Na fa’afetaia e le afioga i le alii kovana ia Lolo Matalasi Moliga le tautua matavela a tagata faigaluega uma i le atunuu, i le aso Faraile na te’a nei ina ua faamanatu aloaia le aso faapitoa mo tagata faigaluega.

“O le aso lenei ua faia faapitoa e le Atua mo tagata faigaluega uma i totonu o Amerika Samoa”, o le saunoaga lea a Lolo i lana saunoaga autu e tatala aloaia ai polokalame i le aso Faraile na te’a nei.

“O le aso lenei ua faailoa mai ai, na mafua ona tatou galulue i le malo ma kamupani tua, o lo tatou naunau e tautua le faigamalo a Amerika Samoa, fa’afetai tele mo la outou tautua matavela”, o le isi lea saunoaga a le tofa Lolo.

O le aloaia o le tautua a tagata faigaluega uma i Amerika Samoa, o se tofa na taua e Lolo na afua mai ia i laua ma le lutena kovana ia Lemanu Peleti Mauga, ona o le la manatu e avea le aso Faraile na te’a nei o se aso faapitoa mo tagata faigaluega uma i le atunuu.

“O le fautuaga mo outou uma tagata faigaluega i le malo ma kamupani, ia outou galulue faamaoni i tiute ma faiva ua tuuina atu ia te outou, ma ia outou faatino galuega ua tofia outou e galulue ai”, o le isi lea saunoaga a le alii kovana.

“So o se galuega o lo o e galue ai, ia e faatino ma le faamalosi atoa ai ma le alofa, soo se galuega lelei ma le i’u manuia, o lo o nofo mai ai i tua se tagata faigaluega lelei ma le fa’amaoni”, o le isi lea saunoaga a le alii kovana.

Na felanulanua’i polokalame na faatinoina i le Stadium i Tafuna i le aso Faraile na te’a nei, ina ua faamanatu aloaia le aso faapitoa mo tagata faigaluega i totonu o le atunuu.

Na amata le polokalame i savali a matagaluega ma ofisa tumaoti a le malo, faapea ai kamupani ma pisinisi tua, sosoo ai loa ma le polokalame faamalosi tino na saunia e se vaega ua faapitoa i tulaga tau faamalosi tino (Zumba).

O le sisiina o le fu’a o le Iunaite Setete atoa ai ma le tagavai a Amerika Samoa, na gafa lea ma tama ma tina matutua ma le Ofisa o le TAOA.

O le maea ai o le saunoaga a le alii kovana e faalaeiau ai le faamoemoe o le aso, na sosoo ai loa lea ma taaloga ae faaiu i fa’afiafiaga.

Ina ua fesiligia e le Samoa News ni isi o tagata faigaluega i ni o latou lagona e tusa ai o le faamanatuina o lea aso taua, sa latou taua ai le faafiafiaina o latou loto ina ua mafai ona amanaia e le malo le tautua a tagata faigaluega.

Na taua e le susuga Taylor Mauga e fa’apea, o le faamanatuina e le malo o le aso faapitoa o tagata faigaluega, ua atagia mai ai le amanaia e le malo o le sao o tagata faigaluega i le atina’eina o le malo i lona tamaoaiga.