E 2% lea ua fa’aitiitia ai le Paketi a le malo mo le Tausaga Tupe fou 2016, nai lo le Paketi o le Tausaga Tupe lenei 2015, e pei ona taua e le afioga i le ali’i kovana ia Lolo Matalasi Moliga, i sana tusi sa tuuina atu i ta’ita’i o le Fono Faitulafono i le aso ananafi, ina ua tauaao aloaia atu e le faigamalo le Paketi i le Fono mo lona iloiloina.

Na taua e Lolo i lana tusi e fa’apea, o le paketi mo le tausaga tupe fou 2016, e $417.8 miliona ($417,854,000), tusa lea e $6,629,500 ua fa’aitiitia mai ai i le paketi o le tausaga tupe lenei 2015 i le aofa’iga e $424,483,500.

Mai alagatupe tetele e fa (4) o loo faatupe mai ai le paketi a le malo mo le tausaga tupe fou 2016, e lua (2) vaega tupe o loo faaitiitia ai tupe maua a le malo, ae o isi alagatupe e 2 o loo maitauina le siitia ai o tupe maua.

Mo tupe lotoifale, e 2% lea ua valoia e le malo e fa’aitiitia ai tupe maua i le tausaga tupe fou, nai lo tupe sa valoia e maua i le tausaga tupe lenei, ae 5% lea ua valaoia e fa’aitiitia ai tupe maua mai Tupe o loo maua mai i Tautua ma Auaunaga (Enterprise Funds).

I le tausaga tupe lenei 2015, e $106,240,000 na valoia e le malo e maua mai i tupe lotoifale, peita’i mo le tausaga tupe fou 2016, e $104,416,000 ua valoia e maua, tusa lea e $1,824,000 ua fa’aitiitia ai, ae mo Tupe mai Tautua ma Auaunaga, e $206,938,000 sa valoia e maua mo le tausaga tupe lenei 2015, a’o lea ua valoia e le malo, e na o le $196,724,000 e mafai ona maua i le tausaga tupe fou 2016, tusa lea e $10,214,000 le eseesega.

Na taua e Lolo i ta’ita’i o le fono e faapea, o le 75% o le paketi mo le tausaga 2016, ua fa’amoemoe e alu lea i le fa’atupeina o tautua ma auaunaga ua mae’a ona faataoto mo le taliina o manaoga o tagata lautele, e ui o lea ua valoia le fa’aitiitia o tupe lotoifale i le maualuga e 2%.

I tulaga o tupe ua valoia e le malo e fa’atupe mai ai lana paketi mo le tausaga tupe fou, e $66.5 miliona lea ua valoia e maua mai i lafoga; $1.3miliona e maua mai i Laisene ma Pemita; $3.2 miliona e maua Totogi ma Faasalaga; $6.5 miliona e maua mai i Tautua ma Auaunaga; $2.5 miliona e mauam ai i isi auaunaga ma tautua, $5.3 miliona e maua i auaunaga a mataluega, ma le $19.063 miliona e maua i auaunaga lotoifale a le malo.

I le silasila mamao a le faigamalo i le tulaga o lona tamaoaiga, na saunoa ai Lolo e fa’apea, o le tamaoaiga o le teritori o loo fa’alagolago malosi lea i le tulaga e taoto i ai le mataupu i totogi maualalo i le atunu’u.

Afai ae talia e le Konekeresi le talosaga ina ia toe fa’aauau atu i tua le fa’amalosia o le totogi amata, o le a tulaga lelei le tamaoaiga o le malo, ae afai e le mafai, o le a leai se fa’amoemoega o le tamaoaiga o le atunu’u ma le malo.

Na taua e Lolo e fa’apea, i le avea ai o ta’iala na fa’ataoto mo le tamaoaiga ua maua’a ai tulaga manuia o le tamaoaiga i le taimi nei. Sa ia taua atili fo’i i ta’ita’i o le fono e faapea, o tupe maua e pei ona valoia e le malo, o loo fuafua lea i luga o le talitonuga, e talia e le konekeresi le talosagaina ina ia toe faaauau atu i tua le taimi e faaopoopo ai le isi vaega o le totogi amata, ae afai e le sa’o fuafuaga a le malo e fa’atatau i totogi amata, o le a toe asiasi le malo i tulaga o ana tupe maua fa’alotoifale, ina ia mautinoa e toe faia i ai ni suiga e talafeagai mo tupe maua.