia Dr. Iotamo Saleapaga i se fa’atalatalanoaga ma le Samoa News e fa’apea, o le agaga autu o le suiga e pei ona fuafua, ina ia taofia ai le umi o le taimi e fa’atali ai le atunu’u e vaai le foma’i, ma taofia ai fo’i ma le fa’asea o le atunu’u.

Na ioe le ali’i foma’i Sili, o le fa’afitauli e pei ona maitauina i le umi lea o le taimi e fa’atali ai le foma’i, o se fa’afitauli ua tele tausaga o tula’i mai, ma ua o o i le taimi ua tatau ai ona galulue le falema’i e foia.

“O le tautua fou lea lea ua fa’amoemoe e tatala i le vaiaso fou, o le a togafitia ai na o tagata e le o matuia gasegase o le tino o lo o a’afia ai, sei vagana ai tagata o lo o a’afia i gasegase matuia ma gasegase e oso fa’afuase’i e aga’i atu i le vaega o le ‘ER”, o le saunoaga lea a Dr. Saleapaga.

Ae na taua e le susuga a Mikaele Lilo o Aua, “e leai se mea e ta’u o se gasegase feololo ma se gasegase matuia, so o se tagata e alu i le falema’i, e mafua ona alu ona ua gasegase, e tatau fo’i la i foma’i ona tali atu i se taimi vave ina ia maua e lea tagata togafitiga i se taimi vave, ina ia taofia ai le toe tula’i mai o fa’afitauli o le fiu e fa’atali le taimi e vaai ai le foma’i, lea fo’i sa a’afia ai maua ma le ma fanau i le isi aso na matou asia ai le falema’i”.