E le o toe umi se taimi ae mae’a loa a’oa’oga fa’apitoa o lo o faia mo ali’i tama’ita’i ua a’otauina e avea ma Leoleo o le Toese i Tafuna, e pei ona fa’amaonia mai e le Sui Komesina o le Matagaluega o Puipuiga Lautele, le tofa Leseiau Laumoli i le vaiaso na te’a nei.

O i latou e to’a 11 o lo o auai i ni a’oa’oga fa’apitoa o lo o faatautaia e le ali’i Leoleo ia Cpt. Tauese Va’a Sunia i le taimi nei, o le a galulue mo le faaatoaina o leoleo e tatau ona galulue i le toese.

“O i latou o lo o auai i le vasega faapitoa lenei, o le a galulue mo le toese i le taimi e mae’a ai ona fa’au’u i latou, ma ua faamoemoe o le a latou faatinoina tiute tauave a leoleo o lo o galulue i le toese i le taimi nei,” o le saunoaga lea a Laumoli i le Samoa News..

O ni isi o i latou o lo o i ai i le vasega faapitoa lenei, o lo o toe aoaoina ai ni isi o leoleo o lo o galulue i le taimi nei, aemaise lava i le Falepuipui o Tamaiti (Juveniles Detention Center), lea e mana’omia le fa’aatoatoa o lo latou agava’a i le faatinoina o galuega fa’aleoleo.

“O le vasega faapitoa lenei o se fuafuaga faataoto a le Komesina e tali atu ai i le manaoga o lo o tula’i mai i le toese, i le mana’omia lea o ni isi leoleo e fa’aatoa ai sifi a vaega taitasi, ona e le o lava le aofa’i o leoleo e tatau ona galulue ai,” o le isi lea saunoaga a le sui komesina.

O le vasega fou mo leoleo o le toese, o lo o aofia ai tamaita’i e to’alua, lea ua faamoemoe e galulue i le Falepuipui o Tama’ita’i.

I se faatalatalanoaga a le Samoa News ma le Komesina o Leoleo ia William E. Haleck i le faaiuga o le tausaga na te’a nei, sa faamaonia mai ai e Haleck le i ai o se fuafuaga a le matagaluega, e fia faia se vasega faapitoa mo ni leoleo e faaopoopo i leoleo o lo o galulue i le toese, ona e i ai leoleo o le toese ua manatu le alii komesina e fa’amalolo ona o ni isi o mafuaaga tatau.

O ni isi o alii leoleo na faamalolo mai le toese ina ua alia’e tuuaiga faasaga i lo latou auai lea i gaioiga e pei o le faasosola o pagota i tua mai le toese, faapea ai ma tuuaiga i le faaoolima i ali’i pagota.