Ua fa’aalia e ni isi o le to’atele o tama ma tina matutua i le atunu’u lo latou fa’afetaia o le fa’aaloalo maualuga a le faigamalo a Lolo ma Lemanu, e ala i le sauniga fa’apitoa lea ua fuafua e faia i le vaiaso nei, e amanaia ai le tautua a tagata matutua i le atunu’u.

Na taua e le to’atele o tama ma tina matutua na fesiligia e le Samoa News e uiga i lenei mataupu, le fa’agae’etia o latou lagona ma manatu, ona o le fa’aauau pea lea o le amanaia e le afioga i le ali’i kovana ia Lolo Matalasi Moliga ma le faigamalo, le tautua a i latou o tagata matutua sa faia mo le atunu’u.

“E leai ni upu o le gagana e fa’amatala ai lagona fiafia ina ua tafa le finagalo o le ta’ita’i o le atunu’u ma le faigamalo, e amanaia tama ma tina matutua i le fa’aiuga o lenei tausaga, atonu e manatu mama i ai ni isi, ae o a’u ma lo’u tama matua, o se fa’aaloalo maualuga ua tu’uina mai e le faigamalo, tauala mai i le afioga i le Fa’atonu ia Ale Tifimalae ma le Ofisa a le TAOA, fa’afetai tele mo le amanaiaina o matou nei o tagata matutua”, o le saunoaga lea a le tama matua ia Ifopo Apulu o Aua.

Na taua e tina matutua ia Filomena Sasagi ma Seiaute Levaai e fa’apea, o le fuafuaga a le ali’i kovana e fa’ataua tagata matutua, o lo o mulimulita’i lava fo’i i se tasi o ana manulauti, e ave le fa’amuamua i tupulaga talavou, o le lumana’i lea o Amerika Samoa.

“Fa’afetai i le afioga i le Kovana fa’apea ai le tofa ia Ale ona o le amanaia o se tautua fa’atauva’a a tagata matutua, e le gata ua fa’ataua tupulaga talavou ma fanau aoga e le alii kovana, ae ua o o lava fo’i i tagata matutua ua fai ifo lo latou aoga i le faigamalo a Tutuila ma Manu’a o lo o avea pea i ai lana fa’amuamua”, o le saunoaga lea a le faletua ia Sasagi.

Saunoa le afioga i le ali’i fa’atonusili o le TAOA ia Ale i le Samoa News e fa’apea, o le agaga autu o le polokalame lea ua sauni le Ofisa e aloaia ai le tagata matutua i le vaiaso nei, na afua mai i lalo o se fautuaga a le afioga i le ali’i kovana, ina ia i ai se taimi e tu’u atu ai e le malo lana fa’afetai fa’atasi ai ma lana fa’amalo i tama ma tina matutua ona o le latou tautua mo Amerika Samoa e le fesiligia.

“O se tasi o polokalame o lo o pito sili ona fa’afetaia ai le auaunaga a tama ma tina matutua i le taimi nei, o le polokalame lea o lo o faia i totonu o Aoga Maualuluga, i le avea lea o tama ma tina matutua o ni faufautua i fanau aoga, ina ia taofia le taua’i misa so’o o fanau atoa ai ma le sosola i taimi o vasega, o lenei tautua o lo o fa’atupe mai e le malo feterale”, o se vaega lea o le saunoaga a Ale i le Samoa News.

O le polokalame lea ua fa’atulagaina mo le aso Lulu o le vaiaso nei, o le a aofia ai fa’afiafiaga fa’aleaganu’u mai tama ma tina matutua, fa’apea ai le tufatufaina o meaalofa o le Kerisimasi, ua tapena i ai le Ofisa o le TAOA.

O le ta’amilo atu pasi mo le la’uina mai o tagata matutua i lea aso, amata mai lava i Amanave seia o o atu i Tula, ma ua talosagaina tagata matutua ina ia vaai le pasi o le a ta’amilo atu i le itula e 6:30 i le taeao ina ia taofi ma aga’i mai ai i le taulaga.

O le afioga i le ali’i kovana ia Lolo, o ia lea o le a saunoa i le saunoaga autu o lenei fa’amoemoe, lea ua fa’atulaga e amata i se sauniga lotu puupuu e saunia e le susuga i le Tiakono ia Malaki Timu, i le itula e 8:00 i le taeao i le Fale Laumei i Utulei.