O le vaiaso atoa lenei o lo o fa’agasolo ai i totonu o le atunu’u se aoaoga fa’apitoa mo i latou ua valoia, o ta’ita’i ia o atumotu laiti o le Pasefika o lo o i lalo o le vaavaaiga a le malo tele mo le lumana’i mo le taimi muamua.

I se feiloaiga a le Samoa News ma le ta’ita’i o le polokalame o le ELDP ia Jason Aubachon i le amataga o le vaiaso nei, e le gata na ia fa’amatala le taua o le avanoa ua maua e Amerika Samoa e talimalo ai i lenei aoaoga, ae o se avanoa fo’i lea mo sui uma o le ELDP e mafai ai ona latou molimauina ituaiga gaioiga o lo o fa’afoe ai galuega i totonu o le malo a Amerika Samoa.

“O ni isi o vaega taua o lo o aofia i a matou aoaoga talu ona fa’agasolo mai i le lima lenei o tausaga, o le vaavaai lea i auala e fa’aleleia ai tulaga o atina’e ma itu i le ta’ita’iina o se faigamalo, ma o ni isi o aoaoga o lo o matou fa’atinoina i le taimi nei e aofia ai le a’oa’o o auala e avea ai i latou nei ma ta’ita’i, o auala e mafai ona fa’amalosia ai le itu tau tupe, atoa ai ma auala eseese uma lava e fa’atatau i le manuia o se faigamalo”, o le saunoaga lea a le susuga ia Aubachon i le Samoa News.

Na taua atili e Aubachon e fa’apea, o le polokalame lenei e filifili mai ai na o tagata faigaluega a le malo, i latou o lo o umia tulaga ogatotonu i matagaluega ma ofisa tumaoti, ina ia mafai ona a’oa’o i so o se auala e fa’a ‘aupegaina ai i latou e avea ma ta’ita’i o le atunu’u i le lumana’i.

“O le autu o le polokalame a le ELDP, o le a’otauina lea o i latou o lo o umia tulaga ogatotonu i matagaluega a le malo, ina ia aoao i auala e faia ai faaiuga atoa ai ma le faalauteleina o lo latou silafia i soo se vaega taua o le galuega i totonu o le malo”, o le isi lea saunoaga a Aubachon.

E silia i le to’a 15 sui o le ELDP o lo o i ai i le atunu’u, lea o lo o filifilia mai i atunu’u eseese o le Pasefika o lo o i lalo o le fa’amalu a le Iunaite Setete, e aofia ai Palau, Northern Marianas, Guam, le Federated State of Micronesia ma Amerika Samoa. E to’atolu sui o Amerika Samoa o lo o i ai i totonu o le vaega lenei.

O sui o Amerika Samoa e aofia ai Salamasina Satele mai le Matagaluega o Tagata Faigaluega a le malo, faapea ai Leifitoa Tanoa ma Magdalene Petaia Suisala o le Matagaluega o Fefa’atauaiga ma Alamanuia.

O le polokalame a le ELDP o lo o fa’atupeina e le Matagaluega o le Initeria a le fetarale, o le vaiaso nei fo’i i a latou aoaoga o lo o fa’agasolo na maua ai le avanoa e saunoa ai le sui failautusi o le Initeria o lo o i ai i le atunu’u, le tama’ita’i ia Esther Kia’aina.