Ua to’atele le mamalu o le atunu’u ua latou fa’afetaia le tautua a le Matagaluega a le Soifua Maloloina, i le auala na latou tali atu ai i le mataupu lea na tula’i mai i luga o se va’a fagota i le lua vaiaso ua te’, ina ua masalomia le a’afia o se ali’i fai faiva i ‘auga o le fa’ama’i oti o le ‘Ebola’.

O ni isi o le atunu’u na fa’afetaia le tali atu a le Matagaluega a le Soifua Maloloina, o ni isi ia na valaau mai i le Samoa News i le aso Lulu na te’a nei ma latou fesiligia se gaioiga a le matagaluega ua sauni e faia e tali atu ai i lenei fa’afitauli.

“Na mafua ona ou valaau atu ma fesiligia se gaioiga a le Soifua Maloloina o le a faia e tali atu ai i le fa’alavelave, ona ua ou talitonu, afai e fa’amaonia ua a’afia le ali’i fai faiva lenei i ‘auga o lenei fa’ama’i leaga, o le mea moni lava ua tupu le mala ia Samoa”, o le saunoaga lea a le susuga ia Martin Manu, o se ali’i faipisinisi i le atunu’u.

“O le auala lea na taua e le Matagaluega sa latou tali atu ai i le taimi na taunu’u mai ai le va’a i gatai o le ‘ava, fa’apea ai ma le fa’atinoina o a latou siaki, o se itu e maofa ai le loto, ina ua ofo atu e nei tagata lo latou saogalemu e piupuia ai le saogalemu o le atunu’u atoa”, o le saunoaga lea a le tina o Margret Filiga, o se tagatanu’u sa valaau mai e fia momoli lana fa’afetai i le Matagaluega atoa e tusa ai o le latou tali atu i lenei mataupu.

E to’alua isi tamali’i o le atunu’u na la taua e fa’apea, o le tiute lava lea a le Soifua Maloloina i so o se taimi, ia mautinoa le soifua maloloina o le atunuu ia puipuia, ina ne’i a’afia i ni fa’ama’i e pipisi mai fafo atu o Amerika Samoa.

E to’atele ni isi o le atunu’u na valaau mai i le Samoa News  e fa’ailoa mai lo latou nonofo popole tele, pe tua ma ni a sailiiliga o le a faia i le ali’i fai faiva sa taua na a’afia, peita’i o se tala fiafia ina ua fa’amaonia mai e se sui o le Soifua Maloloina i le Samoa News, le leai o ni fa’amaonia e lagolago ai na a’afia le ali’i fagota i ‘auga o lenei fa’ama’i.

Na taua e le susuga Scott Anesi i le Samoa News e fa’apea, e ui e le i mafai ona latou fa’amaonia na a’afia le ali’i gasegase o le ‘Ebola’, o le itu taua ua mafai ona latou fa’aaogaina le avanoa lea e fa’aleleia atili ai a latou tapenaga i le taimi e tula’i mai ai lenei fa’alavelave i se taimi o i luma.

Saunoa le Fa’atonusili ia Motusa T. Nua e fa’apea, so o se taimi e tula’i mai ai se gasegase o le ‘Ebola’ i le teritori, ua sauni ma tapena lana matagaluega e tali atu i lea manaoga.